Revakhanda of the Vayupurana 34

तत्रैव तु भवेदन्यद् आदित्यस्य महात्मनः । कीर्तयामि नरश्रेष्ठ यदि ते श्रवणे मतिः

tatraiva tu bhavedanyad ādityasya mahātmanaḥ / kīrtayāmi naraśreṣṭha yadi te śravaṇe matiḥ

Sanskrit only: no published translation is held for this verse.

एतदाश्चर्यमतुलं श्रुत्वा तव मुखोद्गतम् । विस्मयाद्धृष्टरोमाहं जातो ऽस्मि मुनिसत्तम

etadāścaryamatulaṃ śrutvā tava mukhodgatam / vismayāddhṛṣṭaromāhaṃ jāto 'smi munisattama

Sanskrit only: no published translation is held for this verse.

सहस्रकिरणो देवो हर्ता कर्ता निरञ्जनः । अवतारेण लोकानाम् उद्धर्ता नर्मदातटे

sahasrakiraṇo devo hartā kartā nirañjanaḥ / avatāreṇa lokānām uddhartā narmadātaṭe

Sanskrit only: no published translation is held for this verse.

पुरुषाकारो भगवानुताहो तपसः फलात् । कस्य गोत्रे समुत्पन्नः कस्य देवो ऽभवद् वशी

puruṣākāro bhagavānutāho tapasaḥ phalāt / kasya gotre samutpannaḥ kasya devo 'bhavad vaśī

Sanskrit only: no published translation is held for this verse.

कुलिकान्वयसम्भूतो ब्राह्मणो भक्तिमाञ्छुचिः । ईक्ष्यामीति रविं तत्र तीर्थे यात्राकृतोद्यमः

kulikānvayasambhūto brāhmaṇo bhaktimāñchuciḥ / īkṣyāmīti raviṃ tatra tīrthe yātrākṛtodyamaḥ

Sanskrit only: no published translation is held for this verse.

योजनानां शतं साग्रं निराहारो गतोदकः । प्रस्थितो देवदेवेन स्वप्नान्ते वारितः किल

yojanānāṃ śataṃ sāgraṃ nirāhāro gatodakaḥ / prasthito devadevena svapnānte vāritaḥ kila

Sanskrit only: no published translation is held for this verse.

भोभो मुने महासत्त्व अलं ते व्रतमीदृशम् । सर्वं व्याप्य स्थितं पश्य स्थावरं जङ्गमं च माम्

bhobho mune mahāsattva alaṃ te vratamīdṛśam / sarvaṃ vyāpya sthitaṃ paśya sthāvaraṃ jaṅgamaṃ ca mām

Sanskrit only: no published translation is held for this verse.

तपाम्यहं ततो वर्षं निगृह्णाम्य् उत्सृजामि च । न भृतं चैव मृत्युं च यः पश्यति स पश्यति

tapāmyahaṃ tato varṣaṃ nigṛhṇāmy utsṛjāmi ca / na bhṛtaṃ caiva mṛtyuṃ ca yaḥ paśyati sa paśyati

Sanskrit only: no published translation is held for this verse.

वरं वरय भद्रं त्वम् आत्मनो यस्तवेप्सितम्

varaṃ varaya bhadraṃ tvam ātmano yastavepsitam

Sanskrit only: no published translation is held for this verse.

यदि तुष्टो ऽसि मे देव देयो यदि वरो मम । उत्तरे नर्मदाकूले सदा संनिहितो भव

yadi tuṣṭo 'si me deva deyo yadi varo mama / uttare narmadākūle sadā saṃnihito bhava

Sanskrit only: no published translation is held for this verse.

ये भक्त्या परया देव योजनानां शते स्थिताः । स्मरिष्यन्ति जितात्मानस् तेषां त्वं वरदो भव

ye bhaktyā parayā deva yojanānāṃ śate sthitāḥ / smariṣyanti jitātmānas teṣāṃ tvaṃ varado bhava

Sanskrit only: no published translation is held for this verse.

कुब्जान्धबधिरा मूका ये केचिद्विकलेन्द्रियाः । तव पादौ नमस्यन्ति तेषां त्वं वरदो भव

kubjāndhabadhirā mūkā ye kecidvikalendriyāḥ / tava pādau namasyanti teṣāṃ tvaṃ varado bhava

Sanskrit only: no published translation is held for this verse.

