Ṛgveda Saṃhitā 2.28

इदं कवेर् आदित्यस्य स्वराजो विश्वानि सान्त्य् अभ्य् अस्तु मह्ना । अति यो मन्द्रो यजथाय देवः सुकीर्तिम् भिक्षे वरुणस्य भूरेः ॥

idaṃ kaver ādityasya svarājo viśvāni sānty abhy astu mahnā | ati yo mandro yajathāya devaḥ sukīrtim bhikṣe varuṇasya bhūreḥ ||

Sanskrit only: no published translation is held for this verse.

तव व्रते सुभगासः स्याम स्वाध्यो वरुण तुष्टुवांसः । उपायन उषसां गोमतीनाम् अग्नयो न जरमाणा अनु द्यून् ॥

tava vrate subhagāsaḥ syāma svādhyo varuṇa tuṣṭuvāṃsaḥ | upāyana uṣasāṃ gomatīnām agnayo na jaramāṇā anu dyūn ||

Sanskrit only: no published translation is held for this verse.

तव स्याम पुरुवीरस्य शर्मन्न् उरुशंसस्य वरुण प्रणेतः । यूयं नः पुत्रा अदितेर् अदब्धा अभि क्षमध्वं युज्याय देवाः ॥

tava syāma puruvīrasya śarmann uruśaṃsasya varuṇa praṇetaḥ | yūyaṃ naḥ putrā aditer adabdhā abhi kṣamadhvaṃ yujyāya devāḥ ||

Sanskrit only: no published translation is held for this verse.

प्र सीम् आदित्यो असृजद् विधर्तां ऋतं सिन्धवो वरुणस्य यन्ति । न श्राम्यन्ति न वि मुचन्त्य् एते वयो न पप्तू रघुया परिज्मन् ॥

pra sīm ādityo asṛjad vidhartāṃ ṛtaṃ sindhavo varuṇasya yanti | na śrāmyanti na vi mucanty ete vayo na paptū raghuyā parijman ||

Sanskrit only: no published translation is held for this verse.

वि मच् छ्रथाय रशनाम् इवाग ऋध्याम ते वरुण खाम् ऋतस्य । मा तन्तुश् छेदि वयतो धियम् मे मा मात्रा शार्य् अपसः पुर ऋतोः ॥

vi mac chrathāya raśanām ivāga ṛdhyāma te varuṇa khām ṛtasya | mā tantuś chedi vayato dhiyam me mā mātrā śāry apasaḥ pura ṛtoḥ ||

Sanskrit only: no published translation is held for this verse.

अपो सु म्यक्ष वरुण भियसम् मत् सम्राळ् ऋतावो ऽनु मा गृभाय । दामेव वत्साद् वि मुमुग्ध्य् अंहो नहि त्वद् आरे निमिषश् चनेशे ॥

apo su myakṣa varuṇa bhiyasam mat samrāḷ ṛtāvo 'nu mā gṛbhāya | dāmeva vatsād vi mumugdhy aṃho nahi tvad āre nimiṣaś caneśe ||

Sanskrit only: no published translation is held for this verse.

मा नो वधैर् वरुण ये त इष्टाव् एनः कृण्वन्तम् असुर भ्रीणन्ति । मा ज्योतिषः प्रवसथानि गन्म वि षू मृधः शिश्रथो जीवसे नः ॥

mā no vadhair varuṇa ye ta iṣṭāv enaḥ kṛṇvantam asura bhrīṇanti | mā jyotiṣaḥ pravasathāni ganma vi ṣū mṛdhaḥ śiśratho jīvase naḥ ||

Sanskrit only: no published translation is held for this verse.

नमः पुरा ते वरुणोत नूनम् उतापरं तुविजात ब्रवाम । त्वे हि कम् पर्वते न श्रितान्य् अप्रच्युतानि दूळभ व्रतानि ॥

namaḥ purā te varuṇota nūnam utāparaṃ tuvijāta bravāma | tve hi kam parvate na śritāny apracyutāni dūḷabha vratāni ||

Sanskrit only: no published translation is held for this verse.

पर ऋणा सावीर् अध मत्कृतानि माहं राजन्न् अन्यकृतेन भोजम् । अव्युष्टा इन् नु भूयसीर् उषास आ नो जीवान् वरुण तासु शाधि ॥

para ṛṇā sāvīr adha matkṛtāni māhaṃ rājann anyakṛtena bhojam | avyuṣṭā in nu bhūyasīr uṣāsa ā no jīvān varuṇa tāsu śādhi ||

Sanskrit only: no published translation is held for this verse.

यो मे राजन् युज्यो वा सखा वा स्वप्ने भयम् भीरवे मह्यम् आह । स्तेनो वा यो दिप्सति नो वृको वा त्वं तस्माद् वरुण पाह्य् अस्मान् ॥

yo me rājan yujyo vā sakhā vā svapne bhayam bhīrave mahyam āha | steno vā yo dipsati no vṛko vā tvaṃ tasmād varuṇa pāhy asmān ||

Sanskrit only: no published translation is held for this verse.

माहम् मघोनो वरुण प्रियस्य भूरिदाव्न आ विदं शूनम् आपेः । मा रायो राजन् सुयमाद् अव स्थाम् बृहद् वदेम विदथे सुवीराः ॥

māham maghono varuṇa priyasya bhūridāvna ā vidaṃ śūnam āpeḥ | mā rāyo rājan suyamād ava sthām bṛhad vadema vidathe suvīrāḥ ||

Sanskrit only: no published translation is held for this verse.