Ṛgveda Saṃhitā 10.7

स्वस्ति नो दिवो अग्ने पृथिव्या विश्वायुर् धेहि यजथाय देव । सचेमहि तव दस्म प्रकेतैर् उरुष्या ण उरुभिर् देव शंसैः ॥

svasti no divo agne pṛthivyā viśvāyur dhehi yajathāya deva | sacemahi tava dasma praketair uruṣyā ṇa urubhir deva śaṃsaiḥ ||

Sanskrit only: no published translation is held for this verse.

इमा अग्ने मतयस् तुभ्यं जाता गोभिर् अश्वैर् अभि गृणन्ति राधः । यदा ते मर्तो अनु भोगम् आनड् वसो दधानो मतिभिः सुजात ॥

imā agne matayas tubhyaṃ jātā gobhir aśvair abhi gṛṇanti rādhaḥ | yadā te marto anu bhogam ānaḍ vaso dadhāno matibhiḥ sujāta ||

Sanskrit only: no published translation is held for this verse.

अग्निम् मन्ये पितरम् अग्निम् आपिम् अग्निम् भ्रातरं सदम् इत् सखायम् । अग्नेर् अनीकम् बृहतः सपर्यं दिवि शुक्रं यजतं सूर्यस्य ॥

agnim manye pitaram agnim āpim agnim bhrātaraṃ sadam it sakhāyam | agner anīkam bṛhataḥ saparyaṃ divi śukraṃ yajataṃ sūryasya ||

Sanskrit only: no published translation is held for this verse.

सिध्रा अग्ने धियो अस्मे सनुत्रीर् यं त्रायसे दम आ नित्यहोता । ऋतावा स रोहिदश्वः पुरुक्षुर् द्युभिर् अस्मा अहभिर् वामम् अस्तु ॥

sidhrā agne dhiyo asme sanutrīr yaṃ trāyase dama ā nityahotā | ṛtāvā sa rohidaśvaḥ purukṣur dyubhir asmā ahabhir vāmam astu ||

Sanskrit only: no published translation is held for this verse.

द्युभिर् हितम् मित्रम् इव प्रयोगम् प्रत्नम् ऋत्विजम् अध्वरस्य जारम् । बाहुभ्याम् अग्निम् आयवो ऽजनन्त विक्षु होतारं न्य् असादयन्त ॥

dyubhir hitam mitram iva prayogam pratnam ṛtvijam adhvarasya jāram | bāhubhyām agnim āyavo 'jananta vikṣu hotāraṃ ny asādayanta ||

Sanskrit only: no published translation is held for this verse.

स्वयं यजस्व दिवि देव देवान् किं ते पाकः कृणवद् अप्रचेताः । यथायज ऋतुभिर् देव देवान् एवा यजस्व तन्वं सुजात ॥

svayaṃ yajasva divi deva devān kiṃ te pākaḥ kṛṇavad apracetāḥ | yathāyaja ṛtubhir deva devān evā yajasva tanvaṃ sujāta ||

Sanskrit only: no published translation is held for this verse.

भवा नो अग्ने ऽवितोत गोपा भवा वयस्कृद् उत नो वयोधाः । रास्वा च नः सुमहो हव्यदातिं त्रास्वोत नस् तन्वो अप्रयुच्छन् ॥

bhavā no agne 'vitota gopā bhavā vayaskṛd uta no vayodhāḥ | rāsvā ca naḥ sumaho havyadātiṃ trāsvota nas tanvo aprayucchan ||

Sanskrit only: no published translation is held for this verse.