Library·Ṛgveda Saṃhitā·6·6.46
त्वाम् इद् धि हवामहे साता वाजस्य कारवः । त्वां वृत्रेष्व् इन्द्र सत्पतिं नरस् त्वां काष्ठास्व् अर्वतः ॥
tvām id dhi havāmahe sātā vājasya kāravaḥ | tvāṃ vṛtreṣv indra satpatiṃ naras tvāṃ kāṣṭhāsv arvataḥ ||
Sanskrit only: no published translation is held for this verse.
स त्वं नश् चित्र वज्रहस्त धृष्णुया मह स्तवानो अद्रिवः । गाम् अश्वं रथ्यम् इन्द्र सं किर सत्रा वाजं न जिग्युषे ॥
sa tvaṃ naś citra vajrahasta dhṛṣṇuyā maha stavāno adrivaḥ | gām aśvaṃ rathyam indra saṃ kira satrā vājaṃ na jigyuṣe ||
Sanskrit only: no published translation is held for this verse.
यः सत्राहा विचर्षणिर् इन्द्रं तं हूमहे वयम् । सहस्रमुष्क तुविनृम्ण सत्पते भवा समत्सु नो वृधे ॥
yaḥ satrāhā vicarṣaṇir indraṃ taṃ hūmahe vayam | sahasramuṣka tuvinṛmṇa satpate bhavā samatsu no vṛdhe ||
Sanskrit only: no published translation is held for this verse.
बाधसे जनान् वृषभेव मन्युना घृषौ मीळ्ह ऋचीषम । अस्माकम् बोध्य् अविता महाधने तनूष्व् अप्सु सूर्ये ॥
bādhase janān vṛṣabheva manyunā ghṛṣau mīḷha ṛcīṣama | asmākam bodhy avitā mahādhane tanūṣv apsu sūrye ||
Sanskrit only: no published translation is held for this verse.
इन्द्र ज्येष्ठं न आ भरं ओजिष्ठम् पपुरि श्रवः । येनेमे चित्र वज्रहस्त रोदसी ओभे सुशिप्र प्राः ॥
indra jyeṣṭhaṃ na ā bharaṃ ojiṣṭham papuri śravaḥ | yeneme citra vajrahasta rodasī obhe suśipra prāḥ ||
Sanskrit only: no published translation is held for this verse.
त्वाम् उग्रम् अवसे चर्षणीसहं राजन् देवेषु हूमहे । विश्वा सु नो विथुरा पिब्दना वसो ऽमित्रान् सुषहान् कृधि ॥
tvām ugram avase carṣaṇīsahaṃ rājan deveṣu hūmahe | viśvā su no vithurā pibdanā vaso 'mitrān suṣahān kṛdhi ||
Sanskrit only: no published translation is held for this verse.
यद् इन्द्र नाहुषीष्व् आं ओजो नृम्णं च कृष्टिषु । यद् वा पञ्च क्षितीनां द्युम्नम् आ भर सत्रा विश्वानि पौंस्या ॥
yad indra nāhuṣīṣv āṃ ojo nṛmṇaṃ ca kṛṣṭiṣu | yad vā pañca kṣitīnāṃ dyumnam ā bhara satrā viśvāni pauṃsyā ||
Sanskrit only: no published translation is held for this verse.
यद् वा तृक्षौ मघवन् द्रुह्याव् आ जने यत् पूरौ कच् च वृष्ण्यम् । अस्मभ्यं तद् रिरीहि सं नृषाह्ये ऽमित्रान् पृत्सु तुर्वणे ॥
yad vā tṛkṣau maghavan druhyāv ā jane yat pūrau kac ca vṛṣṇyam | asmabhyaṃ tad rirīhi saṃ nṛṣāhye 'mitrān pṛtsu turvaṇe ||
Sanskrit only: no published translation is held for this verse.
इन्द्र त्रिधातु शरणं त्रिवरूथं स्वस्तिमत् । छर्दिर् यच्छ मघवद्भ्यश् च मह्यं च यावया दिद्युम् एभ्यः ॥
indra tridhātu śaraṇaṃ trivarūthaṃ svastimat | chardir yaccha maghavadbhyaś ca mahyaṃ ca yāvayā didyum ebhyaḥ ||
Sanskrit only: no published translation is held for this verse.
ये गव्यता मनसा शत्रुम् आदभुर् अभिप्रघ्नन्ति धृष्णुया । अध स्मा नो मघवन्न् इन्द्र गिर्वणस् तनूपा अन्तमो भव ॥
ye gavyatā manasā śatrum ādabhur abhipraghnanti dhṛṣṇuyā | adha smā no maghavann indra girvaṇas tanūpā antamo bhava ||
Sanskrit only: no published translation is held for this verse.
अध स्मा नो वृधे भवेन्द्र नायम् अवा युधि । यद् अन्तरिक्षे पतयन्ति पर्णिनो दिद्यवस् तिग्ममूर्धानः ॥
adha smā no vṛdhe bhavendra nāyam avā yudhi | yad antarikṣe patayanti parṇino didyavas tigmamūrdhānaḥ ||
Sanskrit only: no published translation is held for this verse.
यत्र शूरासस् तन्वो वितन्वते प्रिया शर्म पितॄणाम् । अध स्मा यच्छ तन्वे तने च छर्दिर् अचित्तं यावय द्वेषः ॥
yatra śūrāsas tanvo vitanvate priyā śarma pitṝṇām | adha smā yaccha tanve tane ca chardir acittaṃ yāvaya dveṣaḥ ||
Sanskrit only: no published translation is held for this verse.
यद् इन्द्र सर्गे अर्वतश् चोदयासे महाधने । असमने अध्वनि वृजिने पथि श्येनां इव श्रवस्यतः ॥
yad indra sarge arvataś codayāse mahādhane | asamane adhvani vṛjine pathi śyenāṃ iva śravasyataḥ ||
Sanskrit only: no published translation is held for this verse.
सिन्धूंर् इव प्रवण आशुया यतो यदि क्लोशम् अनु ष्वणि । आ ये वयो न वर्वृतत्य् आमिषि गृभीता बाह्वोर् गवि ॥
sindhūṃr iva pravaṇa āśuyā yato yadi klośam anu ṣvaṇi | ā ye vayo na varvṛtaty āmiṣi gṛbhītā bāhvor gavi ||
Sanskrit only: no published translation is held for this verse.