Ṛgveda Saṃhitā 8.53

उपमं त्वा मघोनां ज्येष्ठं च वृषभाणाम् । पूर्भित्तमम् मघवन्न् इन्द्र गोविदम् ईशानं राय ईमहे ॥

upamaṃ tvā maghonāṃ jyeṣṭhaṃ ca vṛṣabhāṇām | pūrbhittamam maghavann indra govidam īśānaṃ rāya īmahe ||

Sanskrit only: no published translation is held for this verse.

य आयुं कुत्सम् अतिथिग्वम् अर्दयो वावृधानो दिवे-दिवे । तं त्वा वयं हर्यश्वं शतक्रतुं वाजयन्तो हवामहे ॥

ya āyuṃ kutsam atithigvam ardayo vāvṛdhāno dive-dive | taṃ tvā vayaṃ haryaśvaṃ śatakratuṃ vājayanto havāmahe ||

Sanskrit only: no published translation is held for this verse.

आ नो विश्वेषां रसम् मध्वः सिञ्चन्त्व् अद्रयः । ये परावति सुन्विरे जनेष्व् आ ये अर्वावतीन्दवः ॥

ā no viśveṣāṃ rasam madhvaḥ siñcantv adrayaḥ | ye parāvati sunvire janeṣv ā ye arvāvatīndavaḥ ||

Sanskrit only: no published translation is held for this verse.

विश्वा द्वेषांसि जहि चाव चा कृधि विश्वे सन्वन्त्व् आ वसु । शीष्टेषु चित् ते मदिरासो अंशवो यत्रा सोमस्य तृम्पसि ॥

viśvā dveṣāṃsi jahi cāva cā kṛdhi viśve sanvantv ā vasu | śīṣṭeṣu cit te madirāso aṃśavo yatrā somasya tṛmpasi ||

Sanskrit only: no published translation is held for this verse.

इन्द्र नेदीय एद् इहि मितमेधाभिर् ऊतिभिः । आ शन्तम शन्तमाभिर् अभिष्टिभिर् आ स्वापे स्वापिभिः ॥

indra nedīya ed ihi mitamedhābhir ūtibhiḥ | ā śantama śantamābhir abhiṣṭibhir ā svāpe svāpibhiḥ ||

Sanskrit only: no published translation is held for this verse.

आजितुरं सत्पतिं विश्वचर्षणिं कृधि प्रजास्व् आभगम् । प्र सू तिरा शचीभिर् ये त उक्थिनः क्रतुम् पुनत आनुषक् ॥

ājituraṃ satpatiṃ viśvacarṣaṇiṃ kṛdhi prajāsv ābhagam | pra sū tirā śacībhir ye ta ukthinaḥ kratum punata ānuṣak ||

Sanskrit only: no published translation is held for this verse.

यस् ते साधिष्ठो ऽवसे ते स्याम भरेषु ते । वयं होत्राभिर् उत देवहूतिभिः ससवांसो मनामहे ॥

yas te sādhiṣṭho 'vase te syāma bhareṣu te | vayaṃ hotrābhir uta devahūtibhiḥ sasavāṃso manāmahe ||

Sanskrit only: no published translation is held for this verse.

अहं हि ते हरिवो ब्रह्म वाजयुर् आजिं यामि सदोतिभिः । त्वाम् इद् एव तम् अमे सम् अश्वयुर् गव्युर् अग्रे मथीनाम् ॥

ahaṃ hi te harivo brahma vājayur ājiṃ yāmi sadotibhiḥ | tvām id eva tam ame sam aśvayur gavyur agre mathīnām ||

Sanskrit only: no published translation is held for this verse.