Ṛgveda Saṃhitā 2.10

जोहूत्रो अग्निः प्रथमः पितेवेळस् पदे मनुषा यत् समिद्धः । श्रियं वसानो अमृतो विचेता मर्मृजेन्यः श्रवस्यः स वाजी ॥

johūtro agniḥ prathamaḥ piteveḷas pade manuṣā yat samiddhaḥ | śriyaṃ vasāno amṛto vicetā marmṛjenyaḥ śravasyaḥ sa vājī ||

Sanskrit only: no published translation is held for this verse.

श्रूया अग्निश् चित्रभानुर् हवम् मे विश्वाभिर् गीर्भिर् अमृतो विचेताः । श्यावा रथं वहतो रोहिता वोतारुषाह चक्रे विभृत्रः ॥

śrūyā agniś citrabhānur havam me viśvābhir gīrbhir amṛto vicetāḥ | śyāvā rathaṃ vahato rohitā votāruṣāha cakre vibhṛtraḥ ||

Sanskrit only: no published translation is held for this verse.

उत्तानायाम् अजनयन् सुषूतम् भुवद् अग्निः पुरुपेशासु गर्भः । शिरिणायां चिद् अक्तुना महोभिर् अपरीवृतो वसति प्रचेताः ॥

uttānāyām ajanayan suṣūtam bhuvad agniḥ purupeśāsu garbhaḥ | śiriṇāyāṃ cid aktunā mahobhir aparīvṛto vasati pracetāḥ ||

Sanskrit only: no published translation is held for this verse.

जिघर्म्य् अग्निं हविषा घृतेन प्रतिक्षियन्तम् भुवनानि विश्वा । पृथुं तिरश्चा वयसा बृहन्तं व्यचिष्ठम् अन्नै रभसं दृशानम् ॥

jigharmy agniṃ haviṣā ghṛtena pratikṣiyantam bhuvanāni viśvā | pṛthuṃ tiraścā vayasā bṛhantaṃ vyaciṣṭham annai rabhasaṃ dṛśānam ||

Sanskrit only: no published translation is held for this verse.

आ विश्वतः प्रत्यञ्चं जिघर्म्य् अरक्षसा मनसा तज् जुषेत । मर्यश्री स्पृहयद्वर्णो अग्निर् नाभिमृशे तन्वा जर्भुराणः ॥

ā viśvataḥ pratyañcaṃ jigharmy arakṣasā manasā taj juṣeta | maryaśrī spṛhayadvarṇo agnir nābhimṛśe tanvā jarbhurāṇaḥ ||

Sanskrit only: no published translation is held for this verse.

ज्ञेया भागं सहसानो वरेण त्वादूतासो मनुवद् वदेम । अनूनम् अग्निं जुह्वा वचस्या मधुपृचं धनसा जोहवीमि ॥

jñeyā bhāgaṃ sahasāno vareṇa tvādūtāso manuvad vadema | anūnam agniṃ juhvā vacasyā madhupṛcaṃ dhanasā johavīmi ||

Sanskrit only: no published translation is held for this verse.