Ṛgveda Saṃhitā 8.50

प्र सु श्रुतं सुराधसम् अर्चा शक्रम् अभिष्टये । यः सुन्वते स्तुवते काम्यं वसु सहस्रेणेव मंहते ॥

pra su śrutaṃ surādhasam arcā śakram abhiṣṭaye | yaḥ sunvate stuvate kāmyaṃ vasu sahasreṇeva maṃhate ||

Sanskrit only: no published translation is held for this verse.

शतानीका हेतयो अस्य दुष्टरा इन्द्रस्य समिषो महीः । गिरिर् न भुज्मा मघवत्सु पिन्वते यद् ईं सुता अमन्दिषुः ॥

śatānīkā hetayo asya duṣṭarā indrasya samiṣo mahīḥ | girir na bhujmā maghavatsu pinvate yad īṃ sutā amandiṣuḥ ||

Sanskrit only: no published translation is held for this verse.

यद् ईं सुतास इन्दवो ऽभि प्रियम् अमन्दिषुः । आपो न धायि सवनम् म आ वसो दुघा इवोप दाशुषे ॥

yad īṃ sutāsa indavo 'bhi priyam amandiṣuḥ | āpo na dhāyi savanam ma ā vaso dughā ivopa dāśuṣe ||

Sanskrit only: no published translation is held for this verse.

अनेहसं वो हवमानम् ऊतये मध्वः क्षरन्ति धीतयः । आ त्वा वसो हवमानास इन्दव उप स्तोत्रेषु दधिरे ॥

anehasaṃ vo havamānam ūtaye madhvaḥ kṣaranti dhītayaḥ | ā tvā vaso havamānāsa indava upa stotreṣu dadhire ||

Sanskrit only: no published translation is held for this verse.

आ नः सोमे स्वध्वर इयानो अत्यो न तोशते । यं ते स्वदावन् स्वदन्ति गूर्तयः पौरे छन्दयसे हवम् ॥

ā naḥ some svadhvara iyāno atyo na tośate | yaṃ te svadāvan svadanti gūrtayaḥ paure chandayase havam ||

Sanskrit only: no published translation is held for this verse.

प्र वीरम् उग्रं विविचिं धनस्पृतं विभूतिं राधसो महः । उद्रीव वज्रिन्न् अवतो वसुत्वना सदा पीपेथ दाशुषे ॥

pra vīram ugraṃ viviciṃ dhanaspṛtaṃ vibhūtiṃ rādhaso mahaḥ | udrīva vajrinn avato vasutvanā sadā pīpetha dāśuṣe ||

Sanskrit only: no published translation is held for this verse.

यद् ध नूनम् परावति यद् वा पृथिव्यां दिवि । युजान इन्द्र हरिभिर् महेमत ऋष्व ऋष्वेभिर् आ गहि ॥

yad dha nūnam parāvati yad vā pṛthivyāṃ divi | yujāna indra haribhir mahemata ṛṣva ṛṣvebhir ā gahi ||

Sanskrit only: no published translation is held for this verse.

रथिरासो हरयो ये ते अस्रिध ओजो वातस्य पिप्रति । येभिर् नि दस्युम् मनुषो निघोषयो येभिः स्वः परीयसे ॥

rathirāso harayo ye te asridha ojo vātasya piprati | yebhir ni dasyum manuṣo nighoṣayo yebhiḥ svaḥ parīyase ||

Sanskrit only: no published translation is held for this verse.

एतावतस् ते वसो विद्याम शूर नव्यसः । यथा प्राव एतशं कृत्व्ये धने यथा वशं दशव्रजे ॥

etāvatas te vaso vidyāma śūra navyasaḥ | yathā prāva etaśaṃ kṛtvye dhane yathā vaśaṃ daśavraje ||

Sanskrit only: no published translation is held for this verse.

यथा कण्वे मघवन् मेधे अध्वरे दीर्घनीथे दमूनसि । यथा गोशर्ये असिषासो अद्रिवो मयि गोत्रं हरिश्रियम् ॥

yathā kaṇve maghavan medhe adhvare dīrghanīthe damūnasi | yathā gośarye asiṣāso adrivo mayi gotraṃ hariśriyam ||

Sanskrit only: no published translation is held for this verse.