Ṛgveda Saṃhitā 8.54

एतत् त इन्द्र वीर्यं गीर्भिर् गृणन्ति कारवः । ते स्तोभन्त ऊर्जम् आवन् घृतश्चुतम् पौरासो नक्षन् धीतिभिः ॥

etat ta indra vīryaṃ gīrbhir gṛṇanti kāravaḥ | te stobhanta ūrjam āvan ghṛtaścutam paurāso nakṣan dhītibhiḥ ||

Sanskrit only: no published translation is held for this verse.

नक्षन्त इन्द्रम् अवसे सुकृत्यया येषां सुतेषु मन्दसे । यथा संवर्ते अमदो यथा कृश एवास्मे इन्द्र मत्स्व ॥

nakṣanta indram avase sukṛtyayā yeṣāṃ suteṣu mandase | yathā saṃvarte amado yathā kṛśa evāsme indra matsva ||

Sanskrit only: no published translation is held for this verse.

आ नो विश्वे सजोषसो देवासो गन्तनोप नः । वसवो रुद्रा अवसे न आ गमञ् छृण्वन्तु मरुतो हवम् ॥

ā no viśve sajoṣaso devāso gantanopa naḥ | vasavo rudrā avase na ā gamañ chṛṇvantu maruto havam ||

Sanskrit only: no published translation is held for this verse.

पूषा विष्णुर् हवनम् मे सरस्वत्य् अवन्तु सप्त सिन्धवः । आपो वातः पर्वतासो वनस्पतिः शृणोतु पृथिवी हवम् ॥

pūṣā viṣṇur havanam me sarasvaty avantu sapta sindhavaḥ | āpo vātaḥ parvatāso vanaspatiḥ śṛṇotu pṛthivī havam ||

Sanskrit only: no published translation is held for this verse.

यद् इन्द्र राधो अस्ति ते माघोनम् मघवत्तम । तेन नो बोधि सधमाद्यो वृधे भगो दानाय वृत्रहन् ॥

yad indra rādho asti te māghonam maghavattama | tena no bodhi sadhamādyo vṛdhe bhago dānāya vṛtrahan ||

Sanskrit only: no published translation is held for this verse.

आजिपते नृपते त्वम् इद् धि नो वाज आ वक्षि सुक्रतो । वीती होत्राभिर् उत देववीतिभिः ससवांसो वि शृण्विरे ॥

ājipate nṛpate tvam id dhi no vāja ā vakṣi sukrato | vītī hotrābhir uta devavītibhiḥ sasavāṃso vi śṛṇvire ||

Sanskrit only: no published translation is held for this verse.

सन्ति ह्य् अर्य आशिष इन्द्र आयुर् जनानाम् । अस्मान् नक्षस्व मघवन्न् उपावसे धुक्षस्व पिप्युषीम् इषम् ॥

santi hy arya āśiṣa indra āyur janānām | asmān nakṣasva maghavann upāvase dhukṣasva pipyuṣīm iṣam ||

Sanskrit only: no published translation is held for this verse.

वयं त इन्द्र स्तोमेभिर् विधेम त्वम् अस्माकं शतक्रतो । महि स्थूरं शशयं राधो अह्रयम् प्रस्कण्वाय नि तोशय ॥

vayaṃ ta indra stomebhir vidhema tvam asmākaṃ śatakrato | mahi sthūraṃ śaśayaṃ rādho ahrayam praskaṇvāya ni tośaya ||

Sanskrit only: no published translation is held for this verse.