Library·Ṛgveda Saṃhitā·10·10.61
इदम् इत्था रौद्रं गूर्तवचा ब्रह्म क्रत्वा शच्याम् अन्तर् आजौ । क्राणा यद् अस्य पितरा मंहनेष्ठाः पर्षत् पक्थे अहन्न् आ सप्त होतॄन् ॥
idam itthā raudraṃ gūrtavacā brahma kratvā śacyām antar ājau | krāṇā yad asya pitarā maṃhaneṣṭhāḥ parṣat pakthe ahann ā sapta hotṝn ||
Sanskrit only: no published translation is held for this verse.
स इद् दानाय दभ्याय वन्वञ् च्यवानः सूदैर् अमिमीत वेदिम् । तूर्वयाणो गूर्तवचस्तमः क्षोदो न रेत इतऊति सिञ्चत् ॥
sa id dānāya dabhyāya vanvañ cyavānaḥ sūdair amimīta vedim | tūrvayāṇo gūrtavacastamaḥ kṣodo na reta itaūti siñcat ||
Sanskrit only: no published translation is held for this verse.
मनो न येषु हवनेषु तिग्मं विपः शच्या वनुथो द्रवन्ता । आ यः शर्याभिस् तुविनृम्णो अस्याश्रीणीतादिशं गभस्तौ ॥
mano na yeṣu havaneṣu tigmaṃ vipaḥ śacyā vanutho dravantā | ā yaḥ śaryābhis tuvinṛmṇo asyāśrīṇītādiśaṃ gabhastau ||
Sanskrit only: no published translation is held for this verse.
कृष्णा यद् गोष्व् अरुणीषु सीदद् दिवो नपाताश्विना हुवे वाम् । वीतम् मे यज्ञम् आ गतम् मे अन्नं ववन्वांसा नेषम् अस्मृतध्रू ॥
kṛṣṇā yad goṣv aruṇīṣu sīdad divo napātāśvinā huve vām | vītam me yajñam ā gatam me annaṃ vavanvāṃsā neṣam asmṛtadhrū ||
Sanskrit only: no published translation is held for this verse.
प्रथिष्ट यस्य वीरकर्मम् इष्णद् अनुष्ठितं नु नर्यो अपौहत् । पुनस् तद् आ वृहति यत् कनाया दुहितुर् आ अनुभृतम् अनर्वा ॥
prathiṣṭa yasya vīrakarmam iṣṇad anuṣṭhitaṃ nu naryo apauhat | punas tad ā vṛhati yat kanāyā duhitur ā anubhṛtam anarvā ||
Sanskrit only: no published translation is held for this verse.
मध्या यत् कर्त्वम् अभवद् अभीके कामं कृण्वाने पितरि युवत्याम् । मनानग् रेतो जहतुर् वियन्ता सानौ निषिक्तं सुकृतस्य योनौ ॥
madhyā yat kartvam abhavad abhīke kāmaṃ kṛṇvāne pitari yuvatyām | manānag reto jahatur viyantā sānau niṣiktaṃ sukṛtasya yonau ||
Sanskrit only: no published translation is held for this verse.
पिता यत् स्वां दुहितरम् अधिष्कन् क्ष्मया रेतः संजग्मानो नि षिञ्चत् । स्वाध्यो ऽजनयन् ब्रह्म देवा वास्तोष् पतिं व्रतपां निर् अतक्षन् ॥
pitā yat svāṃ duhitaram adhiṣkan kṣmayā retaḥ saṃjagmāno ni ṣiñcat | svādhyo 'janayan brahma devā vāstoṣ patiṃ vratapāṃ nir atakṣan ||
Sanskrit only: no published translation is held for this verse.
स ईं वृषा न फेनम् अस्यद् आजौ स्मद् आ परैद् अप दभ्रचेताः । सरत् पदा न दक्षिणा परावृङ् न ता नु मे पृशन्यो जगृभ्रे ॥
sa īṃ vṛṣā na phenam asyad ājau smad ā paraid apa dabhracetāḥ | sarat padā na dakṣiṇā parāvṛṅ na tā nu me pṛśanyo jagṛbhre ||
Sanskrit only: no published translation is held for this verse.
मक्षू न वह्निः प्रजाया उपब्दिर् अग्निं न नग्न उप सीदद् ऊधः । सनितेध्मं सनितोत वाजं स धर्ता जज्ञे सहसा यवीयुत् ॥
makṣū na vahniḥ prajāyā upabdir agniṃ na nagna upa sīdad ūdhaḥ | sanitedhmaṃ sanitota vājaṃ sa dhartā jajñe sahasā yavīyut ||
Sanskrit only: no published translation is held for this verse.
