Ṛgveda Saṃhitā 2.4

हुवे वः सुद्योत्मानं सुवृक्तिं विशाम् अग्निम् अतिथिं सुप्रयसम् । मित्र इव यो दिधिषाय्यो भूद् देव आदेवे जने जातवेदाः ॥

huve vaḥ sudyotmānaṃ suvṛktiṃ viśām agnim atithiṃ suprayasam | mitra iva yo didhiṣāyyo bhūd deva ādeve jane jātavedāḥ ||

Sanskrit only: no published translation is held for this verse.

इमं विधन्तो अपां सधस्थे द्वितादधुर् भृगवो विक्ष्व् आयोः । एष विश्वान्य् अभ्य् अस्तु भूमा देवानाम् अग्निर् अरतिर् जीराश्वः ॥

imaṃ vidhanto apāṃ sadhasthe dvitādadhur bhṛgavo vikṣv āyoḥ | eṣa viśvāny abhy astu bhūmā devānām agnir aratir jīrāśvaḥ ||

Sanskrit only: no published translation is held for this verse.

अग्निं देवासो मानुषीषु विक्षु प्रियं धुः क्षेष्यन्तो न मित्रम् । स दीदयद् उशतीर् ऊर्म्या आ दक्षाय्यो यो दास्वते दम आ ॥

agniṃ devāso mānuṣīṣu vikṣu priyaṃ dhuḥ kṣeṣyanto na mitram | sa dīdayad uśatīr ūrmyā ā dakṣāyyo yo dāsvate dama ā ||

Sanskrit only: no published translation is held for this verse.

अस्य रण्वा स्वस्येव पुष्टिः संदृष्टिर् अस्य हियानस्य दक्षोः । वि यो भरिभ्रद् ओषधीषु जिह्वाम् अत्यो न रथ्यो दोधवीति वारान् ॥

asya raṇvā svasyeva puṣṭiḥ saṃdṛṣṭir asya hiyānasya dakṣoḥ | vi yo bharibhrad oṣadhīṣu jihvām atyo na rathyo dodhavīti vārān ||

Sanskrit only: no published translation is held for this verse.

आ यन् मे अभ्वं वनदः पनन्तोशिग्भ्यो नामिमीत वर्णम् । स चित्रेण चिकिते रंसु भासा जुजुर्वां यो मुहुर् आ युवा भूत् ॥

ā yan me abhvaṃ vanadaḥ panantośigbhyo nāmimīta varṇam | sa citreṇa cikite raṃsu bhāsā jujurvāṃ yo muhur ā yuvā bhūt ||

Sanskrit only: no published translation is held for this verse.

आ यो वना तातृषाणो न भाति वार् ण पथा रथ्येव स्वानीत् । कृष्णाध्वा तपू रण्वश् चिकेत द्यौर् इव स्मयमानो नभोभिः ॥

ā yo vanā tātṛṣāṇo na bhāti vār ṇa pathā rathyeva svānīt | kṛṣṇādhvā tapū raṇvaś ciketa dyaur iva smayamāno nabhobhiḥ ||

Sanskrit only: no published translation is held for this verse.

स यो व्य् अस्थाद् अभि दक्षद् उर्वीम् पशुर् नैति स्वयुर् अगोपाः । अग्निः शोचिष्मां अतसान्य् उष्णन् कृष्णव्यथिर् अस्वदयन् न भूम ॥

sa yo vy asthād abhi dakṣad urvīm paśur naiti svayur agopāḥ | agniḥ śociṣmāṃ atasāny uṣṇan kṛṣṇavyathir asvadayan na bhūma ||

Sanskrit only: no published translation is held for this verse.

नू ते पूर्वस्यावसो अधीतौ तृतीये विदथे मन्म शंसि । अस्मे अग्ने संयद्वीरम् बृहन्तं क्षुमन्तं वाजं स्वपत्यं रयिं दाः ॥

nū te pūrvasyāvaso adhītau tṛtīye vidathe manma śaṃsi | asme agne saṃyadvīram bṛhantaṃ kṣumantaṃ vājaṃ svapatyaṃ rayiṃ dāḥ ||

Sanskrit only: no published translation is held for this verse.

त्वया यथा गृत्समदासो अग्ने गुहा वन्वन्त उपरां अभि ष्युः । सुवीरासो अभिमातिषाहः स्मत् सूरिभ्यो गृणते तद् वयो धाः ॥

tvayā yathā gṛtsamadāso agne guhā vanvanta uparāṃ abhi ṣyuḥ | suvīrāso abhimātiṣāhaḥ smat sūribhyo gṛṇate tad vayo dhāḥ ||

Sanskrit only: no published translation is held for this verse.