Revakhanda of the Vayupurana 41

ततो गच्छेच्च राजेन्द्र कुण्डलेश्वरमुत्तमम् । यत्र सिद्धो महायक्षः कुण्डधारो नृपोत्तम

tato gacchecca rājendra kuṇḍaleśvaramuttamam / yatra siddho mahāyakṣaḥ kuṇḍadhāro nṛpottama

Sanskrit only: no published translation is held for this verse.

तपः कृत्वा सुविपुलं सुरासुरभयंकरम् । पौलस्त्यमन्दिरे चैव चिक्रीड नृपसत्तम

tapaḥ kṛtvā suvipulaṃ surāsurabhayaṃkaram / paulastyamandire caiva cikrīḍa nṛpasattama

Sanskrit only: no published translation is held for this verse.

कस्मिन्युगे समुत्पन्नः कस्य पुत्रो महामतिः । तपस्तप्त्वा सुविपुलं तोषितो येन शङ्करः

kasminyuge samutpannaḥ kasya putro mahāmatiḥ / tapastaptvā suvipulaṃ toṣito yena śaṅkaraḥ

Sanskrit only: no published translation is held for this verse.

एतद्विस्तरतस्तात कथयस्व ममानघ । शृण्वतश्च न तृप्तिर् मे कथामृतमनुत्तमम्

etadvistaratastāta kathayasva mamānagha / śṛṇvataśca na tṛptir me kathāmṛtamanuttamam

Sanskrit only: no published translation is held for this verse.

त्रेतायुगे ब्रह्मसमः पौलस्त्योनाम विश्रवाः । तपः कृत्वा सुविपुलं भरद्वाजसुतोद्भवः

tretāyuge brahmasamaḥ paulastyonāma viśravāḥ / tapaḥ kṛtvā suvipulaṃ bharadvājasutodbhavaḥ

Sanskrit only: no published translation is held for this verse.

पुत्रं पौत्रगणैर् युक्तं पत्न्या भक्त्या सुतोषितः । धनदं जनयामास सर्वलक्षणलक्षितम्

putraṃ pautragaṇair yuktaṃ patnyā bhaktyā sutoṣitaḥ / dhanadaṃ janayāmāsa sarvalakṣaṇalakṣitam

Sanskrit only: no published translation is held for this verse.

जातमात्रं तु तं ज्ञात्वा ब्रह्मा लोकपितामहः । चकार नाम सुप्रीत ऋषिदेवसमन्वितः

jātamātraṃ tu taṃ jñātvā brahmā lokapitāmahaḥ / cakāra nāma suprīta ṛṣidevasamanvitaḥ

Sanskrit only: no published translation is held for this verse.

यस्माद् विश्रवसो जातो मम पौत्रत्वम् आगतः । तस्माद् वैश्रवणो नाम तव दत्तं मयानघ

yasmād viśravaso jāto mama pautratvam āgataḥ / tasmād vaiśravaṇo nāma tava dattaṃ mayānagha

Sanskrit only: no published translation is held for this verse.

तथा त्वं सर्वदेवानां धनगोप्ता भविष्यसि । चतुर्थो लोकपालानामक्षयश्चाव्ययो भुवि

tathā tvaṃ sarvadevānāṃ dhanagoptā bhaviṣyasi / caturtho lokapālānāmakṣayaścāvyayo bhuvi

Sanskrit only: no published translation is held for this verse.

तस्य भार्या महाराज ईश्वरीति च विश्रुता । यक्षो यक्षाधिपः श्रेष्ठस्तस्य कुण्डो ऽभवत् सुतः

tasya bhāryā mahārāja īśvarīti ca viśrutā / yakṣo yakṣādhipaḥ śreṣṭhastasya kuṇḍo 'bhavat sutaḥ

Sanskrit only: no published translation is held for this verse.

स च रूपं परं प्राप्य मातापित्रोरनुज्ञया । तपश् चचार विपुलं नर्मदातटमाश्रितः

sa ca rūpaṃ paraṃ prāpya mātāpitroranujñayā / tapaś cacāra vipulaṃ narmadātaṭamāśritaḥ

Sanskrit only: no published translation is held for this verse.

ग्रीष्मे पञ्चाग्निसंतप्तो वर्षासु स्थण्डिलेशयः । हेमन्ते जलमध्यस्थो वायुभक्षः शतं समाः

grīṣme pañcāgnisaṃtapto varṣāsu sthaṇḍileśayaḥ / hemante jalamadhyastho vāyubhakṣaḥ śataṃ samāḥ

Sanskrit only: no published translation is held for this verse.

एवं वर्षशते पूर्णे एकाङ्गुष्ठे ऽभवन् नृप । अस्थिभूतः परं तात ऊर्ध्वबाहुस्ततः परम्

evaṃ varṣaśate pūrṇe ekāṅguṣṭhe 'bhavan nṛpa / asthibhūtaḥ paraṃ tāta ūrdhvabāhustataḥ param

Sanskrit only: no published translation is held for this verse.

अतपच्च घृतश्वासः कुण्डलो भरतर्षभ । चतुर्थे वर्षशतके तुतोष वृषवाहनः

atapacca ghṛtaśvāsaḥ kuṇḍalo bharatarṣabha / caturthe varṣaśatake tutoṣa vṛṣavāhanaḥ

Sanskrit only: no published translation is held for this verse.

वरं वृणीष्व भो वत्स यत्ते मनसि रोचते । ददामि ते न सन्देहस्तपसा तोषितो ह्यहम्

varaṃ vṛṇīṣva bho vatsa yatte manasi rocate / dadāmi te na sandehastapasā toṣito hyaham

Sanskrit only: no published translation is held for this verse.

