Library·Ṛgveda Saṃhitā·10·10.86
वि हि सोतोर् असृक्षत नेन्द्रं देवम् अमंसत । यत्रामदद् वृषाकपिर् अर्यः पुष्टेषु मत्सखा विश्वस्माद् इन्द्र उत्तरः ॥
vi hi sotor asṛkṣata nendraṃ devam amaṃsata | yatrāmadad vṛṣākapir aryaḥ puṣṭeṣu matsakhā viśvasmād indra uttaraḥ ||
Sanskrit only: no published translation is held for this verse.
परा हीन्द्र धावसि वृषाकपेर् अति व्यथिः । नो अह प्र विन्दस्य् अन्यत्र सोमपीतये विश्वस्माद् इन्द्र उत्तरः ॥
parā hīndra dhāvasi vṛṣākaper ati vyathiḥ | no aha pra vindasy anyatra somapītaye viśvasmād indra uttaraḥ ||
Sanskrit only: no published translation is held for this verse.
किम् अयं त्वां वृषाकपिश् चकार हरितो मृगः । यस्मा इरस्यसीद् उ न्व् अर्यो वा पुष्टिमद् वसु विश्वस्माद् इन्द्र उत्तरः ॥
kim ayaṃ tvāṃ vṛṣākapiś cakāra harito mṛgaḥ | yasmā irasyasīd u nv aryo vā puṣṭimad vasu viśvasmād indra uttaraḥ ||
Sanskrit only: no published translation is held for this verse.
यम् इमं त्वं वृषाकपिम् प्रियम् इन्द्राभिरक्षसि । श्वा न्व् अस्य जम्भिषद् अपि कर्णे वराहयुर् विश्वस्माद् इन्द्र उत्तरः ॥
yam imaṃ tvaṃ vṛṣākapim priyam indrābhirakṣasi | śvā nv asya jambhiṣad api karṇe varāhayur viśvasmād indra uttaraḥ ||
Sanskrit only: no published translation is held for this verse.
प्रिया तष्टानि मे कपिर् व्यक्ता व्य् अदूदुषत् । शिरो न्व् अस्य राविषं न सुगं दुष्कृते भुवं विश्वस्माद् इन्द्र उत्तरः ॥
priyā taṣṭāni me kapir vyaktā vy adūduṣat | śiro nv asya rāviṣaṃ na sugaṃ duṣkṛte bhuvaṃ viśvasmād indra uttaraḥ ||
Sanskrit only: no published translation is held for this verse.
न मत् स्त्री सुभसत्तरा न सुयाशुतरा भुवत् । न मत् प्रतिच्यवीयसी न सक्थ्य् उद्यमीयसी विश्वस्माद् इन्द्र उत्तरः ॥
na mat strī subhasattarā na suyāśutarā bhuvat | na mat praticyavīyasī na sakthy udyamīyasī viśvasmād indra uttaraḥ ||
Sanskrit only: no published translation is held for this verse.
उवे अम्ब सुलाभिके यथेवाङ्ग भविष्यति । भसन् मे अम्ब सक्थि मे शिरो मे वीव हृष्यति विश्वस्माद् इन्द्र उत्तरः ॥
uve amba sulābhike yathevāṅga bhaviṣyati | bhasan me amba sakthi me śiro me vīva hṛṣyati viśvasmād indra uttaraḥ ||
Sanskrit only: no published translation is held for this verse.
किं सुबाहो स्वङ्गुरे पृथुष्टो पृथुजाघने । किं शूरपत्नि नस् त्वम् अभ्य् अमीषि वृषाकपिं विश्वस्माद् इन्द्र उत्तरः ॥
kiṃ subāho svaṅgure pṛthuṣṭo pṛthujāghane | kiṃ śūrapatni nas tvam abhy amīṣi vṛṣākapiṃ viśvasmād indra uttaraḥ ||
Sanskrit only: no published translation is held for this verse.
अवीराम् इव माम् अयं शरारुर् अभि मन्यते । उताहम् अस्मि वीरिणीन्द्रपत्नी मरुत्सखा विश्वस्माद् इन्द्र उत्तरः ॥
avīrām iva mām ayaṃ śarārur abhi manyate | utāham asmi vīriṇīndrapatnī marutsakhā viśvasmād indra uttaraḥ ||
Sanskrit only: no published translation is held for this verse.
संहोत्रं स्म पुरा नारी समनं वाव गच्छति । वेधा ऋतस्य वीरिणीन्द्रपत्नी महीयते विश्वस्माद् इन्द्र उत्तरः ॥
saṃhotraṃ sma purā nārī samanaṃ vāva gacchati | vedhā ṛtasya vīriṇīndrapatnī mahīyate viśvasmād indra uttaraḥ ||
Sanskrit only: no published translation is held for this verse.
इन्द्राणीम् आसु नारिषु सुभगाम् अहम् अश्रवम् । नह्य् अस्या अपरं चन जरसा मरते पतिर् विश्वस्माद् इन्द्र उत्तरः ॥
indrāṇīm āsu nāriṣu subhagām aham aśravam | nahy asyā aparaṃ cana jarasā marate patir viśvasmād indra uttaraḥ ||
Sanskrit only: no published translation is held for this verse.
