Ṛgveda Saṃhitā 5.55

प्रयज्यवो मरुतो भ्राजदृष्टयो बृहद् वयो दधिरे रुक्मवक्षसः । ईयन्ते अश्वैः सुयमेभिर् आशुभिः शुभं याताम् अनु रथा अवृत्सत ॥

prayajyavo maruto bhrājadṛṣṭayo bṛhad vayo dadhire rukmavakṣasaḥ | īyante aśvaiḥ suyamebhir āśubhiḥ śubhaṃ yātām anu rathā avṛtsata ||

Sanskrit only: no published translation is held for this verse.

स्वयं दधिध्वे तविषीं यथा विद बृहन् महान्त उर्विया वि राजथ । उतान्तरिक्षम् ममिरे व्य् ओजसा शुभं याताम् अनु रथा अवृत्सत ॥

svayaṃ dadhidhve taviṣīṃ yathā vida bṛhan mahānta urviyā vi rājatha | utāntarikṣam mamire vy ojasā śubhaṃ yātām anu rathā avṛtsata ||

Sanskrit only: no published translation is held for this verse.

साकं जाताः सुभ्वः साकम् उक्षिताः श्रिये चिद् आ प्रतरं वावृधुर् नरः । विरोकिणः सूर्यस्येव रश्मयः शुभं याताम् अनु रथा अवृत्सत ॥

sākaṃ jātāḥ subhvaḥ sākam ukṣitāḥ śriye cid ā prataraṃ vāvṛdhur naraḥ | virokiṇaḥ sūryasyeva raśmayaḥ śubhaṃ yātām anu rathā avṛtsata ||

Sanskrit only: no published translation is held for this verse.

आभूषेण्यं वो मरुतो महित्वनं दिदृक्षेण्यं सूर्यस्येव चक्षणम् । उतो अस्मां अमृतत्वे दधातन शुभं याताम् अनु रथा अवृत्सत ॥

ābhūṣeṇyaṃ vo maruto mahitvanaṃ didṛkṣeṇyaṃ sūryasyeva cakṣaṇam | uto asmāṃ amṛtatve dadhātana śubhaṃ yātām anu rathā avṛtsata ||

Sanskrit only: no published translation is held for this verse.

उद् ईरयथा मरुतः समुद्रतो यूयं वृष्टिं वर्षयथा पुरीषिणः । न वो दस्रा उप दस्यन्ति धेनवः शुभं याताम् अनु रथा अवृत्सत ॥

ud īrayathā marutaḥ samudrato yūyaṃ vṛṣṭiṃ varṣayathā purīṣiṇaḥ | na vo dasrā upa dasyanti dhenavaḥ śubhaṃ yātām anu rathā avṛtsata ||

Sanskrit only: no published translation is held for this verse.

यद् अश्वान् धूर्षु पृषतीर् अयुग्ध्वं हिरण्ययान् प्रत्य् अत्कां अमुग्ध्वम् । विश्वा इत् स्पृधो मरुतो व्य् अस्यथ शुभं याताम् अनु रथा अवृत्सत ॥

yad aśvān dhūrṣu pṛṣatīr ayugdhvaṃ hiraṇyayān praty atkāṃ amugdhvam | viśvā it spṛdho maruto vy asyatha śubhaṃ yātām anu rathā avṛtsata ||

Sanskrit only: no published translation is held for this verse.

न पर्वता न नद्यो वरन्त वो यत्राचिध्वम् मरुतो गच्छथेद् उ तत् । उत द्यावापृथिवी याथना परि शुभं याताम् अनु रथा अवृत्सत ॥

na parvatā na nadyo varanta vo yatrācidhvam maruto gacchathed u tat | uta dyāvāpṛthivī yāthanā pari śubhaṃ yātām anu rathā avṛtsata ||

Sanskrit only: no published translation is held for this verse.

यत् पूर्व्यम् मरुतो यच् च नूतनं यद् उद्यते वसवो यच् च शस्यते । विश्वस्य तस्य भवथा नवेदसः शुभं याताम् अनु रथा अवृत्सत ॥

yat pūrvyam maruto yac ca nūtanaṃ yad udyate vasavo yac ca śasyate | viśvasya tasya bhavathā navedasaḥ śubhaṃ yātām anu rathā avṛtsata ||

Sanskrit only: no published translation is held for this verse.

मृळत नो मरुतो मा वधिष्टनास्मभ्यं शर्म बहुलं वि यन्तन । अधि स्तोत्रस्य सख्यस्य गातन शुभं याताम् अनु रथा अवृत्सत ॥

mṛḷata no maruto mā vadhiṣṭanāsmabhyaṃ śarma bahulaṃ vi yantana | adhi stotrasya sakhyasya gātana śubhaṃ yātām anu rathā avṛtsata ||

Sanskrit only: no published translation is held for this verse.

यूयम् अस्मान् नयत वस्यो अच्छा निर् अंहतिभ्यो मरुतो गृणानाः । जुषध्वं नो हव्यदातिं यजत्रा वयं स्याम पतयो रयीणाम् ॥

yūyam asmān nayata vasyo acchā nir aṃhatibhyo maruto gṛṇānāḥ | juṣadhvaṃ no havyadātiṃ yajatrā vayaṃ syāma patayo rayīṇām ||

Sanskrit only: no published translation is held for this verse.