Ṛgveda Saṃhitā 8.100

अयं त एमि तन्वा पुरस्ताद् विश्वे देवा अभि मा यन्ति पश्चात् । यदा मह्यं दीधरो भागम् इन्द्राद् इन् मया कृणवो वीर्याणि ॥

ayaṃ ta emi tanvā purastād viśve devā abhi mā yanti paścāt | yadā mahyaṃ dīdharo bhāgam indrād in mayā kṛṇavo vīryāṇi ||

Sanskrit only: no published translation is held for this verse.

दधामि ते मधुनो भक्षम् अग्रे हितस् ते भागः सुतो अस्तु सोमः । असश् च त्वं दक्षिणतः सखा मे ऽधा वृत्राणि जङ्घनाव भूरि ॥

dadhāmi te madhuno bhakṣam agre hitas te bhāgaḥ suto astu somaḥ | asaś ca tvaṃ dakṣiṇataḥ sakhā me 'dhā vṛtrāṇi jaṅghanāva bhūri ||

Sanskrit only: no published translation is held for this verse.

प्र सु स्तोमम् भरत वाजयन्त इन्द्राय सत्यं यदि सत्यम् अस्ति । नेन्द्रो अस्तीति नेम उ त्व आह क ईं ददर्श कम् अभि ष्टवाम ॥

pra su stomam bharata vājayanta indrāya satyaṃ yadi satyam asti | nendro astīti nema u tva āha ka īṃ dadarśa kam abhi ṣṭavāma ||

Sanskrit only: no published translation is held for this verse.

अयम् अस्मि जरितः पश्य मेह विश्वा जातान्य् अभ्य् अस्मि मह्ना । ऋतस्य मा प्रदिशो वर्धयन्त्य् आदर्दिरो भुवना दर्दरीमि ॥

ayam asmi jaritaḥ paśya meha viśvā jātāny abhy asmi mahnā | ṛtasya mā pradiśo vardhayanty ādardiro bhuvanā dardarīmi ||

Sanskrit only: no published translation is held for this verse.

आ यन् मा वेना अरुहन्न् ऋतस्यं एकम् आसीनं हर्यतस्य पृष्ठे । मनश् चिन् मे हृद आ प्रत्य् अवोचद् अचिक्रदञ् छिशुमन्तः सखायः ॥

ā yan mā venā aruhann ṛtasyaṃ ekam āsīnaṃ haryatasya pṛṣṭhe | manaś cin me hṛda ā praty avocad acikradañ chiśumantaḥ sakhāyaḥ ||

Sanskrit only: no published translation is held for this verse.

विश्वेत् ता ते सवनेषु प्रवाच्या या चकर्थ मघवन्न् इन्द्र सुन्वते । पारावतं यत् पुरुसम्भृतं वस्व् अपावृणोः शरभाय ऋषिबन्धवे ॥

viśvet tā te savaneṣu pravācyā yā cakartha maghavann indra sunvate | pārāvataṃ yat purusambhṛtaṃ vasv apāvṛṇoḥ śarabhāya ṛṣibandhave ||

Sanskrit only: no published translation is held for this verse.

प्र नूनं धावता पृथङ् नेह यो वो अवावरीत् । नि षीं वृत्रस्य मर्मणि वज्रम् इन्द्रो अपीपतत् ॥

pra nūnaṃ dhāvatā pṛthaṅ neha yo vo avāvarīt | ni ṣīṃ vṛtrasya marmaṇi vajram indro apīpatat ||

Sanskrit only: no published translation is held for this verse.

मनोजवा अयमान आयसीम् अतरत् पुरम् । दिवं सुपर्णो गत्वाय सोमं वज्रिण आभरत् ॥

manojavā ayamāna āyasīm atarat puram | divaṃ suparṇo gatvāya somaṃ vajriṇa ābharat ||

Sanskrit only: no published translation is held for this verse.

समुद्रे अन्तः शयत उद्ना वज्रो अभीवृतः । भरन्त्य् अस्मै संयतः पुरःप्रस्रवणा बलिम् ॥

samudre antaḥ śayata udnā vajro abhīvṛtaḥ | bharanty asmai saṃyataḥ puraḥprasravaṇā balim ||

Sanskrit only: no published translation is held for this verse.

यद् वाग् वदन्त्य् अविचेतनानि राष्ट्री देवानां निषसाद मन्द्रा । चतस्र ऊर्जं दुदुहे पयांसि क्व स्विद् अस्याः परमं जगाम ॥

yad vāg vadanty avicetanāni rāṣṭrī devānāṃ niṣasāda mandrā | catasra ūrjaṃ duduhe payāṃsi kva svid asyāḥ paramaṃ jagāma ||

Sanskrit only: no published translation is held for this verse.

देवीं वाचम् अजनयन्त देवास् तां विश्वरूपाः पशवो वदन्ति । सा नो मन्द्रेषम् ऊर्जं दुहाना धेनुर् वाग् अस्मान् उप सुष्टुतैतु ॥

devīṃ vācam ajanayanta devās tāṃ viśvarūpāḥ paśavo vadanti | sā no mandreṣam ūrjaṃ duhānā dhenur vāg asmān upa suṣṭutaitu ||

Sanskrit only: no published translation is held for this verse.

सखे विष्णो वितरं वि क्रमस्व द्यौर् देहि लोकं वज्राय विष्कभे । हनाव वृत्रं रिणचाव सिन्धून् इन्द्रस्य यन्तु प्रसवे विसृष्टाः ॥

sakhe viṣṇo vitaraṃ vi kramasva dyaur dehi lokaṃ vajrāya viṣkabhe | hanāva vṛtraṃ riṇacāva sindhūn indrasya yantu prasave visṛṣṭāḥ ||

Sanskrit only: no published translation is held for this verse.