Library·Ṛgveda Saṃhitā·1·1.91
त्वं सोम प्र चिकितो मनीषा त्वं रजिष्ठम् अनु नेषि पन्थाम् । तव प्रणीती पितरो न इन्दो देवेषु रत्नम् अभजन्त धीराः ॥
tvaṃ soma pra cikito manīṣā tvaṃ rajiṣṭham anu neṣi panthām | tava praṇītī pitaro na indo deveṣu ratnam abhajanta dhīrāḥ ||
Sanskrit only: no published translation is held for this verse.
त्वं सोम क्रतुभिः सुक्रतुर् भूस् त्वं दक्षैः सुदक्षो विश्ववेदाः । त्वं वृषा वृषत्वेभिर् महित्वा द्युम्नेभिर् द्युम्न्य् अभवो नृचक्षाः ॥
tvaṃ soma kratubhiḥ sukratur bhūs tvaṃ dakṣaiḥ sudakṣo viśvavedāḥ | tvaṃ vṛṣā vṛṣatvebhir mahitvā dyumnebhir dyumny abhavo nṛcakṣāḥ ||
Sanskrit only: no published translation is held for this verse.
राज्ञो नु ते वरुणस्य व्रतानि बृहद् गभीरं तव सोम धाम । शुचिष् ट्वम् असि प्रियो न मित्रो दक्षाय्यो अर्यमेवासि सोम ॥
rājño nu te varuṇasya vratāni bṛhad gabhīraṃ tava soma dhāma | śuciṣ ṭvam asi priyo na mitro dakṣāyyo aryamevāsi soma ||
Sanskrit only: no published translation is held for this verse.
या ते धामानि दिवि या पृथिव्यां या पर्वतेष्व् ओषधीष्व् अप्सु । तेभिर् नो विश्वैः सुमना अहेळन् राजन् सोम प्रति हव्या गृभाय ॥
yā te dhāmāni divi yā pṛthivyāṃ yā parvateṣv oṣadhīṣv apsu | tebhir no viśvaiḥ sumanā aheḷan rājan soma prati havyā gṛbhāya ||
Sanskrit only: no published translation is held for this verse.
त्वं सोमासि सत्पतिस् त्वं राजोत वृत्रहा । त्वम् भद्रो असि क्रतुः ॥
tvaṃ somāsi satpatis tvaṃ rājota vṛtrahā | tvam bhadro asi kratuḥ ||
Sanskrit only: no published translation is held for this verse.
त्वं च सोम नो वशो जीवातुं न मरामहे । प्रियस्तोत्रो वनस्पतिः ॥
tvaṃ ca soma no vaśo jīvātuṃ na marāmahe | priyastotro vanaspatiḥ ||
Sanskrit only: no published translation is held for this verse.
त्वं सोम महे भगं त्वं यून ऋतायते । दक्षं दधासि जीवसे ॥
tvaṃ soma mahe bhagaṃ tvaṃ yūna ṛtāyate | dakṣaṃ dadhāsi jīvase ||
Sanskrit only: no published translation is held for this verse.
त्वं नः सोम विश्वतो रक्षा राजन्न् अघायतः । न रिष्येत् त्वावतः सखा ॥
tvaṃ naḥ soma viśvato rakṣā rājann aghāyataḥ | na riṣyet tvāvataḥ sakhā ||
Sanskrit only: no published translation is held for this verse.
सोम यास् ते मयोभुव ऊतयः सन्ति दाशुषे । ताभिर् नो ऽविता भव ॥
soma yās te mayobhuva ūtayaḥ santi dāśuṣe | tābhir no 'vitā bhava ||
Sanskrit only: no published translation is held for this verse.
इमं यज्ञम् इदं वचो जुजुषाण उपागहि । सोम त्वं नो वृधे भव ॥
imaṃ yajñam idaṃ vaco jujuṣāṇa upāgahi | soma tvaṃ no vṛdhe bhava ||
Sanskrit only: no published translation is held for this verse.
सोम गीर्भिष् ट्वा वयं वर्धयामो वचोविदः । सुमृळीको न आ विश ॥
soma gīrbhiṣ ṭvā vayaṃ vardhayāmo vacovidaḥ | sumṛḷīko na ā viśa ||
Sanskrit only: no published translation is held for this verse.
गयस्फानो अमीवहा वसुवित् पुष्टिवर्धनः । सुमित्रः सोम नो भव ॥
gayasphāno amīvahā vasuvit puṣṭivardhanaḥ | sumitraḥ soma no bhava ||
Sanskrit only: no published translation is held for this verse.
