Ṛgveda Saṃhitā 1.179

पूर्वीर् अहं शरदः शश्रमाणा दोषा वस्तोर् उषसो जरयन्तीः । मिनाति श्रियं जरिमा तनूनाम् अप्य् ऊ नु पत्नीर् वृषणो जगम्युः ॥

pūrvīr ahaṃ śaradaḥ śaśramāṇā doṣā vastor uṣaso jarayantīḥ | mināti śriyaṃ jarimā tanūnām apy ū nu patnīr vṛṣaṇo jagamyuḥ ||

Sanskrit only: no published translation is held for this verse.

ये चिद् धि पूर्व ऋतसाप आसन् साकं देवेभिर् अवदन्न् ऋतानि । ते चिद् अवासुर् नह्य् अन्तम् आपुः सम् ऊ नु पत्नीर् वृषभिर् जगम्युः ॥

ye cid dhi pūrva ṛtasāpa āsan sākaṃ devebhir avadann ṛtāni | te cid avāsur nahy antam āpuḥ sam ū nu patnīr vṛṣabhir jagamyuḥ ||

Sanskrit only: no published translation is held for this verse.

न मृषा श्रान्तं यद् अवन्ति देवा विश्वा इत् स्पृधो अभ्य् अश्नवाव । जयावेद् अत्र शतनीथम् आजिं यत् सम्यञ्चा मिथुनाव् अभ्य् अजाव ॥

na mṛṣā śrāntaṃ yad avanti devā viśvā it spṛdho abhy aśnavāva | jayāved atra śatanītham ājiṃ yat samyañcā mithunāv abhy ajāva ||

Sanskrit only: no published translation is held for this verse.

नदस्य मा रुधतः काम आगन्न् इत आजातो अमुतः कुतश् चित् । लोपामुद्रा वृषणं नी रिणाति धीरम् अधीरा धयति श्वसन्तम् ॥

nadasya mā rudhataḥ kāma āgann ita ājāto amutaḥ kutaś cit | lopāmudrā vṛṣaṇaṃ nī riṇāti dhīram adhīrā dhayati śvasantam ||

Sanskrit only: no published translation is held for this verse.

इमं नु सोमम् अन्तितो हृत्सु पीतम् उप ब्रुवे । यत् सीम् आगश् चकृमा तत् सु मृळतु पुलुकामो हि मर्त्यः ॥

imaṃ nu somam antito hṛtsu pītam upa bruve | yat sīm āgaś cakṛmā tat su mṛḷatu pulukāmo hi martyaḥ ||

Sanskrit only: no published translation is held for this verse.

अगस्त्यः खनमानः खनित्रैः प्रजाम् अपत्यम् बलम् इच्छमानः । उभौ वर्णाव् ऋषिर् उग्रः पुपोष सत्या देवेष्व् आशिषो जगाम ॥

agastyaḥ khanamānaḥ khanitraiḥ prajām apatyam balam icchamānaḥ | ubhau varṇāv ṛṣir ugraḥ pupoṣa satyā deveṣv āśiṣo jagāma ||

Sanskrit only: no published translation is held for this verse.