Ṛgveda Saṃhitā 8.66

तरोभिर् वो विदद्वसुम् इन्द्रं सबाध ऊतये । बृहद् गायन्तः सुतसोमे अध्वरे हुवे भरं न कारिणम् ॥

tarobhir vo vidadvasum indraṃ sabādha ūtaye | bṛhad gāyantaḥ sutasome adhvare huve bharaṃ na kāriṇam ||

Sanskrit only: no published translation is held for this verse.

न यं दुध्रा वरन्ते न स्थिरा मुरो मदे सुशिप्रम् अन्धसः । य आदृत्या शशमानाय सुन्वते दाता जरित्र उक्थ्यम् ॥

na yaṃ dudhrā varante na sthirā muro made suśipram andhasaḥ | ya ādṛtyā śaśamānāya sunvate dātā jaritra ukthyam ||

Sanskrit only: no published translation is held for this verse.

यः शक्रो मृक्षो अश्व्यो यो वा कीजो हिरण्ययः । स ऊर्वस्य रेजयत्य् अपावृतिम् इन्द्रो गव्यस्य वृत्रहा ॥

yaḥ śakro mṛkṣo aśvyo yo vā kījo hiraṇyayaḥ | sa ūrvasya rejayaty apāvṛtim indro gavyasya vṛtrahā ||

Sanskrit only: no published translation is held for this verse.

निखातं चिद् यः पुरुसम्भृतं वसूद् इद् वपति दाशुषे । वज्री सुशिप्रो हर्यश्व इत् करद् इन्द्रः क्रत्वा यथा वशत् ॥

nikhātaṃ cid yaḥ purusambhṛtaṃ vasūd id vapati dāśuṣe | vajrī suśipro haryaśva it karad indraḥ kratvā yathā vaśat ||

Sanskrit only: no published translation is held for this verse.

यद् वावन्थ पुरुष्टुत पुरा चिच् छूर नृणाम् । वयं तत् त इन्द्र सम् भरामसि यज्ञम् उक्थं तुरं वचः ॥

yad vāvantha puruṣṭuta purā cic chūra nṛṇām | vayaṃ tat ta indra sam bharāmasi yajñam ukthaṃ turaṃ vacaḥ ||

Sanskrit only: no published translation is held for this verse.

सचा सोमेषु पुरुहूत वज्रिवो मदाय द्युक्ष सोमपाः । त्वम् इद् धि ब्रह्मकृते काम्यं वसु देष्ठः सुन्वते भुवः ॥

sacā someṣu puruhūta vajrivo madāya dyukṣa somapāḥ | tvam id dhi brahmakṛte kāmyaṃ vasu deṣṭhaḥ sunvate bhuvaḥ ||

Sanskrit only: no published translation is held for this verse.

वयम् एनम् इदा ह्यो ऽपीपेमेह वज्रिणम् । तस्मा उ अद्य समना सुतम् भरा नूनम् भूषत श्रुते ॥

vayam enam idā hyo 'pīpemeha vajriṇam | tasmā u adya samanā sutam bharā nūnam bhūṣata śrute ||

Sanskrit only: no published translation is held for this verse.

वृकश् चिद् अस्य वारण उरामथिर् आ वयुनेषु भूषति । सेमं न स्तोमं जुजुषाण आ गहीन्द्र प्र चित्रया धिया ॥

vṛkaś cid asya vāraṇa urāmathir ā vayuneṣu bhūṣati | semaṃ na stomaṃ jujuṣāṇa ā gahīndra pra citrayā dhiyā ||

Sanskrit only: no published translation is held for this verse.

कद् ऊ न्व् अस्याकृतम् इन्द्रस्यास्ति पौंस्यम् । केनो नु कं श्रोमतेन न शुश्रुवे जनुषः परि वृत्रहा ॥

kad ū nv asyākṛtam indrasyāsti pauṃsyam | keno nu kaṃ śromatena na śuśruve januṣaḥ pari vṛtrahā ||

Sanskrit only: no published translation is held for this verse.

कद् ऊ महीर् अधृष्टा अस्य तविषीः कद् उ वृत्रघ्नो अस्तृतम् । इन्द्रो विश्वान् बेकनाटां अहर्दृश उत क्रत्वा पणींर् अभि ॥

kad ū mahīr adhṛṣṭā asya taviṣīḥ kad u vṛtraghno astṛtam | indro viśvān bekanāṭāṃ ahardṛśa uta kratvā paṇīṃr abhi ||

Sanskrit only: no published translation is held for this verse.

वयं घा ते अपूर्व्येन्द्र ब्रह्माणि वृत्रहन् । पुरूतमासः पुरुहूत वज्रिवो भृतिं न प्र भरामसि ॥

vayaṃ ghā te apūrvyendra brahmāṇi vṛtrahan | purūtamāsaḥ puruhūta vajrivo bhṛtiṃ na pra bharāmasi ||

Sanskrit only: no published translation is held for this verse.

पूर्वीश् चिद् धि त्वे तुविकूर्मिन्न् आशसो हवन्त इन्द्रोतयः । तिरश् चिद् अर्यः सवना वसो गहि शविष्ठ श्रुधि मे हवम् ॥

pūrvīś cid dhi tve tuvikūrminn āśaso havanta indrotayaḥ | tiraś cid aryaḥ savanā vaso gahi śaviṣṭha śrudhi me havam ||

Sanskrit only: no published translation is held for this verse.

वयं घा ते त्वे इद् व् इन्द्र विप्रा अपि ष्मसि । नहि त्वद् अन्यः पुरुहूत कश् चन मघवन्न् अस्ति मर्डिता ॥

vayaṃ ghā te tve id v indra viprā api ṣmasi | nahi tvad anyaḥ puruhūta kaś cana maghavann asti marḍitā ||

Sanskrit only: no published translation is held for this verse.

त्वं नो अस्या अमतेर् उत क्षुधो ऽभिशस्तेर् अव स्पृधि । त्वं न ऊती तव चित्रया धिया शिक्षा शचिष्ठ गातुवित् ॥

tvaṃ no asyā amater uta kṣudho 'bhiśaster ava spṛdhi | tvaṃ na ūtī tava citrayā dhiyā śikṣā śaciṣṭha gātuvit ||

Sanskrit only: no published translation is held for this verse.

सोम इद् वः सुतो अस्तु कलयो मा बिभीतन । अपेद् एष ध्वस्मायति स्वयं घैषो अपायति ॥

soma id vaḥ suto astu kalayo mā bibhītana | aped eṣa dhvasmāyati svayaṃ ghaiṣo apāyati ||

Sanskrit only: no published translation is held for this verse.