Library·Ṛgveda Saṃhitā·8·8.11
त्वम् अग्ने व्रतपा असि देव आ मर्त्येष्व् आ । त्वं यज्ञेष्व् ईड्यः ॥
tvam agne vratapā asi deva ā martyeṣv ā | tvaṃ yajñeṣv īḍyaḥ ||
Thou Agni, God mid mortal men, art guard of sacred rites, thou art To be adored at sacrifice.
Translated by Ralph T. H. Griffith (1896)
त्वम् असि प्रशस्यो विदथेषु सहन्त्य । अग्ने रथीर् अध्वराणाम् ॥
tvam asi praśasyo vidatheṣu sahantya | agne rathīr adhvarāṇām ||
O Mighty Agni, thou must be glorified at our festivals, Bearing our offerings to the Gods.
Translated by Ralph T. H. Griffith (1896)
स त्वम् अस्मद् अप द्विषो युयोधि जातवेदः । अदेवीर् अग्ने अरातीः ॥
sa tvam asmad apa dviṣo yuyodhi jātavedaḥ | adevīr agne arātīḥ ||
O Jatavedas Agni, fight and drive our foes afar from us, Them and their godless enmities.
Translated by Ralph T. H. Griffith (1896)
अन्ति चित् सन्तम् अह यज्ञम् मर्तस्य रिपोः । नोप वेषि जातवेदः ॥
anti cit santam aha yajñam martasya ripoḥ | nopa veṣi jātavedaḥ ||
Thou, Jatavedas, seekest not the worship of a hostile man, However nigh itbe to thee.
Translated by Ralph T. H. Griffith (1896)
मर्ता अमर्त्यस्य ते भूरि नाम मनामहे । विप्रासो जातवेदसः ॥
martā amartyasya te bhūri nāma manāmahe | viprāso jātavedasaḥ ||
We sages, mortals as we are, adore the mighty name of thee, Immortal Jatavedas' name.
Translated by Ralph T. H. Griffith (1896)
विप्रं विप्रासो ऽवसे देवम् मर्तास ऊतये । अग्निं गीर्भिर् हवामहे ॥
vipraṃ viprāso 'vase devam martāsa ūtaye | agniṃ gīrbhir havāmahe ||
Sages, we call the Sage to help, mortals, we call the God to aid: We call on Agni with our songs.
Translated by Ralph T. H. Griffith (1896)
आ ते वत्सो मनो यमत् परमाच् चित् सधस्थात् । अग्ने त्वाङ्कामया गिरा ॥
ā te vatso mano yamat paramāc cit sadhasthāt | agne tvāṅkāmayā girā ||
May Vatsa draw- thy mind away even from thy loftiest dwelling-place, Agni, with song that yearns for thee.
Translated by Ralph T. H. Griffith (1896)
पुरुत्रा हि सदृङ्ङ् असि विशो विश्वा अनु प्रभुः । समत्सु त्वा हवामहे ॥
purutrā hi sadṛṅṅ asi viśo viśvā anu prabhuḥ | samatsu tvā havāmahe ||
Thou art the same in many a place: mid all the people thou art Lord. In fray and fight we call on thee.
Translated by Ralph T. H. Griffith (1896)
समत्स्व् अग्निम् अवसे वाजयन्तो हवामहे । वाजेषु चित्रराधसम् ॥
samatsv agnim avase vājayanto havāmahe | vājeṣu citrarādhasam ||
When we are seeking strength we call Agni to help us in the strife, The giver of rich gifts in war.
Translated by Ralph T. H. Griffith (1896)
प्रत्नो हि कम् ईड्यो अध्वरेषु सनाच् च होता नव्यश् च सत्सि । स्वां चाग्ने तन्वम् पिप्रयस्वास्मभ्यं च सौभगम् आ यजस्व ॥
pratno hi kam īḍyo adhvareṣu sanāc ca hotā navyaś ca satsi | svāṃ cāgne tanvam piprayasvāsmabhyaṃ ca saubhagam ā yajasva ||
Ancient, adorable at sacrifices, Priest from of old, meet for our praise, thou sittest. Fill full and satisfy thy body, Agni, and win us happiness by offering worship.
Translated by Ralph T. H. Griffith (1896)