Ṛgveda Saṃhitā 3.8

अञ्जन्ति त्वाम् अध्वरे देवयन्तो वनस्पते मधुना दैव्येन । यद् ऊर्ध्वस् तिष्ठा द्रविणेह धत्ताद् यद् वा क्षयो मातुर् अस्या उपस्थे ॥

añjanti tvām adhvare devayanto vanaspate madhunā daivyena | yad ūrdhvas tiṣṭhā draviṇeha dhattād yad vā kṣayo mātur asyā upasthe ||

Sanskrit only: no published translation is held for this verse.

समिद्धस्य श्रयमाणः पुरस्ताद् ब्रह्म वन्वानो अजरं सुवीरम् । आरे अस्मद् अमतिम् बाधमान उच् छ्रयस्व महते सौभगाय ॥

samiddhasya śrayamāṇaḥ purastād brahma vanvāno ajaraṃ suvīram | āre asmad amatim bādhamāna uc chrayasva mahate saubhagāya ||

Sanskrit only: no published translation is held for this verse.

उच् छ्रयस्व वनस्पते वर्ष्मन् पृथिव्या अधि । सुमिती मीयमानो वर्चो धा यज्ञवाहसे ॥

uc chrayasva vanaspate varṣman pṛthivyā adhi | sumitī mīyamāno varco dhā yajñavāhase ||

Sanskrit only: no published translation is held for this verse.

युवा सुवासाः परिवीत आगात् स उ श्रेयान् भवति जायमानः । तं धीरासः कवय उन् नयन्ति स्वाध्यो मनसा देवयन्तः ॥

yuvā suvāsāḥ parivīta āgāt sa u śreyān bhavati jāyamānaḥ | taṃ dhīrāsaḥ kavaya un nayanti svādhyo manasā devayantaḥ ||

Sanskrit only: no published translation is held for this verse.

जातो जायते सुदिनत्वे अह्नां समर्य आ विदथे वर्धमानः । पुनन्ति धीरा अपसो मनीषा देवया विप्र उद् इयर्ति वाचम् ॥

jāto jāyate sudinatve ahnāṃ samarya ā vidathe vardhamānaḥ | punanti dhīrā apaso manīṣā devayā vipra ud iyarti vācam ||

Sanskrit only: no published translation is held for this verse.

यान् वो नरो देवयन्तो निमिम्युर् वनस्पते स्वधितिर् वा ततक्ष । ते देवासः स्वरवस् तस्थिवांसः प्रजावद् अस्मे दिधिषन्तु रत्नम् ॥

yān vo naro devayanto nimimyur vanaspate svadhitir vā tatakṣa | te devāsaḥ svaravas tasthivāṃsaḥ prajāvad asme didhiṣantu ratnam ||

Sanskrit only: no published translation is held for this verse.

ये वृक्णासो अधि क्षमि निमितासो यतस्रुचः । ते नो व्यन्तु वार्यं देवत्रा क्षेत्रसाधसः ॥

ye vṛkṇāso adhi kṣami nimitāso yatasrucaḥ | te no vyantu vāryaṃ devatrā kṣetrasādhasaḥ ||

Sanskrit only: no published translation is held for this verse.

आदित्या रुद्रा वसवः सुनीथा द्यावाक्षामा पृथिवी अन्तरिक्षम् । सजोषसो यज्ञम् अवन्तु देवा ऊर्ध्वं कृण्वन्त्व् अध्वरस्य केतुम् ॥

ādityā rudrā vasavaḥ sunīthā dyāvākṣāmā pṛthivī antarikṣam | sajoṣaso yajñam avantu devā ūrdhvaṃ kṛṇvantv adhvarasya ketum ||

Sanskrit only: no published translation is held for this verse.

हंसा इव श्रेणिशो यतानाः शुक्रा वसानाः स्वरवो न आगुः । उन्नीयमानाः कविभिः पुरस्ताद् देवा देवानाम् अपि यन्ति पाथः ॥

haṃsā iva śreṇiśo yatānāḥ śukrā vasānāḥ svaravo na āguḥ | unnīyamānāḥ kavibhiḥ purastād devā devānām api yanti pāthaḥ ||

Sanskrit only: no published translation is held for this verse.

शृङ्गाणीवेच् छृङ्गिणां सं ददृश्रे चषालवन्तः स्वरवः पृथिव्याम् । वाघद्भिर् वा विहवे श्रोषमाणा अस्मां अवन्तु पृतनाज्येषु ॥

śṛṅgāṇīvec chṛṅgiṇāṃ saṃ dadṛśre caṣālavantaḥ svaravaḥ pṛthivyām | vāghadbhir vā vihave śroṣamāṇā asmāṃ avantu pṛtanājyeṣu ||

Sanskrit only: no published translation is held for this verse.

वनस्पते शतवल्शो वि रोह सहस्रवल्शा वि वयं रुहेम । यं त्वाम् अयं स्वधितिस् तेजमानः प्रणिनाय महते सौभगाय ॥

vanaspate śatavalśo vi roha sahasravalśā vi vayaṃ ruhema | yaṃ tvām ayaṃ svadhitis tejamānaḥ praṇināya mahate saubhagāya ||

Sanskrit only: no published translation is held for this verse.