Ṛgveda Saṃhitā 8.64

उत् त्वा मन्दन्तु स्तोमाः कृणुष्व राधो अद्रिवः । अव ब्रह्मद्विषो जहि ॥

ut tvā mandantu stomāḥ kṛṇuṣva rādho adrivaḥ | ava brahmadviṣo jahi ||

Sanskrit only: no published translation is held for this verse.

पदा पणींर् अराधसो नि बाधस्व महां असि । नहि त्वा कश् चन प्रति ॥

padā paṇīṃr arādhaso ni bādhasva mahāṃ asi | nahi tvā kaś cana prati ||

Sanskrit only: no published translation is held for this verse.

त्वम् ईशिषे सुतानाम् इन्द्र त्वम् असुतानाम् । त्वं राजा जनानाम् ॥

tvam īśiṣe sutānām indra tvam asutānām | tvaṃ rājā janānām ||

Sanskrit only: no published translation is held for this verse.

एहि प्रेहि क्षयो दिव्य् आघोषञ् चर्षणीनाम् । ओभे पृणासि रोदसी ॥

ehi prehi kṣayo divy āghoṣañ carṣaṇīnām | obhe pṛṇāsi rodasī ||

Sanskrit only: no published translation is held for this verse.

त्यं चित् पर्वतं गिरिं शतवन्तं सहस्रिणम् । वि स्तोतृभ्यो रुरोजिथ ॥

tyaṃ cit parvataṃ giriṃ śatavantaṃ sahasriṇam | vi stotṛbhyo rurojitha ||

Sanskrit only: no published translation is held for this verse.

वयम् उ त्वा दिवा सुते वयं नक्तं हवामहे । अस्माकं कामम् आ पृण ॥

vayam u tvā divā sute vayaṃ naktaṃ havāmahe | asmākaṃ kāmam ā pṛṇa ||

Sanskrit only: no published translation is held for this verse.

क्व स्य वृषभो युवा तुविग्रीवो अनानतः । ब्रह्मा कस् तं सपर्यति ॥

kva sya vṛṣabho yuvā tuvigrīvo anānataḥ | brahmā kas taṃ saparyati ||

Sanskrit only: no published translation is held for this verse.

कस्य स्वित् सवनं वृषा जुजुष्वां अव गच्छति । इन्द्रं क उ स्विद् आ चके ॥

kasya svit savanaṃ vṛṣā jujuṣvāṃ ava gacchati | indraṃ ka u svid ā cake ||

Sanskrit only: no published translation is held for this verse.

कं ते दाना असक्षत वृत्रहन् कं सुवीर्या । उक्थे क उ स्विद् अन्तमः ॥

kaṃ te dānā asakṣata vṛtrahan kaṃ suvīryā | ukthe ka u svid antamaḥ ||

Sanskrit only: no published translation is held for this verse.

अयं ते मानुषे जने सोमः पूरुषु सूयते । तस्येहि प्र द्रवा पिब ॥

ayaṃ te mānuṣe jane somaḥ pūruṣu sūyate | tasyehi pra dravā piba ||

Sanskrit only: no published translation is held for this verse.

अयं ते शर्यणावति सुषोमायाम् अधि प्रियः । आर्जीकीये मदिन्तमः ॥

ayaṃ te śaryaṇāvati suṣomāyām adhi priyaḥ | ārjīkīye madintamaḥ ||

Sanskrit only: no published translation is held for this verse.

तम् अद्य राधसे महे चारुम् मदाय घृष्वये । एहीम् इन्द्र द्रवा पिब ॥

tam adya rādhase mahe cārum madāya ghṛṣvaye | ehīm indra dravā piba ||

Sanskrit only: no published translation is held for this verse.