मक्षू कनायाः सख्यं नवग्वा ऋतं वदन्त ऋतयुक्तिम् अग्मन् । द्विबर्हसो य उप गोपम् आगुर् अदक्षिणासो अच्युता दुदुक्षन् ॥
makṣū kanāyāḥ sakhyaṃ navagvā ṛtaṃ vadanta ṛtayuktim agman | dvibarhaso ya upa gopam āgur adakṣiṇāso acyutā dudukṣan ||
Sanskrit only: no published translation is held for this verse.
मक्षू कनायाः सख्यं नवीयो राधो न रेत ऋतम् इत् तुरण्यन् । शुचि यत् ते रेक्ण आयजन्त सबर्दुघायाः पय उस्रियायाः ॥
makṣū kanāyāḥ sakhyaṃ navīyo rādho na reta ṛtam it turaṇyan | śuci yat te rekṇa āyajanta sabardughāyāḥ paya usriyāyāḥ ||
Sanskrit only: no published translation is held for this verse.
पश्वा यत् पश्चा वियुता बुधन्तेति ब्रवीति वक्तरी रराणः । वसोर् वसुत्वा कारवो ऽनेहा विश्वं विवेष्टि द्रविणम् उप क्षु ॥
paśvā yat paścā viyutā budhanteti bravīti vaktarī rarāṇaḥ | vasor vasutvā kāravo 'nehā viśvaṃ viveṣṭi draviṇam upa kṣu ||
Sanskrit only: no published translation is held for this verse.
तद् इन् न्व् अस्य परिषद्वानो अग्मन् पुरू सदन्तो नार्षदम् बिभित्सन् । वि शुष्णस्य संग्रथितम् अनर्वा विदत् पुरुप्रजातस्य गुहा यत् ॥
tad in nv asya pariṣadvāno agman purū sadanto nārṣadam bibhitsan | vi śuṣṇasya saṃgrathitam anarvā vidat puruprajātasya guhā yat ||
Sanskrit only: no published translation is held for this verse.
भर्गो ह नामोत यस्य देवाः स्वर् ण ये त्रिषधस्थे निषेदुः । अग्निर् ह नामोत जातवेदाः श्रुधी नो होतर् ऋतस्य होताध्रुक् ॥
bhargo ha nāmota yasya devāḥ svar ṇa ye triṣadhasthe niṣeduḥ | agnir ha nāmota jātavedāḥ śrudhī no hotar ṛtasya hotādhruk ||
Sanskrit only: no published translation is held for this verse.
उत त्या मे रौद्राव् अर्चिमन्ता नासत्याव् इन्द्र गूर्तये यजध्यै । मनुष्वद् वृक्तबर्हिषे रराणा मन्दू हितप्रयसा विक्षु यज्यू ॥
uta tyā me raudrāv arcimantā nāsatyāv indra gūrtaye yajadhyai | manuṣvad vṛktabarhiṣe rarāṇā mandū hitaprayasā vikṣu yajyū ||
Sanskrit only: no published translation is held for this verse.
अयं स्तुतो राजा वन्दि वेधा अपश् च विप्रस् तरति स्वसेतुः । स कक्षीवन्तं रेजयत् सो अग्निं नेमिं न चक्रम् अर्वतो रघुद्रु ॥
ayaṃ stuto rājā vandi vedhā apaś ca vipras tarati svasetuḥ | sa kakṣīvantaṃ rejayat so agniṃ nemiṃ na cakram arvato raghudru ||
Sanskrit only: no published translation is held for this verse.
स द्विबन्धुर् वैतरणो यष्टा सबर्धुं धेनुम् अस्वं दुहध्यै । सं यन् मित्रावरुणा वृञ्ज उक्थैर् ज्येष्ठेभिर् अर्यमणं वरूथैः ॥
sa dvibandhur vaitaraṇo yaṣṭā sabardhuṃ dhenum asvaṃ duhadhyai | saṃ yan mitrāvaruṇā vṛñja ukthair jyeṣṭhebhir aryamaṇaṃ varūthaiḥ ||
Sanskrit only: no published translation is held for this verse.
तद्बन्धुः सूरिर् दिवि ते धियन्धा नाभानेदिष्ठो रपति प्र वेनन् । सा नो नाभिः परमास्य वा घाहं तत् पश्चा कतिथश् चिद् आस ॥
tadbandhuḥ sūrir divi te dhiyandhā nābhānediṣṭho rapati pra venan | sā no nābhiḥ paramāsya vā ghāhaṃ tat paścā katithaś cid āsa ||
Sanskrit only: no published translation is held for this verse.
