Library·Ṛgveda Saṃhitā·10·10.95
हये जाये मनसा तिष्ठ घोरे वचांसि मिश्रा कृणवावहै नु । न नौ मन्त्रा अनुदितास एते मयस् करन् परतरे चनाहन् ॥
haye jāye manasā tiṣṭha ghore vacāṃsi miśrā kṛṇavāvahai nu | na nau mantrā anuditāsa ete mayas karan paratare canāhan ||
Sanskrit only: no published translation is held for this verse.
किम् एता वाचा कृणवा तवाहम् प्राक्रमिषम् उषसाम् अग्रियेव । पुरूरवः पुनर् अस्तम् परेहि दुरापना वात इवाहम् अस्मि ॥
kim etā vācā kṛṇavā tavāham prākramiṣam uṣasām agriyeva | purūravaḥ punar astam parehi durāpanā vāta ivāham asmi ||
Sanskrit only: no published translation is held for this verse.
इषुर् न श्रिय इषुधेर् असना गोषाः शतसा न रंहिः । अवीरे क्रतौ वि दविद्युतन् नोरा न मायुं चितयन्त धुनयः ॥
iṣur na śriya iṣudher asanā goṣāḥ śatasā na raṃhiḥ | avīre kratau vi davidyutan norā na māyuṃ citayanta dhunayaḥ ||
Sanskrit only: no published translation is held for this verse.
सा वसु दधती श्वशुराय वय उषो यदि वष्ट्य् अन्तिगृहात् । अस्तं ननक्षे यस्मिञ् चाकन् दिवा नक्तं श्नथिता वैतसेन ॥
sā vasu dadhatī śvaśurāya vaya uṣo yadi vaṣṭy antigṛhāt | astaṃ nanakṣe yasmiñ cākan divā naktaṃ śnathitā vaitasena ||
Sanskrit only: no published translation is held for this verse.
त्रिः स्म माह्नः श्नथयो वैतसेनोत स्म मे ऽव्यत्यै पृणासि । पुरूरवो ऽनु ते केतम् आयं राजा मे वीर तन्वस् तद् आसीः ॥
triḥ sma māhnaḥ śnathayo vaitasenota sma me 'vyatyai pṛṇāsi | purūravo 'nu te ketam āyaṃ rājā me vīra tanvas tad āsīḥ ||
Sanskrit only: no published translation is held for this verse.
या सुजूर्णिः श्रेणिः सुम्नआपिर् ह्रदेचक्षुर् न ग्रन्थिनी चरण्युः । ता अञ्जयो ऽरुणयो न सस्रुः श्रिये गावो न धेनवो ऽनवन्त ॥
yā sujūrṇiḥ śreṇiḥ sumnaāpir hradecakṣur na granthinī caraṇyuḥ | tā añjayo 'ruṇayo na sasruḥ śriye gāvo na dhenavo 'navanta ||
Sanskrit only: no published translation is held for this verse.
सम् अस्मिञ् जायमान आसत ग्ना उतेम् अवर्धन् नद्यः स्वगूर्ताः । महे यत् त्वा पुरूरवो रणायावर्धयन् दस्युहत्याय देवाः ॥
sam asmiñ jāyamāna āsata gnā utem avardhan nadyaḥ svagūrtāḥ | mahe yat tvā purūravo raṇāyāvardhayan dasyuhatyāya devāḥ ||
Sanskrit only: no published translation is held for this verse.
सचा यद् आसु जहतीष्व् अत्कम् अमानुषीषु मानुषो निषेवे । अप स्म मत् तरसन्ती न भुज्युस् ता अत्रसन् रथस्पृशो नाश्वाः ॥
sacā yad āsu jahatīṣv atkam amānuṣīṣu mānuṣo niṣeve | apa sma mat tarasantī na bhujyus tā atrasan rathaspṛśo nāśvāḥ ||
Sanskrit only: no published translation is held for this verse.
यद् आसु मर्तो अमृतासु निस्पृक् सं क्षोणीभिः क्रतुभिर् न पृङ्क्ते । ता आतयो न तन्वः शुम्भत स्वा अश्वासो न क्रीळयो दन्दशानाः ॥
yad āsu marto amṛtāsu nispṛk saṃ kṣoṇībhiḥ kratubhir na pṛṅkte | tā ātayo na tanvaḥ śumbhata svā aśvāso na krīḷayo dandaśānāḥ ||
Sanskrit only: no published translation is held for this verse.
