Ṛgveda Saṃhitā 8.52

यथा मनौ विवस्वति सोमं शक्रापिबः सुतम् । यथा त्रिते छन्द इन्द्र जुजोषस्य् आयौ मादयसे सचा ॥

yathā manau vivasvati somaṃ śakrāpibaḥ sutam | yathā trite chanda indra jujoṣasy āyau mādayase sacā ||

Sanskrit only: no published translation is held for this verse.

पृषध्रे मेध्ये मातरिश्वनीन्द्र सुवाने अमन्दथाः । यथा सोमं दशशिप्रे दशोण्ये स्यूमरश्माव् ऋजूनसि ॥

pṛṣadhre medhye mātariśvanīndra suvāne amandathāḥ | yathā somaṃ daśaśipre daśoṇye syūmaraśmāv ṛjūnasi ||

Sanskrit only: no published translation is held for this verse.

य उक्था केवला दधे यः सोमं धृषितापिबत् । यस्मै विष्णुस् त्रीणि पदा विचक्रम उप मित्रस्य धर्मभिः ॥

ya ukthā kevalā dadhe yaḥ somaṃ dhṛṣitāpibat | yasmai viṣṇus trīṇi padā vicakrama upa mitrasya dharmabhiḥ ||

Sanskrit only: no published translation is held for this verse.

यस्य त्वम् इन्द्र स्तोमेषु चाकनो वाजे वाजिञ् छतक्रतो । तं त्वा वयं सुदुघाम् इव गोदुहो जुहूमसि श्रवस्यवः ॥

yasya tvam indra stomeṣu cākano vāje vājiñ chatakrato | taṃ tvā vayaṃ sudughām iva goduho juhūmasi śravasyavaḥ ||

Sanskrit only: no published translation is held for this verse.

यो नो दाता स नः पिता महां उग्र ईशानकृत् । अयामन्न् उग्रो मघवा पुरूवसुर् गोर् अश्वस्य प्र दातु नः ॥

yo no dātā sa naḥ pitā mahāṃ ugra īśānakṛt | ayāmann ugro maghavā purūvasur gor aśvasya pra dātu naḥ ||

Sanskrit only: no published translation is held for this verse.

यस्मै त्वं वसो दानाय मंहसे स रायस् पोषम् इन्वति । वसूयवो वसुपतिं शतक्रतुं स्तोमैर् इन्द्रं हवामहे ॥

yasmai tvaṃ vaso dānāya maṃhase sa rāyas poṣam invati | vasūyavo vasupatiṃ śatakratuṃ stomair indraṃ havāmahe ||

Sanskrit only: no published translation is held for this verse.

कदा चन प्र युच्छस्य् उभे नि पासि जन्मनी । तुरीयादित्य हवनं त इन्द्रियम् आ तस्थाव् अमृतं दिवि ॥

kadā cana pra yucchasy ubhe ni pāsi janmanī | turīyāditya havanaṃ ta indriyam ā tasthāv amṛtaṃ divi ||

Sanskrit only: no published translation is held for this verse.

यस्मै त्वम् मघवन्न् इन्द्र गिर्वणः शिक्षो शिक्षसि दाशुषे । अस्माकं गिर उत सुष्टुतिं वसो कण्ववच् छृणुधी हवम् ॥

yasmai tvam maghavann indra girvaṇaḥ śikṣo śikṣasi dāśuṣe | asmākaṃ gira uta suṣṭutiṃ vaso kaṇvavac chṛṇudhī havam ||

Sanskrit only: no published translation is held for this verse.

अस्तावि मन्म पूर्व्यम् ब्रह्मेन्द्राय वोचत । पूर्वीर् ऋतस्य बृहतीर् अनूषत स्तोतुर् मेधा असृक्षत ॥

astāvi manma pūrvyam brahmendrāya vocata | pūrvīr ṛtasya bṛhatīr anūṣata stotur medhā asṛkṣata ||

Sanskrit only: no published translation is held for this verse.

सम् इन्द्रो रायो बृहतीर् अधूनुत सं क्षोणी सम् उ सूर्यम् । सं शुक्रासः शुचयः सं गवाशिरः सोमा इन्द्रम् अमन्दिषुः ॥

sam indro rāyo bṛhatīr adhūnuta saṃ kṣoṇī sam u sūryam | saṃ śukrāsaḥ śucayaḥ saṃ gavāśiraḥ somā indram amandiṣuḥ ||

Sanskrit only: no published translation is held for this verse.