Library·Ṛgveda Saṃhitā·8·8.60
अग्न आ याह्य् अग्निभिर् होतारं त्वा वृणीमहे । आ त्वाम् अनक्तु प्रयता हविष्मती यजिष्ठम् बर्हिर् आसदे ॥
agna ā yāhy agnibhir hotāraṃ tvā vṛṇīmahe | ā tvām anaktu prayatā haviṣmatī yajiṣṭham barhir āsade ||
Sanskrit only: no published translation is held for this verse.
अच्छा हि त्वा सहसः सूनो अङ्गिरः स्रुचश् चरन्त्य् अध्वरे । ऊर्जो नपातं घृतकेशम् ईमहे ऽग्निं यज्ञेषु पूर्व्यम् ॥
acchā hi tvā sahasaḥ sūno aṅgiraḥ srucaś caranty adhvare | ūrjo napātaṃ ghṛtakeśam īmahe 'gniṃ yajñeṣu pūrvyam ||
Sanskrit only: no published translation is held for this verse.
अग्ने कविर् वेधा असि होता पावक यक्ष्यः । मन्द्रो यजिष्ठो अध्वरेष्व् ईड्यो विप्रेभिः शुक्र मन्मभिः ॥
agne kavir vedhā asi hotā pāvaka yakṣyaḥ | mandro yajiṣṭho adhvareṣv īḍyo viprebhiḥ śukra manmabhiḥ ||
Sanskrit only: no published translation is held for this verse.
अद्रोघम् आ वहोशतो यविष्ठ्य देवां अजस्र वीतये । अभि प्रयांसि सुधिता वसो गहि मन्दस्व धीतिभिर् हितः ॥
adrogham ā vahośato yaviṣṭhya devāṃ ajasra vītaye | abhi prayāṃsi sudhitā vaso gahi mandasva dhītibhir hitaḥ ||
Sanskrit only: no published translation is held for this verse.
त्वम् इत् सप्रथा अस्य् अग्ने त्रातर् ऋतस् कविः । त्वां विप्रासः समिधान दीदिव आ विवासन्ति वेधसः ॥
tvam it saprathā asy agne trātar ṛtas kaviḥ | tvāṃ viprāsaḥ samidhāna dīdiva ā vivāsanti vedhasaḥ ||
Sanskrit only: no published translation is held for this verse.
शोचा शोचिष्ठ दीदिहि विशे मयो रास्व स्तोत्रे महां असि । देवानां शर्मन् मम सन्तु सूरयः शत्रूषाहः स्वग्नयः ॥
śocā śociṣṭha dīdihi viśe mayo rāsva stotre mahāṃ asi | devānāṃ śarman mama santu sūrayaḥ śatrūṣāhaḥ svagnayaḥ ||
Sanskrit only: no published translation is held for this verse.
यथा चिद् वृद्धम् अतसम् अग्ने संजूर्वसि क्षमि । एवा दह मित्रमहो यो अस्मध्रुग् दुर्मन्मा कश् च वेनति ॥
yathā cid vṛddham atasam agne saṃjūrvasi kṣami | evā daha mitramaho yo asmadhrug durmanmā kaś ca venati ||
Sanskrit only: no published translation is held for this verse.
मा नो मर्ताय रिपवे रक्षस्विने माघशंसाय रीरधः । अस्रेधद्भिस् तरणिभिर् यविष्ठ्य शिवेभिः पाहि पायुभिः ॥
mā no martāya ripave rakṣasvine māghaśaṃsāya rīradhaḥ | asredhadbhis taraṇibhir yaviṣṭhya śivebhiḥ pāhi pāyubhiḥ ||
Sanskrit only: no published translation is held for this verse.
पाहि नो अग्न एकया पाह्य् उत द्वितीयया । पाहि गीर्भिस् तिसृभिर् ऊर्जाम् पते पाहि चतसृभिर् वसो ॥
pāhi no agna ekayā pāhy uta dvitīyayā | pāhi gīrbhis tisṛbhir ūrjām pate pāhi catasṛbhir vaso ||
Sanskrit only: no published translation is held for this verse.
पाहि विश्वस्माद् रक्षसो अराव्णः प्र स्म वाजेषु नो ऽव । त्वाम् इद् धि नेदिष्ठं देवतातय आपिं नक्षामहे वृधे ॥
pāhi viśvasmād rakṣaso arāvṇaḥ pra sma vājeṣu no 'va | tvām id dhi nediṣṭhaṃ devatātaya āpiṃ nakṣāmahe vṛdhe ||
Sanskrit only: no published translation is held for this verse.
