Ṛgveda Saṃhitā 1.190

अनर्वाणं वृषभम् मन्द्रजिह्वम् बृहस्पतिं वर्धया नव्यम् अर्कैः । गाथान्यः सुरुचो यस्य देवा आशृण्वन्ति नवमानस्य मर्ताः ॥

anarvāṇaṃ vṛṣabham mandrajihvam bṛhaspatiṃ vardhayā navyam arkaiḥ | gāthānyaḥ suruco yasya devā āśṛṇvanti navamānasya martāḥ ||

Sanskrit only: no published translation is held for this verse.

तम् ऋत्विया उप वाचः सचन्ते सर्गो न यो देवयताम् असर्जि । बृहस्पतिः स ह्य् अञ्जो वरांसि विभ्वाभवत् सम् ऋते मातरिश्वा ॥

tam ṛtviyā upa vācaḥ sacante sargo na yo devayatām asarji | bṛhaspatiḥ sa hy añjo varāṃsi vibhvābhavat sam ṛte mātariśvā ||

Sanskrit only: no published translation is held for this verse.

उपस्तुतिं नमस उद्यतिं च श्लोकं यंसत् सवितेव प्र बाहू । अस्य क्रत्वाहन्यो यो अस्ति मृगो न भीमो अरक्षसस् तुविष्मान् ॥

upastutiṃ namasa udyatiṃ ca ślokaṃ yaṃsat saviteva pra bāhū | asya kratvāhanyo yo asti mṛgo na bhīmo arakṣasas tuviṣmān ||

Sanskrit only: no published translation is held for this verse.

अस्य श्लोको दिवीयते पृथिव्याम् अत्यो न यंसद् यक्षभृद् विचेताः । मृगाणां न हेतयो यन्ति चेमा बृहस्पतेर् अहिमायां अभि द्यून् ॥

asya śloko divīyate pṛthivyām atyo na yaṃsad yakṣabhṛd vicetāḥ | mṛgāṇāṃ na hetayo yanti cemā bṛhaspater ahimāyāṃ abhi dyūn ||

Sanskrit only: no published translation is held for this verse.

ये त्वा देवोस्रिकम् मन्यमानाः पापा भद्रम् उपजीवन्ति पज्राः । न दूढ्ये अनु ददासि वामम् बृहस्पते चयस इत् पियारुम् ॥

ye tvā devosrikam manyamānāḥ pāpā bhadram upajīvanti pajrāḥ | na dūḍhye anu dadāsi vāmam bṛhaspate cayasa it piyārum ||

Sanskrit only: no published translation is held for this verse.

सुप्रैतुः सूयवसो न पन्था दुर्नियन्तुः परिप्रीतो न मित्रः । अनर्वाणो अभि ये चक्षते नो ऽपीवृता अपोर्णुवन्तो अस्थुः ॥

supraituḥ sūyavaso na panthā durniyantuḥ pariprīto na mitraḥ | anarvāṇo abhi ye cakṣate no 'pīvṛtā aporṇuvanto asthuḥ ||

Sanskrit only: no published translation is held for this verse.

सं यं स्तुभो ऽवनयो न यन्ति समुद्रं न स्रवतो रोधचक्राः । स विद्वां उभयं चष्टे अन्तर् बृहस्पतिस् तर आपश् च गृध्रः ॥

saṃ yaṃ stubho 'vanayo na yanti samudraṃ na sravato rodhacakrāḥ | sa vidvāṃ ubhayaṃ caṣṭe antar bṛhaspatis tara āpaś ca gṛdhraḥ ||

Sanskrit only: no published translation is held for this verse.

एवा महस् तुविजातस् तुविष्मान् बृहस्पतिर् वृषभो धायि देवः । स न स्तुतो वीरवद् धातु गोमद् विद्यामेषं वृजनं जीरदानुम् ॥

evā mahas tuvijātas tuviṣmān bṛhaspatir vṛṣabho dhāyi devaḥ | sa na stuto vīravad dhātu gomad vidyāmeṣaṃ vṛjanaṃ jīradānum ||

Sanskrit only: no published translation is held for this verse.