Library·Ṛgveda Saṃhitā·1·1.93
अग्नीषोमाव् इमं सु मे शृणुतं वृषणा हवम् । प्रति सूक्तानि हर्यतम् भवतं दाशुषे मयः ॥
agnīṣomāv imaṃ su me śṛṇutaṃ vṛṣaṇā havam | prati sūktāni haryatam bhavataṃ dāśuṣe mayaḥ ||
Agni and Soma, mighty Pair, graciously hearken to my call, Accept in friendly wise my hymn, and prosper him who offers gifts.
Translated by Ralph T. H. Griffith (1896)
अग्नीषोमा यो अद्य वाम् इदं वचः सपर्यति । तस्मै धत्तं सुवीर्यं गवाम् पोषं स्वश्व्यम् ॥
agnīṣomā yo adya vām idaṃ vacaḥ saparyati | tasmai dhattaṃ suvīryaṃ gavām poṣaṃ svaśvyam ||
The man who honours you to-day, Agni and Soma, with this hymn, Bestow on him heroic strength, increase of kine, and noble steeds.
Translated by Ralph T. H. Griffith (1896)
अग्नीषोमा य आहुतिं यो वां दाशाद् धविष्कृतिम् । स प्रजया सुवीर्यं विश्वम् आयुर् व्य् अश्नवत् ॥
agnīṣomā ya āhutiṃ yo vāṃ dāśād dhaviṣkṛtim | sa prajayā suvīryaṃ viśvam āyur vy aśnavat ||
The man who offers holy oil and burnt oblations unto you, Agni and Soma, shall enjoy great strength, with offspring, all his life.
Translated by Ralph T. H. Griffith (1896)
अग्नीषोमा चेति तद् वीर्यं वां यद् अमुष्णीतम् अवसम् पणिं गाः । अवातिरतम् बृसयस्य शेषो ऽविन्दतं ज्योतिर् एकम् बहुभ्यः ॥
agnīṣomā ceti tad vīryaṃ vāṃ yad amuṣṇītam avasam paṇiṃ gāḥ | avātiratam bṛsayasya śeṣo 'vindataṃ jyotir ekam bahubhyaḥ ||
Agni and Soma, famed is that your. prowess wherewith ye stole the kine, his food, from Pani. Ye caused the brood of Brsaya to perish; ye found the light, the single light for many.
Translated by Ralph T. H. Griffith (1896)
युवम् एतानि दिवि रोचनान्य् अग्निश् च सोम सक्रतू अधत्तम् । युवं सिन्धूंर् अभिशस्तेर् अवद्याद् अग्नीषोमाव् अमुञ्चतं गृभीतान् ॥
yuvam etāni divi rocanāny agniś ca soma sakratū adhattam | yuvaṃ sindhūṃr abhiśaster avadyād agnīṣomāv amuñcataṃ gṛbhītān ||
Agni and Soma, joined in operation ye have set up the shining lights in heaven. From curse and from reproach, Agni and Soma, ye freed the rivers that were bound in fetters.
Translated by Ralph T. H. Griffith (1896)
आन्यं दिवो मातरिश्वा जभारामथ्नाद् अन्यम् परि श्येनो अद्रेः । अग्नीषोमा ब्रह्मणा वावृधानोरुं यज्ञाय चक्रथुर् उ लोकम् ॥
ānyaṃ divo mātariśvā jabhārāmathnād anyam pari śyeno adreḥ | agnīṣomā brahmaṇā vāvṛdhānoruṃ yajñāya cakrathur u lokam ||
One of you Matarisvan brought from heaven, the Falcon rent the other from the mountain. Strengthened by holy prayer Agni and Soma have made us ample room for sacrificing.
Translated by Ralph T. H. Griffith (1896)
अग्नीषोमा हविषः प्रस्थितस्य वीतं हर्यतं वृषणा जुषेथाम् । सुशर्माणा स्ववसा हि भूतम् अथा धत्तं यजमानाय शं योः ॥
agnīṣomā haviṣaḥ prasthitasya vītaṃ haryataṃ vṛṣaṇā juṣethām | suśarmāṇā svavasā hi bhūtam athā dhattaṃ yajamānāya śaṃ yoḥ ||
Taste, Agni, Soma, this prepared oblation; accept it, Mighty Ones, and let it please you. Vouchsafe us good protection and kind favour: grant to the sacrificer health and riches.
Translated by Ralph T. H. Griffith (1896)
यो अग्नीषोमा हविषा सपर्याद् देवद्रीचा मनसा यो घृतेन । तस्य व्रतं रक्षतम् पातम् अंहसो विशे जनाय महि शर्म यच्छतम् ॥
yo agnīṣomā haviṣā saparyād devadrīcā manasā yo ghṛtena | tasya vrataṃ rakṣatam pātam aṃhaso viśe janāya mahi śarma yacchatam ||
Whoso with oil and poured oblation honours, with God-devoted heart, Agni and Soma,-- Protect his sacrifice, preserve him from distress, grant to the sacrificer great felicity.
Translated by Ralph T. H. Griffith (1896)
अग्नीषोमा सवेदसा सहूती वनतं गिरः । सं देवत्रा बभूवथुः ॥
agnīṣomā savedasā sahūtī vanataṃ giraḥ | saṃ devatrā babhūvathuḥ ||
Invoked together, mates in wealth, Agni-Soma, accept our hymns: Together be among the Gods.
Translated by Ralph T. H. Griffith (1896)
अग्नीषोमाव् अनेन वां यो वां घृतेन दाशति । तस्मै दीदयतम् बृहत् ॥
agnīṣomāv anena vāṃ yo vāṃ ghṛtena dāśati | tasmai dīdayatam bṛhat ||
Agni and Soma, unto him who worships you with holy oil Shine forth an ample recompense.
Translated by Ralph T. H. Griffith (1896)
अग्नीषोमाव् इमानि नो युवं हव्या जुजोषतम् । आ यातम् उप नः सचा ॥
agnīṣomāv imāni no yuvaṃ havyā jujoṣatam | ā yātam upa naḥ sacā ||
Agni and Soma, be ye pleased with these oblations brought to you, And come, together, nigh to us.
Translated by Ralph T. H. Griffith (1896)
अग्नीषोमा पिपृतम् अर्वतो न आ प्यायन्ताम् उस्रिया हव्यसूदः । अस्मे बलानि मघवत्सु धत्तं कृणुतं नो अध्वरं श्रुष्टिमन्तम् ॥
agnīṣomā pipṛtam arvato na ā pyāyantām usriyā havyasūdaḥ | asme balāni maghavatsu dhattaṃ kṛṇutaṃ no adhvaraṃ śruṣṭimantam ||
Agni and Soma, cherish well our horses, and let our cows be fat who yield oblations. Grant power to us and to our wealthy patrons, and cause our holy rites to be successful.
Translated by Ralph T. H. Griffith (1896)