आ नो अग्ने वयोवृधं रयिम् पावक शंस्यम् । रास्वा च न उपमाते पुरुस्पृहं सुनीती स्वयशस्तरम् ॥
ā no agne vayovṛdhaṃ rayim pāvaka śaṃsyam | rāsvā ca na upamāte puruspṛhaṃ sunītī svayaśastaram ||
Sanskrit only: no published translation is held for this verse.
येन वंसाम पृतनासु शर्धतस् तरन्तो अर्य आदिशः । स त्वं नो वर्ध प्रयसा शचीवसो जिन्वा धियो वसुविदः ॥
yena vaṃsāma pṛtanāsu śardhatas taranto arya ādiśaḥ | sa tvaṃ no vardha prayasā śacīvaso jinvā dhiyo vasuvidaḥ ||
Sanskrit only: no published translation is held for this verse.
शिशानो वृषभो यथाग्निः शृङ्गे दविध्वत् । तिग्मा अस्य हनवो न प्रतिधृषे सुजम्भः सहसो यहुः ॥
śiśāno vṛṣabho yathāgniḥ śṛṅge davidhvat | tigmā asya hanavo na pratidhṛṣe sujambhaḥ sahaso yahuḥ ||
Sanskrit only: no published translation is held for this verse.
नहि ते अग्ने वृषभ प्रतिधृषे जम्भासो यद् वितिष्ठसे । स त्वं नो होतः सुहुतं हविष् कृधि वंस्वा नो वार्या पुरु ॥
nahi te agne vṛṣabha pratidhṛṣe jambhāso yad vitiṣṭhase | sa tvaṃ no hotaḥ suhutaṃ haviṣ kṛdhi vaṃsvā no vāryā puru ||
Sanskrit only: no published translation is held for this verse.
शेषे वनेषु मात्रोः सं त्वा मर्तास इन्धते । अतन्द्रो हव्या वहसि हविष्कृत आद् इद् देवेषु राजसि ॥
śeṣe vaneṣu mātroḥ saṃ tvā martāsa indhate | atandro havyā vahasi haviṣkṛta ād id deveṣu rājasi ||
Sanskrit only: no published translation is held for this verse.
सप्त होतारस् तम् इद् ईळते त्वाग्ने सुत्यजम् अह्रयम् । भिनत्स्य् अद्रिं तपसा वि शोचिषा प्राग्ने तिष्ठ जनां अति ॥
sapta hotāras tam id īḷate tvāgne sutyajam ahrayam | bhinatsy adriṃ tapasā vi śociṣā prāgne tiṣṭha janāṃ ati ||
Sanskrit only: no published translation is held for this verse.
अग्निम्-अग्निं वो अध्रिगुं हुवेम वृक्तबर्हिषः । अग्निं हितप्रयसः शश्वतीष्व् आ होतारं चर्षणीनाम् ॥
agnim-agniṃ vo adhriguṃ huvema vṛktabarhiṣaḥ | agniṃ hitaprayasaḥ śaśvatīṣv ā hotāraṃ carṣaṇīnām ||
Sanskrit only: no published translation is held for this verse.
केतेन शर्मन् सचते सुषामण्य् अग्ने तुभ्यं चिकित्वना । इषण्यया नः पुरुरूपम् आ भर वाजं नेदिष्ठम् ऊतये ॥
ketena śarman sacate suṣāmaṇy agne tubhyaṃ cikitvanā | iṣaṇyayā naḥ pururūpam ā bhara vājaṃ nediṣṭham ūtaye ||
Sanskrit only: no published translation is held for this verse.
अग्ने जरितर् विश्पतिस् तेपानो देव रक्षसः । अप्रोषिवान् गृहपतिर् महां असि दिवस् पायुर् दुरोणयुः ॥
agne jaritar viśpatis tepāno deva rakṣasaḥ | aproṣivān gṛhapatir mahāṃ asi divas pāyur duroṇayuḥ ||
Sanskrit only: no published translation is held for this verse.
मा नो रक्ष आ वेशीद् आघृणीवसो मा यातुर् यातुमावताम् । परोगव्यूत्य् अनिराम् अप क्षुधम् अग्ने सेध रक्षस्विनः ॥
mā no rakṣa ā veśīd āghṛṇīvaso mā yātur yātumāvatām | parogavyūty anirām apa kṣudham agne sedha rakṣasvinaḥ ||
Sanskrit only: no published translation is held for this verse.