विद्युन् न या पतन्ती दविद्योद् भरन्ती मे अप्या काम्यानि । जनिष्टो अपो नर्यः सुजातः प्रोर्वशी तिरत दीर्घम् आयुः ॥
vidyun na yā patantī davidyod bharantī me apyā kāmyāni | janiṣṭo apo naryaḥ sujātaḥ prorvaśī tirata dīrgham āyuḥ ||
Sanskrit only: no published translation is held for this verse.
जज्ञिष इत्था गोपीथ्याय हि दधाथ तत् पुरूरवो म ओजः । अशासं त्वा विदुषी सस्मिन्न् अहन् न म आशृणोः किम् अभुग् वदासि ॥
jajñiṣa itthā gopīthyāya hi dadhātha tat purūravo ma ojaḥ | aśāsaṃ tvā viduṣī sasminn ahan na ma āśṛṇoḥ kim abhug vadāsi ||
Sanskrit only: no published translation is held for this verse.
कदा सूनुः पितरं जात इच्छाच् चक्रन् नाश्रु वर्तयद् विजानन् । को दम्पती समनसा वि यूयोद् अध यद् अग्निः श्वशुरेषु दीदयत् ॥
kadā sūnuḥ pitaraṃ jāta icchāc cakran nāśru vartayad vijānan | ko dampatī samanasā vi yūyod adha yad agniḥ śvaśureṣu dīdayat ||
Sanskrit only: no published translation is held for this verse.
प्रति ब्रवाणि वर्तयते अश्रु चक्रन् न क्रन्दद् आध्ये शिवायै । प्र तत् ते हिनवा यत् ते अस्मे परेह्य् अस्तं नहि मूर मापः ॥
prati bravāṇi vartayate aśru cakran na krandad ādhye śivāyai | pra tat te hinavā yat te asme parehy astaṃ nahi mūra māpaḥ ||
Sanskrit only: no published translation is held for this verse.
सुदेवो अद्य प्रपतेद् अनावृत् परावतम् परमां गन्तवा उ । अधा शयीत निरृतेर् उपस्थे ऽधैनं वृका रभसासो अद्युः ॥
sudevo adya prapated anāvṛt parāvatam paramāṃ gantavā u | adhā śayīta nirṛter upasthe 'dhainaṃ vṛkā rabhasāso adyuḥ ||
Sanskrit only: no published translation is held for this verse.
पुरूरवो मा मृथा मा प्र पप्तो मा त्वा वृकासो अशिवास उ क्षन् । न वै स्त्रैणानि सख्यानि सन्ति सालावृकाणां हृदयान्य् एता ॥
purūravo mā mṛthā mā pra papto mā tvā vṛkāso aśivāsa u kṣan | na vai straiṇāni sakhyāni santi sālāvṛkāṇāṃ hṛdayāny etā ||
Sanskrit only: no published translation is held for this verse.
यद् विरूपाचरम् मर्त्येष्व् अवसं रात्रीः शरदश् चतस्रः । घृतस्य स्तोकं सकृद् अह्न आश्नां ताद् एवेदं तातृपाणा चरामि ॥
yad virūpācaram martyeṣv avasaṃ rātrīḥ śaradaś catasraḥ | ghṛtasya stokaṃ sakṛd ahna āśnāṃ tād evedaṃ tātṛpāṇā carāmi ||
Sanskrit only: no published translation is held for this verse.
अन्तरिक्षप्रां रजसो विमानीम् उप शिक्षाम्य् उर्वशीं वसिष्ठः । उप त्वा रातिः सुकृतस्य तिष्ठान् नि वर्तस्व हृदयं तप्यते मे ॥
antarikṣaprāṃ rajaso vimānīm upa śikṣāmy urvaśīṃ vasiṣṭhaḥ | upa tvā rātiḥ sukṛtasya tiṣṭhān ni vartasva hṛdayaṃ tapyate me ||
Sanskrit only: no published translation is held for this verse.
इति त्वा देवा इम आहुर् ऐळ यथेम् एतद् भवसि मृत्युबन्धुः । प्रजा ते देवान् हविषा यजाति स्वर्ग उ त्वम् अपि मादयासे ॥
iti tvā devā ima āhur aiḷa yathem etad bhavasi mṛtyubandhuḥ | prajā te devān haviṣā yajāti svarga u tvam api mādayāse ||
Sanskrit only: no published translation is held for this verse.