शीर्णघ्राणा गतधियो ह्यस्थिचर्मावशेषिताः । तेषां त्वं करुणां देव अचिरेण कुरुष्व ह

śīrṇaghrāṇā gatadhiyo hyasthicarmāvaśeṣitāḥ / teṣāṃ tvaṃ karuṇāṃ deva acireṇa kuruṣva ha

Sanskrit only: no published translation is held for this verse.

ये ऽपि त्वां नर्मदातोये स्नात्वा तत्र दिने दिने । अर्चयन्ति जगन्नाथ तेषां त्वं वरदो भव

ye 'pi tvāṃ narmadātoye snātvā tatra dine dine / arcayanti jagannātha teṣāṃ tvaṃ varado bhava

Sanskrit only: no published translation is held for this verse.

प्रभाते ये स्तविष्यन्ति स्तवैर्वैदिकलौकिकैः । अभिप्रेतं वरं देव तेषां त्वं दद भोच्युत

prabhāte ye staviṣyanti stavairvaidikalaukikaiḥ / abhipretaṃ varaṃ deva teṣāṃ tvaṃ dada bhocyuta

Sanskrit only: no published translation is held for this verse.

तवाग्रे वपनं देव कारयन्ति नरा भुवि । स्वामिंस्तेषां वरो देय एष मे परमो वरः

tavāgre vapanaṃ deva kārayanti narā bhuvi / svāmiṃsteṣāṃ varo deya eṣa me paramo varaḥ

Sanskrit only: no published translation is held for this verse.

एवमस्त्विति तं चोक्त्वा मुनिं करुणया पुनः । शतभागेन राजेन्द्र स्थित्वा चादर्शनं गतः

evamastviti taṃ coktvā muniṃ karuṇayā punaḥ / śatabhāgena rājendra sthitvā cādarśanaṃ gataḥ

Sanskrit only: no published translation is held for this verse.

तत्र तीर्थे नरो भक्त्या गत्वा स्नानं समाचरेत् । तर्पयेत् पितृदेवांश्च सो ऽग्निष्टोमफलं लभेत्

tatra tīrthe naro bhaktyā gatvā snānaṃ samācaret / tarpayet pitṛdevāṃśca so 'gniṣṭomaphalaṃ labhet

Sanskrit only: no published translation is held for this verse.

अग्निप्रवेशं यः कुर्यात्तस्मिंस् तीर्थे नराधिप । द्योतयन्वै दिशः सर्वा अग्निलोकं स गच्छति

agnipraveśaṃ yaḥ kuryāttasmiṃs tīrthe narādhipa / dyotayanvai diśaḥ sarvā agnilokaṃ sa gacchati

Sanskrit only: no published translation is held for this verse.

यस्तत्तीर्थं समासाद्य त्यजतीह कलेवरम् । स गतो वारुणं लोकमित्येवं शङ्करो ऽब्रवीत्

yastattīrthaṃ samāsādya tyajatīha kalevaram / sa gato vāruṇaṃ lokamityevaṃ śaṅkaro 'bravīt

Sanskrit only: no published translation is held for this verse.

तत्र तीर्थे तु यः कश्चित् संन्यासेन तनुं त्यजेत् । षष्टिवर्षसहस्राणि स्वर्गलोके महीयते

tatra tīrthe tu yaḥ kaścit saṃnyāsena tanuṃ tyajet / ṣaṣṭivarṣasahasrāṇi svargaloke mahīyate

Sanskrit only: no published translation is held for this verse.

अप्सरोगणसंकीर्णे दिव्यशब्दानुनादिते । उषित्वायाति मर्त्ये वै वेदवेदाङ्गविद् भवेत्

apsarogaṇasaṃkīrṇe divyaśabdānunādite / uṣitvāyāti martye vai vedavedāṅgavid bhavet

Sanskrit only: no published translation is held for this verse.

व्याधिशोकविनिर्मुक्तो धनकोटिपतिर्भवेत् । पुत्रदारसमोपेतो जीवेच्च शरदः शतम्

vyādhiśokavinirmukto dhanakoṭipatirbhavet / putradārasamopeto jīvecca śaradaḥ śatam

Sanskrit only: no published translation is held for this verse.

प्रातरुत्थाय यस्तत्र स्मरते भास्करं तदा । आजन्मजनितात् पापान् मुच्यते नात्र संशयः

prātarutthāya yastatra smarate bhāskaraṃ tadā / ājanmajanitāt pāpān mucyate nātra saṃśayaḥ

Sanskrit only: no published translation is held for this verse.