Library·Ṛgveda Saṃhitā·8·8.48
स्वादोर् अभक्षि वयसः सुमेधाः स्वाध्यो वरिवोवित्तरस्य । विश्वे यं देवा उत मर्त्यासो मधु ब्रुवन्तो अभि संचरन्ति ॥
svādor abhakṣi vayasaḥ sumedhāḥ svādhyo varivovittarasya | viśve yaṃ devā uta martyāso madhu bruvanto abhi saṃcaranti ||
Sanskrit only: no published translation is held for this verse.
अन्तश् च प्रागा अदितिर् भवास्य् अवयाता हरसो दैव्यस्य । इन्दव् इन्द्रस्य सख्यं जुषाणः श्रौष्टीव धुरम् अनु राय ऋध्याः ॥
antaś ca prāgā aditir bhavāsy avayātā haraso daivyasya | indav indrasya sakhyaṃ juṣāṇaḥ śrauṣṭīva dhuram anu rāya ṛdhyāḥ ||
Sanskrit only: no published translation is held for this verse.
अपाम सोमम् अमृता अभूमागन्म ज्योतिर् अविदाम देवान् । किं नूनम् अस्मान् कृणवद् अरातिः किम् उ धूर्तिर् अमृत मर्त्यस्य ॥
apāma somam amṛtā abhūmāganma jyotir avidāma devān | kiṃ nūnam asmān kṛṇavad arātiḥ kim u dhūrtir amṛta martyasya ||
Sanskrit only: no published translation is held for this verse.
शं नो भव हृद आ पीत इन्दो पितेव सोम सूनवे सुशेवः । सखेव सख्य उरुशंस धीरः प्र ण आयुर् जीवसे सोम तारीः ॥
śaṃ no bhava hṛda ā pīta indo piteva soma sūnave suśevaḥ | sakheva sakhya uruśaṃsa dhīraḥ pra ṇa āyur jīvase soma tārīḥ ||
Sanskrit only: no published translation is held for this verse.
इमे मा पीता यशस उरुष्यवो रथं न गावः सम् अनाह पर्वसु । ते मा रक्षन्तु विस्रसश् चरित्राद् उत मा स्रामाद् यवयन्त्व् इन्दवः ॥
ime mā pītā yaśasa uruṣyavo rathaṃ na gāvaḥ sam anāha parvasu | te mā rakṣantu visrasaś caritrād uta mā srāmād yavayantv indavaḥ ||
Sanskrit only: no published translation is held for this verse.
अग्निं न मा मथितं सं दिदीपः प्र चक्षय कृणुहि वस्यसो नः । अथा हि ते मद आ सोम मन्ये रेवां इव प्र चरा पुष्टिम् अच्छ ॥
agniṃ na mā mathitaṃ saṃ didīpaḥ pra cakṣaya kṛṇuhi vasyaso naḥ | athā hi te mada ā soma manye revāṃ iva pra carā puṣṭim accha ||
Sanskrit only: no published translation is held for this verse.
इषिरेण ते मनसा सुतस्य भक्षीमहि पित्र्यस्येव रायः । सोम राजन् प्र ण आयूंषि तारीर् अहानीव सूर्यो वासराणि ॥
iṣireṇa te manasā sutasya bhakṣīmahi pitryasyeva rāyaḥ | soma rājan pra ṇa āyūṃṣi tārīr ahānīva sūryo vāsarāṇi ||
Sanskrit only: no published translation is held for this verse.
सोम राजन् मृळया नः स्वस्ति तव स्मसि व्रत्यास् तस्य विद्धि । अलर्ति दक्ष उत मन्युर् इन्दो मा नो अर्यो अनुकामम् परा दाः ॥
soma rājan mṛḷayā naḥ svasti tava smasi vratyās tasya viddhi | alarti dakṣa uta manyur indo mā no aryo anukāmam parā dāḥ ||
Sanskrit only: no published translation is held for this verse.
त्वं हि नस् तन्वः सोम गोपा गात्रे-गात्रे निषसत्था नृचक्षाः । यत् ते वयम् प्रमिनाम व्रतानि स नो मृळ सुषखा देव वस्यः ॥
tvaṃ hi nas tanvaḥ soma gopā gātre-gātre niṣasatthā nṛcakṣāḥ | yat te vayam pramināma vratāni sa no mṛḷa suṣakhā deva vasyaḥ ||
Sanskrit only: no published translation is held for this verse.
ऋदूदरेण सख्या सचेय यो मा न रिष्येद् धर्यश्व पीतः । अयं यः सोमो न्य् अधाय्य् अस्मे तस्मा इन्द्रम् प्रतिरम् एम्य् आयुः ॥
ṛdūdareṇa sakhyā saceya yo mā na riṣyed dharyaśva pītaḥ | ayaṃ yaḥ somo ny adhāyy asme tasmā indram pratiram emy āyuḥ ||
Sanskrit only: no published translation is held for this verse.
अप त्या अस्थुर् अनिरा अमीवा निर् अत्रसन् तमिषीचीर् अभैषुः । आ सोमो अस्मां अरुहद् विहाया अगन्म यत्र प्रतिरन्त आयुः ॥
apa tyā asthur anirā amīvā nir atrasan tamiṣīcīr abhaiṣuḥ | ā somo asmāṃ aruhad vihāyā aganma yatra pratiranta āyuḥ ||
Sanskrit only: no published translation is held for this verse.
यो न इन्दुः पितरो हृत्सु पीतो ऽमर्त्यो मर्त्यां आविवेश । तस्मै सोमाय हविषा विधेम मृळीके अस्य सुमतौ स्याम ॥
yo na induḥ pitaro hṛtsu pīto 'martyo martyāṃ āviveśa | tasmai somāya haviṣā vidhema mṛḷīke asya sumatau syāma ||
Sanskrit only: no published translation is held for this verse.
त्वं सोम पितृभिः संविदानो ऽनु द्यावापृथिवी आ ततन्थ । तस्मै त इन्दो हविषा विधेम वयं स्याम पतयो रयीणाम् ॥
tvaṃ soma pitṛbhiḥ saṃvidāno 'nu dyāvāpṛthivī ā tatantha | tasmai ta indo haviṣā vidhema vayaṃ syāma patayo rayīṇām ||
Sanskrit only: no published translation is held for this verse.
त्रातारो देवा अधि वोचता नो मा नो निद्रा ईशत मोत जल्पिः । वयं सोमस्य विश्वह प्रियासः सुवीरासो विदथम् आ वदेम ॥
trātāro devā adhi vocatā no mā no nidrā īśata mota jalpiḥ | vayaṃ somasya viśvaha priyāsaḥ suvīrāso vidatham ā vadema ||
Sanskrit only: no published translation is held for this verse.
त्वं नः सोम विश्वतो वयोधास् त्वं स्वर्विद् आ विशा नृचक्षाः । त्वं न इन्द ऊतिभिः सजोषाः पाहि पश्चाताद् उत वा पुरस्तात् ॥
tvaṃ naḥ soma viśvato vayodhās tvaṃ svarvid ā viśā nṛcakṣāḥ | tvaṃ na inda ūtibhiḥ sajoṣāḥ pāhi paścātād uta vā purastāt ||
Sanskrit only: no published translation is held for this verse.