सोम रारन्धि नो हृदि गावो न यवसेष्व् आ । मर्य इव स्व ओक्ये ॥
soma rārandhi no hṛdi gāvo na yavaseṣv ā | marya iva sva okye ||
Sanskrit only: no published translation is held for this verse.
यः सोम सख्ये तव रारणद् देव मर्त्यः । तं दक्षः सचते कविः ॥
yaḥ soma sakhye tava rāraṇad deva martyaḥ | taṃ dakṣaḥ sacate kaviḥ ||
Sanskrit only: no published translation is held for this verse.
उरुष्या णो अभिशस्तेः सोम नि पाह्य् अंहसः । सखा सुशेव एधि नः ॥
uruṣyā ṇo abhiśasteḥ soma ni pāhy aṃhasaḥ | sakhā suśeva edhi naḥ ||
Sanskrit only: no published translation is held for this verse.
आ प्यायस्व सम् एतु ते विश्वतः सोम वृष्ण्यम् । भवा वाजस्य संगथे ॥
ā pyāyasva sam etu te viśvataḥ soma vṛṣṇyam | bhavā vājasya saṃgathe ||
Sanskrit only: no published translation is held for this verse.
आ प्यायस्व मदिन्तम सोम विश्वेभिर् अंशुभिः । भवा नः सुश्रवस्तमः सखा वृधे ॥
ā pyāyasva madintama soma viśvebhir aṃśubhiḥ | bhavā naḥ suśravastamaḥ sakhā vṛdhe ||
Sanskrit only: no published translation is held for this verse.
सं ते पयांसि सम् उ यन्तु वाजाः सं वृष्ण्यान्य् अभिमातिषाहः । आप्यायमानो अमृताय सोम दिवि श्रवांस्य् उत्तमानि धिष्व ॥
saṃ te payāṃsi sam u yantu vājāḥ saṃ vṛṣṇyāny abhimātiṣāhaḥ | āpyāyamāno amṛtāya soma divi śravāṃsy uttamāni dhiṣva ||
Sanskrit only: no published translation is held for this verse.
या ते धामानि हविषा यजन्ति ता ते विश्वा परिभूर् अस्तु यज्ञम् । गयस्फानः प्रतरणः सुवीरो ऽवीरहा प्र चरा सोम दुर्यान् ॥
yā te dhāmāni haviṣā yajanti tā te viśvā paribhūr astu yajñam | gayasphānaḥ prataraṇaḥ suvīro 'vīrahā pra carā soma duryān ||
Sanskrit only: no published translation is held for this verse.
सोमो धेनुं सोमो अर्वन्तम् आशुं सोमो वीरं कर्मण्यं ददाति । सादन्यं विदथ्यं सभेयम् पितृश्रवणं यो ददाशद् अस्मै ॥
somo dhenuṃ somo arvantam āśuṃ somo vīraṃ karmaṇyaṃ dadāti | sādanyaṃ vidathyaṃ sabheyam pitṛśravaṇaṃ yo dadāśad asmai ||
Sanskrit only: no published translation is held for this verse.
अषाळ्हं युत्सु पृतनासु पप्रिं स्वर्षाम् अप्सां वृजनस्य गोपाम् । भरेषुजां सुक्षितिं सुश्रवसं जयन्तं त्वाम् अनु मदेम सोम ॥
aṣāḷhaṃ yutsu pṛtanāsu papriṃ svarṣām apsāṃ vṛjanasya gopām | bhareṣujāṃ sukṣitiṃ suśravasaṃ jayantaṃ tvām anu madema soma ||
Sanskrit only: no published translation is held for this verse.
त्वम् इमा ओषधीः सोम विश्वास् त्वम् अपो अजनयस् त्वं गाः । त्वम् आ ततन्थोर्व् अन्तरिक्षं त्वं ज्योतिषा वि तमो ववर्थ ॥
tvam imā oṣadhīḥ soma viśvās tvam apo ajanayas tvaṃ gāḥ | tvam ā tatanthorv antarikṣaṃ tvaṃ jyotiṣā vi tamo vavartha ||
Sanskrit only: no published translation is held for this verse.
देवेन नो मनसा देव सोम रायो भागं सहसावन्न् अभि युध्य । मा त्वा तनद् ईशिषे वीर्यस्योभयेभ्यः प्र चिकित्सा गविष्टौ ॥
devena no manasā deva soma rāyo bhāgaṃ sahasāvann abhi yudhya | mā tvā tanad īśiṣe vīryasyobhayebhyaḥ pra cikitsā gaviṣṭau ||
Sanskrit only: no published translation is held for this verse.