यक्षाधिपप्रसादेन तस्यैवानुचरः पुरे । विचरामि यथाकाममवध्यः सर्वशत्रुषु

yakṣādhipaprasādena tasyaivānucaraḥ pure / vicarāmi yathākāmamavadhyaḥ sarvaśatruṣu

Sanskrit only: no published translation is held for this verse.

तथेत्युक्त्वा महादेवः सर्वलोकनमस्कृतः । जगामाकाशमाविश्य कैलासं धरणीधरम्

tathetyuktvā mahādevaḥ sarvalokanamaskṛtaḥ / jagāmākāśamāviśya kailāsaṃ dharaṇīdharam

Sanskrit only: no published translation is held for this verse.

गते चादर्शनं देवे सो ऽपि यक्षो मुदान्वितः । स्थापयामास देवेशं कुण्डलेश्वरमुत्तमम्

gate cādarśanaṃ deve so 'pi yakṣo mudānvitaḥ / sthāpayāmāsa deveśaṃ kuṇḍaleśvaramuttamam

Sanskrit only: no published translation is held for this verse.

अलंकृत्वा जगन्नाथं पुष्पधूपानुलेपनैः । विमानैश्चामरैश्छत्रैस् तथा वै लिङ्गपूरणैः

alaṃkṛtvā jagannāthaṃ puṣpadhūpānulepanaiḥ / vimānaiścāmaraiśchatrais tathā vai liṅgapūraṇaiḥ

Sanskrit only: no published translation is held for this verse.

तर्पयित्वा द्विजान्सम्यगन्नपानादिभूषणैः । प्रीणयित्वा महादेवं ततः स्वभवनं ययौ

tarpayitvā dvijānsamyagannapānādibhūṣaṇaiḥ / prīṇayitvā mahādevaṃ tataḥ svabhavanaṃ yayau

Sanskrit only: no published translation is held for this verse.

तदाप्रभृति तत्तीर्थं त्रिषु लोकेषु विश्रुतम् । उत्तमं परमं पुण्यं कुण्डलेश्वरनामतः

tadāprabhṛti tattīrthaṃ triṣu lokeṣu viśrutam / uttamaṃ paramaṃ puṇyaṃ kuṇḍaleśvaranāmataḥ

Sanskrit only: no published translation is held for this verse.

तत्र तीर्थे तु यः कश्चिद् उपवासपरायणः । अर्चयेद् देवमीशानं सर्वपापैः प्रमुच्यते

tatra tīrthe tu yaḥ kaścid upavāsaparāyaṇaḥ / arcayed devamīśānaṃ sarvapāpaiḥ pramucyate

Sanskrit only: no published translation is held for this verse.

सुवर्णं रजतं वापि मणिं मौक्तिकमेव च । दद्याद् भोज्यं ब्राह्मणेभ्यः स सुखी मोदते दिवि

suvarṇaṃ rajataṃ vāpi maṇiṃ mauktikameva ca / dadyād bhojyaṃ brāhmaṇebhyaḥ sa sukhī modate divi

Sanskrit only: no published translation is held for this verse.

तत्र तीर्थे तु यः स्नात्वा ऋग्यजुःसामगो ऽपि वा । ऋचमेकां जपित्वा तु सकलं फलमश्नुते

tatra tīrthe tu yaḥ snātvā ṛgyajuḥsāmago 'pi vā / ṛcamekāṃ japitvā tu sakalaṃ phalamaśnute

Sanskrit only: no published translation is held for this verse.

गां प्रयच्छति विप्रेभ्यस्तत्फलं शृणु पाण्डव । यावन्ति तस्या रोमाणि तत्प्रसूतिकुलेषु च

gāṃ prayacchati viprebhyastatphalaṃ śṛṇu pāṇḍava / yāvanti tasyā romāṇi tatprasūtikuleṣu ca

Sanskrit only: no published translation is held for this verse.

तावद्वर्षसहस्राणि स्वर्गलोके महीयते । स्वर्गे वासो भवेत्तस्य पुत्रपौत्रैः समन्वितः

tāvadvarṣasahasrāṇi svargaloke mahīyate / svarge vāso bhavettasya putrapautraiḥ samanvitaḥ

Sanskrit only: no published translation is held for this verse.

तावन्ति वर्षाणि महानुभावः स्वर्गे वसेत् पुत्रपौत्रैश्च सार्द्धम् । तत्रान्नदो याति महेशलोकमसंख्यवर्षाणि न संशयो ऽत्र

tāvanti varṣāṇi mahānubhāvaḥ svarge vaset putrapautraiśca sārddham / tatrānnado yāti maheśalokamasaṃkhyavarṣāṇi na saṃśayo 'tra

Sanskrit only: no published translation is held for this verse.

स वै सुखी मोदते स्वर्गलोके गन्धर्वसिद्धाप्सरःसम्प्रगीते । एवं तु ते धर्मसुत प्रभावस्तीर्थस्य सर्वः कथितश्च पार्थ

sa vai sukhī modate svargaloke gandharvasiddhāpsaraḥsampragīte / evaṃ tu te dharmasuta prabhāvastīrthasya sarvaḥ kathitaśca pārtha

Sanskrit only: no published translation is held for this verse.

श्रुत्वा स्तुवन्मुच्यते सर्वपापैः पुनस्त्रिलोकीम् इह तत्प्रभावात्

śrutvā stuvanmucyate sarvapāpaiḥ punastrilokīm iha tatprabhāvāt

Sanskrit only: no published translation is held for this verse.