Ṛgveda Saṃhitā 5.32

अदर्दर् उत्सम् असृजो वि खानि त्वम् अर्णवान् बद्बधानां अरम्णाः । महान्तम् इन्द्र पर्वतं वि यद् वः सृजो वि धारा अव दानवं हन् ॥

adardar utsam asṛjo vi khāni tvam arṇavān badbadhānāṃ aramṇāḥ | mahāntam indra parvataṃ vi yad vaḥ sṛjo vi dhārā ava dānavaṃ han ||

Sanskrit only: no published translation is held for this verse.

त्वम् उत्सां ऋतुभिर् बद्बधानां अरंह ऊधः पर्वतस्य वज्रिन् । अहिं चिद् उग्र प्रयुतं शयानं जघन्वां इन्द्र तविषीम् अधत्थाः ॥

tvam utsāṃ ṛtubhir badbadhānāṃ araṃha ūdhaḥ parvatasya vajrin | ahiṃ cid ugra prayutaṃ śayānaṃ jaghanvāṃ indra taviṣīm adhatthāḥ ||

Sanskrit only: no published translation is held for this verse.

त्यस्य चिन् महतो निर् मृगस्य वधर् जघान तविषीभिर् इन्द्रः । य एक इद् अप्रतिर् मन्यमान आद् अस्माद् अन्यो अजनिष्ट तव्यान् ॥

tyasya cin mahato nir mṛgasya vadhar jaghāna taviṣībhir indraḥ | ya eka id apratir manyamāna ād asmād anyo ajaniṣṭa tavyān ||

Sanskrit only: no published translation is held for this verse.

त्यं चिद् एषां स्वधया मदन्तम् मिहो नपातं सुवृधं तमोगाम् । वृषप्रभर्मा दानवस्य भामं वज्रेण वज्री नि जघान शुष्णम् ॥

tyaṃ cid eṣāṃ svadhayā madantam miho napātaṃ suvṛdhaṃ tamogām | vṛṣaprabharmā dānavasya bhāmaṃ vajreṇa vajrī ni jaghāna śuṣṇam ||

Sanskrit only: no published translation is held for this verse.

त्यं चिद् अस्य क्रतुभिर् निषत्तम् अमर्मणो विदद् इद् अस्य मर्म । यद् ईं सुक्षत्र प्रभृता मदस्य युयुत्सन्तं तमसि हर्म्ये धाः ॥

tyaṃ cid asya kratubhir niṣattam amarmaṇo vidad id asya marma | yad īṃ sukṣatra prabhṛtā madasya yuyutsantaṃ tamasi harmye dhāḥ ||

Sanskrit only: no published translation is held for this verse.

त्यं चिद् इत्था कत्पयं शयानम् असूर्ये तमसि वावृधानम् । तं चिन् मन्दानो वृषभः सुतस्योच्चैर् इन्द्रो अपगूर्या जघान ॥

tyaṃ cid itthā katpayaṃ śayānam asūrye tamasi vāvṛdhānam | taṃ cin mandāno vṛṣabhaḥ sutasyoccair indro apagūryā jaghāna ||

Sanskrit only: no published translation is held for this verse.

उद् यद् इन्द्रो महते दानवाय वधर् यमिष्ट सहो अप्रतीतम् । यद् ईं वज्रस्य प्रभृतौ ददाभ विश्वस्य जन्तोर् अधमं चकार ॥

ud yad indro mahate dānavāya vadhar yamiṣṭa saho apratītam | yad īṃ vajrasya prabhṛtau dadābha viśvasya jantor adhamaṃ cakāra ||

Sanskrit only: no published translation is held for this verse.

त्यं चिद् अर्णम् मधुपं शयानम् असिन्वं वव्रम् मह्य् आदद् उग्रः । अपादम् अत्रम् महता वधेन नि दुर्योण आवृणङ् मृध्रवाचम् ॥

tyaṃ cid arṇam madhupaṃ śayānam asinvaṃ vavram mahy ādad ugraḥ | apādam atram mahatā vadhena ni duryoṇa āvṛṇaṅ mṛdhravācam ||

Sanskrit only: no published translation is held for this verse.

को अस्य शुष्मं तविषीं वरात एको धना भरते अप्रतीतः । इमे चिद् अस्य ज्रयसो नु देवी इन्द्रस्यौजसो भियसा जिहाते ॥

ko asya śuṣmaṃ taviṣīṃ varāta eko dhanā bharate apratītaḥ | ime cid asya jrayaso nu devī indrasyaujaso bhiyasā jihāte ||

Sanskrit only: no published translation is held for this verse.

न्य् अस्मै देवी स्वधितिर् जिहीत इन्द्राय गातुर् उशतीव येमे । सं यद् ओजो युवते विश्वम् आभिर् अनु स्वधाव्ने क्षितयो नमन्त ॥

ny asmai devī svadhitir jihīta indrāya gātur uśatīva yeme | saṃ yad ojo yuvate viśvam ābhir anu svadhāvne kṣitayo namanta ||

Sanskrit only: no published translation is held for this verse.

एकं नु त्वा सत्पतिम् पाञ्चजन्यं जातं शृणोमि यशसं जनेषु । तम् मे जगृभ्र आशसो नविष्ठं दोषा वस्तोर् हवमानास इन्द्रम् ॥

ekaṃ nu tvā satpatim pāñcajanyaṃ jātaṃ śṛṇomi yaśasaṃ janeṣu | tam me jagṛbhra āśaso naviṣṭhaṃ doṣā vastor havamānāsa indram ||

Sanskrit only: no published translation is held for this verse.

एवा हि त्वाम् ऋतुथा यातयन्तम् मघा विप्रेभ्यो ददतं शृणोमि । किं ते ब्रह्माणो गृहते सखायो ये त्वाया निदधुः कामम् इन्द्र ॥

evā hi tvām ṛtuthā yātayantam maghā viprebhyo dadataṃ śṛṇomi | kiṃ te brahmāṇo gṛhate sakhāyo ye tvāyā nidadhuḥ kāmam indra ||

Sanskrit only: no published translation is held for this verse.