Ṛgveda Saṃhitā 8.49

अभि प्र वः सुराधसम् इन्द्रम् अर्च यथा विदे । यो जरितृभ्यो मघवा पुरूवसुः सहस्रेणेव शिक्षति ॥

abhi pra vaḥ surādhasam indram arca yathā vide | yo jaritṛbhyo maghavā purūvasuḥ sahasreṇeva śikṣati ||

Sanskrit only: no published translation is held for this verse.

शतानीकेव प्र जिगाति धृष्णुया हन्ति वृत्राणि दाशुषे । गिरेर् इव प्र रसा अस्य पिन्विरे दत्राणि पुरुभोजसः ॥

śatānīkeva pra jigāti dhṛṣṇuyā hanti vṛtrāṇi dāśuṣe | girer iva pra rasā asya pinvire datrāṇi purubhojasaḥ ||

Sanskrit only: no published translation is held for this verse.

आ त्वा सुतास इन्दवो मदा य इन्द्र गिर्वणः । आपो न वज्रिन्न् अन्व् ओक्यं सरः पृणन्ति शूर राधसे ॥

ā tvā sutāsa indavo madā ya indra girvaṇaḥ | āpo na vajrinn anv okyaṃ saraḥ pṛṇanti śūra rādhase ||

Sanskrit only: no published translation is held for this verse.

अनेहसम् प्रतरणं विवक्षणम् मध्वः स्वादिष्ठम् ईम् पिब । आ यथा मन्दसानः किरासि नः प्र क्षुद्रेव त्मना धृषत् ॥

anehasam prataraṇaṃ vivakṣaṇam madhvaḥ svādiṣṭham īm piba | ā yathā mandasānaḥ kirāsi naḥ pra kṣudreva tmanā dhṛṣat ||

Sanskrit only: no published translation is held for this verse.

आ न स्तोमम् उप द्रवद् धियानो अश्वो न सोतृभिः । यं ते स्वधावन् स्वदयन्ति धेनव इन्द्र कण्वेषु रातयः ॥

ā na stomam upa dravad dhiyāno aśvo na sotṛbhiḥ | yaṃ te svadhāvan svadayanti dhenava indra kaṇveṣu rātayaḥ ||

Sanskrit only: no published translation is held for this verse.

उग्रं न वीरं नमसोप सेदिम विभूतिम् अक्षितावसुम् । उद्रीव वज्रिन्न् अवतो न सिञ्चते क्षरन्तीन्द्र धीतयः ॥

ugraṃ na vīraṃ namasopa sedima vibhūtim akṣitāvasum | udrīva vajrinn avato na siñcate kṣarantīndra dhītayaḥ ||

Sanskrit only: no published translation is held for this verse.

यद् ध नूनं यद् वा यज्ञे यद् वा पृथिव्याम् अधि । अतो नो यज्ञम् आशुभिर् महेमत उग्र उग्रेभिर् आ गहि ॥

yad dha nūnaṃ yad vā yajñe yad vā pṛthivyām adhi | ato no yajñam āśubhir mahemata ugra ugrebhir ā gahi ||

Sanskrit only: no published translation is held for this verse.

अजिरासो हरयो ये त आशवो वाता इव प्रसक्षिणः । येभिर् अपत्यम् मनुषः परीयसे येभिर् विश्वं स्वर् दृशे ॥

ajirāso harayo ye ta āśavo vātā iva prasakṣiṇaḥ | yebhir apatyam manuṣaḥ parīyase yebhir viśvaṃ svar dṛśe ||

Sanskrit only: no published translation is held for this verse.

एतावतस् त ईमह इन्द्र सुम्नस्य गोमतः । यथा प्रावो मघवन् मेध्यातिथिं यथा नीपातिथिं धने ॥

etāvatas ta īmaha indra sumnasya gomataḥ | yathā prāvo maghavan medhyātithiṃ yathā nīpātithiṃ dhane ||

Sanskrit only: no published translation is held for this verse.

यथा कण्वे मघवन् त्रसदस्यवि यथा पक्थे दशव्रजे । यथा गोशर्ये असनोर् ऋजिश्वनीन्द्र गोमद् धिरण्यवत् ॥

yathā kaṇve maghavan trasadasyavi yathā pakthe daśavraje | yathā gośarye asanor ṛjiśvanīndra gomad dhiraṇyavat ||

Sanskrit only: no published translation is held for this verse.