इयम् मे नाभिर् इह मे सधस्थम् इमे मे देवा अयम् अस्मि सर्वः । द्विजा अह प्रथमजा ऋतस्येदं धेनुर् अदुहज् जायमाना ॥
iyam me nābhir iha me sadhastham ime me devā ayam asmi sarvaḥ | dvijā aha prathamajā ṛtasyedaṃ dhenur aduhaj jāyamānā ||
Sanskrit only: no published translation is held for this verse.
अधासु मन्द्रो अरतिर् विभावाव स्यति द्विवर्तनिर् वनेषाट् । ऊर्ध्वा यच् छ्रेणिर् न शिशुर् दन् मक्षू स्थिरं शेवृधं सूत माता ॥
adhāsu mandro aratir vibhāvāva syati dvivartanir vaneṣāṭ | ūrdhvā yac chreṇir na śiśur dan makṣū sthiraṃ śevṛdhaṃ sūta mātā ||
Sanskrit only: no published translation is held for this verse.
अधा गाव उपमातिं कनाया अनु श्वान्तस्य कस्य चित् परेयुः । श्रुधि त्वं सुद्रविणो नस् त्वं याळ् आश्वघ्नस्य वावृधे सूनृताभिः ॥
adhā gāva upamātiṃ kanāyā anu śvāntasya kasya cit pareyuḥ | śrudhi tvaṃ sudraviṇo nas tvaṃ yāḷ āśvaghnasya vāvṛdhe sūnṛtābhiḥ ||
Sanskrit only: no published translation is held for this verse.
अध त्वम् इन्द्र विद्ध्य् अस्मान् महो राये नृपते वज्रबाहुः । रक्षा च नो मघोनः पाहि सूरीन् अनेहसस् ते हरिवो अभिष्टौ ॥
adha tvam indra viddhy asmān maho rāye nṛpate vajrabāhuḥ | rakṣā ca no maghonaḥ pāhi sūrīn anehasas te harivo abhiṣṭau ||
Sanskrit only: no published translation is held for this verse.
अध यद् राजाना गविष्टौ सरत् सरण्युः कारवे जरण्युः । विप्रः प्रेष्ठः स ह्य् एषाम् बभूव परा च वक्षद् उत पर्षद् एनान् ॥
adha yad rājānā gaviṣṭau sarat saraṇyuḥ kārave jaraṇyuḥ | vipraḥ preṣṭhaḥ sa hy eṣām babhūva parā ca vakṣad uta parṣad enān ||
Sanskrit only: no published translation is held for this verse.
अधा न्व् अस्य जेन्यस्य पुष्टौ वृथा रेभन्त ईमहे तद् ऊ नु । सरण्युर् अस्य सूनुर् अश्वो विप्रश् चासि श्रवसश् च सातौ ॥
adhā nv asya jenyasya puṣṭau vṛthā rebhanta īmahe tad ū nu | saraṇyur asya sūnur aśvo vipraś cāsi śravasaś ca sātau ||
Sanskrit only: no published translation is held for this verse.
युवोर् यदि सख्यायास्मे शर्धाय स्तोमं जुजुषे नमस्वान् । विश्वत्र यस्मिन्न् आ गिरः समीचीः पूर्वीव गातुर् दाशत् सूनृतायै ॥
yuvor yadi sakhyāyāsme śardhāya stomaṃ jujuṣe namasvān | viśvatra yasminn ā giraḥ samīcīḥ pūrvīva gātur dāśat sūnṛtāyai ||
Sanskrit only: no published translation is held for this verse.
स गृणानो अद्भिर् देववान् इति सुबन्धुर् नमसा सूक्तैः । वर्धद् उक्थैर् वचोभिर् आ हि नूनं व्य् अध्वैति पयस उस्रियायाः ॥
sa gṛṇāno adbhir devavān iti subandhur namasā sūktaiḥ | vardhad ukthair vacobhir ā hi nūnaṃ vy adhvaiti payasa usriyāyāḥ ||
Sanskrit only: no published translation is held for this verse.
त ऊ षु णो महो यजत्रा भूत देवास ऊतये सजोषाः । ये वाजां अनयता वियन्तो ये स्था निचेतारो अमूराः ॥
ta ū ṣu ṇo maho yajatrā bhūta devāsa ūtaye sajoṣāḥ | ye vājāṃ anayatā viyanto ye sthā nicetāro amūrāḥ ||
Sanskrit only: no published translation is held for this verse.