Library·Ṛgveda Saṃhitā·10·10.132
ईजानम् इद् द्यौर् गूर्तावसुर् ईजानम् भूमिर् अभि प्रभूषणि । ईजानं देवाव् अश्विनाव् अभि सुम्नैर् अवर्धताम् ॥
ījānam id dyaur gūrtāvasur ījānam bhūmir abhi prabhūṣaṇi | ījānaṃ devāv aśvināv abhi sumnair avardhatām ||
Sanskrit only: no published translation is held for this verse.
ता वाम् मित्रावरुणा धारयत्क्षिती सुषुम्नेषितत्वता यजामसि । युवोः क्राणाय सख्यैर् अभि ष्याम रक्षसः ॥
tā vām mitrāvaruṇā dhārayatkṣitī suṣumneṣitatvatā yajāmasi | yuvoḥ krāṇāya sakhyair abhi ṣyāma rakṣasaḥ ||
Sanskrit only: no published translation is held for this verse.
अधा चिन् नु यद् दिधिषामहे वाम् अभि प्रियं रेक्णः पत्यमानाः । दद्वां वा यत् पुष्यति रेक्णः सम् व् आरन् नकिर् अस्य मघानि ॥
adhā cin nu yad didhiṣāmahe vām abhi priyaṃ rekṇaḥ patyamānāḥ | dadvāṃ vā yat puṣyati rekṇaḥ sam v āran nakir asya maghāni ||
Sanskrit only: no published translation is held for this verse.
असाव् अन्यो असुर सूयत द्यौस् त्वं विश्वेषां वरुणासि राजा । मूर्धा रथस्य चाकन् नैतावतैनसान्तकध्रुक् ॥
asāv anyo asura sūyata dyaus tvaṃ viśveṣāṃ varuṇāsi rājā | mūrdhā rathasya cākan naitāvatainasāntakadhruk ||
Sanskrit only: no published translation is held for this verse.
अस्मिन् स्व् एतच् छकपूत एनो हिते मित्रे निगतान् हन्ति वीरान् । अवोर् वा यद् धात् तनूष्व् अवः प्रियासु यज्ञियास्व् अर्वा ॥
asmin sv etac chakapūta eno hite mitre nigatān hanti vīrān | avor vā yad dhāt tanūṣv avaḥ priyāsu yajñiyāsv arvā ||
Sanskrit only: no published translation is held for this verse.
युवोर् हि मातादितिर् विचेतसा द्यौर् न भूमिः पयसा पुपूतनि । अव प्रिया दिदिष्टन सूरो निनिक्त रश्मिभिः ॥
yuvor hi mātāditir vicetasā dyaur na bhūmiḥ payasā pupūtani | ava priyā didiṣṭana sūro ninikta raśmibhiḥ ||
Sanskrit only: no published translation is held for this verse.
युवं ह्य् अप्नराजाव् असीदतं तिष्ठद् रथं न धूर्षदं वनर्षदम् । ता नः कणूकयन्तीर् नृमेधस् तत्रे अंहसः सुमेधस् तत्रे अंहसः ॥
yuvaṃ hy apnarājāv asīdataṃ tiṣṭhad rathaṃ na dhūrṣadaṃ vanarṣadam | tā naḥ kaṇūkayantīr nṛmedhas tatre aṃhasaḥ sumedhas tatre aṃhasaḥ ||
Sanskrit only: no published translation is held for this verse.