Ṛgveda Saṃhitā 10.126

न तम् अंहो न दुरितं देवासो अष्ट मर्त्यम् । सजोषसो यम् अर्यमा मित्रो नयन्ति वरुणो अति द्विषः ॥

na tam aṃho na duritaṃ devāso aṣṭa martyam | sajoṣaso yam aryamā mitro nayanti varuṇo ati dviṣaḥ ||

तद् धि वयं वृणीमहे वरुण मित्रार्यमन् । येना निर् अंहसो यूयम् पाथ नेथा च मर्त्यम् अति द्विषः ॥

tad dhi vayaṃ vṛṇīmahe varuṇa mitrāryaman | yenā nir aṃhaso yūyam pātha nethā ca martyam ati dviṣaḥ ||

ते नूनं नो ऽयम् ऊतये वरुणो मित्रो अर्यमा । नयिष्ठा उ नो नेषणि पर्षिष्ठा उ नः पर्षण्य् अति द्विषः ॥

te nūnaṃ no 'yam ūtaye varuṇo mitro aryamā | nayiṣṭhā u no neṣaṇi parṣiṣṭhā u naḥ parṣaṇy ati dviṣaḥ ||

यूयं विश्वम् परि पाथ वरुणो मित्रो अर्यमा । युष्माकं शर्मणि प्रिये स्याम सुप्रणीतयो ऽति द्विषः ॥

yūyaṃ viśvam pari pātha varuṇo mitro aryamā | yuṣmākaṃ śarmaṇi priye syāma supraṇītayo 'ti dviṣaḥ ||

आदित्यासो अति स्रिधो वरुणो मित्रो अर्यमा । उग्रम् मरुद्भी रुद्रं हुवेमेन्द्रम् अग्निं स्वस्तये ऽति द्विषः ॥

ādityāso ati sridho varuṇo mitro aryamā | ugram marudbhī rudraṃ huvemendram agniṃ svastaye 'ti dviṣaḥ ||

नेतार ऊ षु णस् तिरो वरुणो मित्रो अर्यमा । अति विश्वानि दुरिता राजानश् चर्षणीनाम् अति द्विषः ॥

netāra ū ṣu ṇas tiro varuṇo mitro aryamā | ati viśvāni duritā rājānaś carṣaṇīnām ati dviṣaḥ ||

शुनम् अस्मभ्यम् ऊतये वरुणो मित्रो अर्यमा । शर्म यच्छन्तु सप्रथ आदित्यासो यद् ईमहे अति द्विषः ॥

śunam asmabhyam ūtaye varuṇo mitro aryamā | śarma yacchantu sapratha ādityāso yad īmahe ati dviṣaḥ ||

यथा ह त्यद् वसवो गौर्यं चित् पदि षिताम् अमुञ्चता यजत्राः । एवो ष्व् अस्मन् मुञ्चता व्य् अंहः प्र तार्य् अग्ने प्रतरं न आयुः ॥

yathā ha tyad vasavo gauryaṃ cit padi ṣitām amuñcatā yajatrāḥ | evo ṣv asman muñcatā vy aṃhaḥ pra tāry agne prataraṃ na āyuḥ ||