नाहम् इन्द्राणि रारण सख्युर् वृषाकपेर् ऋते । यस्येदम् अप्यं हविः प्रियं देवेषु गच्छति विश्वस्माद् इन्द्र उत्तरः ॥
nāham indrāṇi rāraṇa sakhyur vṛṣākaper ṛte | yasyedam apyaṃ haviḥ priyaṃ deveṣu gacchati viśvasmād indra uttaraḥ ||
Sanskrit only: no published translation is held for this verse.
वृषाकपायि रेवति सुपुत्र आद् उ सुस्नुषे । घसत् त इन्द्र उक्षणः प्रियं काचित्करं हविर् विश्वस्माद् इन्द्र उत्तरः ॥
vṛṣākapāyi revati suputra ād u susnuṣe | ghasat ta indra ukṣaṇaḥ priyaṃ kācitkaraṃ havir viśvasmād indra uttaraḥ ||
Sanskrit only: no published translation is held for this verse.
उक्ष्णो हि मे पञ्चदश साकम् पचन्ति विंशतिम् । उताहम् अद्मि पीव इद् उभा कुक्षी पृणन्ति मे विश्वस्माद् इन्द्र उत्तरः ॥
ukṣṇo hi me pañcadaśa sākam pacanti viṃśatim | utāham admi pīva id ubhā kukṣī pṛṇanti me viśvasmād indra uttaraḥ ||
Sanskrit only: no published translation is held for this verse.
वृषभो न तिग्मशृङ्गो ऽन्तर् यूथेषु रोरुवत् । मन्थस् त इन्द्र शं हृदे यं ते सुनोति भावयुर् विश्वस्माद् इन्द्र उत्तरः ॥
vṛṣabho na tigmaśṛṅgo 'ntar yūtheṣu roruvat | manthas ta indra śaṃ hṛde yaṃ te sunoti bhāvayur viśvasmād indra uttaraḥ ||
Sanskrit only: no published translation is held for this verse.
न सेशे यस्य रम्बते ऽन्तरा सक्थ्या कपृत् । सेद् ईशे यस्य रोमशं निषेदुषो विजृम्भते विश्वस्माद् इन्द्र उत्तरः ॥
na seśe yasya rambate 'ntarā sakthyā kapṛt | sed īśe yasya romaśaṃ niṣeduṣo vijṛmbhate viśvasmād indra uttaraḥ ||
Sanskrit only: no published translation is held for this verse.
न सेशे यस्य रोमशं निषेदुषो विजृम्भते । सेद् ईशे यस्य रम्बते ऽन्तरा सक्थ्या कपृद् विश्वस्माद् इन्द्र उत्तरः ॥
na seśe yasya romaśaṃ niṣeduṣo vijṛmbhate | sed īśe yasya rambate 'ntarā sakthyā kapṛd viśvasmād indra uttaraḥ ||
Sanskrit only: no published translation is held for this verse.
अयम् इन्द्र वृषाकपिः परस्वन्तं हतं विदत् । असिं सूनां नवं चरुम् आद् एधस्यान आचितं विश्वस्माद् इन्द्र उत्तरः ॥
ayam indra vṛṣākapiḥ parasvantaṃ hataṃ vidat | asiṃ sūnāṃ navaṃ carum ād edhasyāna ācitaṃ viśvasmād indra uttaraḥ ||
Sanskrit only: no published translation is held for this verse.
अयम् एमि विचाकशद् विचिन्वन् दासम् आर्यम् । पिबामि पाकसुत्वनो ऽभि धीरम् अचाकशं विश्वस्माद् इन्द्र उत्तरः ॥
ayam emi vicākaśad vicinvan dāsam āryam | pibāmi pākasutvano 'bhi dhīram acākaśaṃ viśvasmād indra uttaraḥ ||
Sanskrit only: no published translation is held for this verse.
धन्व च यत् कृन्तत्रं च कति स्वित् ता वि योजना । नेदीयसो वृषाकपे ऽस्तम् एहि गृहां उप विश्वस्माद् इन्द्र उत्तरः ॥
dhanva ca yat kṛntatraṃ ca kati svit tā vi yojanā | nedīyaso vṛṣākape 'stam ehi gṛhāṃ upa viśvasmād indra uttaraḥ ||
Sanskrit only: no published translation is held for this verse.
पुनर् एहि वृषाकपे सुविता कल्पयावहै । य एष स्वप्ननंशनो ऽस्तम् एषि पथा पुनर् विश्वस्माद् इन्द्र उत्तरः ॥
punar ehi vṛṣākape suvitā kalpayāvahai | ya eṣa svapnanaṃśano 'stam eṣi pathā punar viśvasmād indra uttaraḥ ||
Sanskrit only: no published translation is held for this verse.
यद् उदञ्चो वृषाकपे गृहम् इन्द्राजगन्तन । क्व स्य पुल्वघो मृगः कम् अगञ् जनयोपनो विश्वस्माद् इन्द्र उत्तरः ॥
yad udañco vṛṣākape gṛham indrājagantana | kva sya pulvagho mṛgaḥ kam agañ janayopano viśvasmād indra uttaraḥ ||
Sanskrit only: no published translation is held for this verse.
पर्शुर् ह नाम मानवी साकं ससूव विंशतिम् । भद्रम् भल त्यस्या अभूद् यस्या उदरम् आमयद् विश्वस्माद् इन्द्र उत्तरः ॥
parśur ha nāma mānavī sākaṃ sasūva viṃśatim | bhadram bhala tyasyā abhūd yasyā udaram āmayad viśvasmād indra uttaraḥ ||
Sanskrit only: no published translation is held for this verse.