Ṛgveda Saṃhitā 8.67

त्यान् नु क्षत्रियां अव आदित्यान् याचिषामहे । सुमृळीकां अभिष्टये ॥

tyān nu kṣatriyāṃ ava ādityān yāciṣāmahe | sumṛḷīkāṃ abhiṣṭaye ||

Sanskrit only: no published translation is held for this verse.

मित्रो नो अत्य् अंहतिं वरुणः पर्षद् अर्यमा । आदित्यासो यथा विदुः ॥

mitro no aty aṃhatiṃ varuṇaḥ parṣad aryamā | ādityāso yathā viduḥ ||

Sanskrit only: no published translation is held for this verse.

तेषां हि चित्रम् उक्थ्यं वरूथम् अस्ति दाशुषे । आदित्यानाम् अरङ्कृते ॥

teṣāṃ hi citram ukthyaṃ varūtham asti dāśuṣe | ādityānām araṅkṛte ||

Sanskrit only: no published translation is held for this verse.

महि वो महताम् अवो वरुण मित्रार्यमन् । अवांस्य् आ वृणीमहे ॥

mahi vo mahatām avo varuṇa mitrāryaman | avāṃsy ā vṛṇīmahe ||

Sanskrit only: no published translation is held for this verse.

जीवान् नो अभि धेतनादित्यासः पुरा हथात् । कद् ध स्थ हवनश्रुतः ॥

jīvān no abhi dhetanādityāsaḥ purā hathāt | kad dha stha havanaśrutaḥ ||

Sanskrit only: no published translation is held for this verse.

यद् वः श्रान्ताय सुन्वते वरूथम् अस्ति यच् छर्दिः । तेना नो अधि वोचत ॥

yad vaḥ śrāntāya sunvate varūtham asti yac chardiḥ | tenā no adhi vocata ||

Sanskrit only: no published translation is held for this verse.

अस्ति देवा अंहोर् उर्व् अस्ति रत्नम् अनागसः । आदित्या अद्भुतैनसः ॥

asti devā aṃhor urv asti ratnam anāgasaḥ | ādityā adbhutainasaḥ ||

Sanskrit only: no published translation is held for this verse.

मा नः सेतुः सिषेद् अयम् महे वृणक्तु नस् परि । इन्द्र इद् धि श्रुतो वशी ॥

mā naḥ setuḥ siṣed ayam mahe vṛṇaktu nas pari | indra id dhi śruto vaśī ||

Sanskrit only: no published translation is held for this verse.

मा नो मृचा रिपूणां वृजिनानाम् अविष्यवः । देवा अभि प्र मृक्षत ॥

mā no mṛcā ripūṇāṃ vṛjinānām aviṣyavaḥ | devā abhi pra mṛkṣata ||

Sanskrit only: no published translation is held for this verse.

उत त्वाम् अदिते मह्य् अहं देव्य् उप ब्रुवे । सुमृळीकाम् अभिष्टये ॥

uta tvām adite mahy ahaṃ devy upa bruve | sumṛḷīkām abhiṣṭaye ||

Sanskrit only: no published translation is held for this verse.

पर्षि दीने गभीर आं उग्रपुत्रे जिघांसतः । माकिस् तोकस्य नो रिषत् ॥

parṣi dīne gabhīra āṃ ugraputre jighāṃsataḥ | mākis tokasya no riṣat ||

Sanskrit only: no published translation is held for this verse.

अनेहो न उरुव्रज उरूचि वि प्रसर्तवे । कृधि तोकाय जीवसे ॥

aneho na uruvraja urūci vi prasartave | kṛdhi tokāya jīvase ||

Sanskrit only: no published translation is held for this verse.

ये मूर्धानः क्षितीनाम् अदब्धासः स्वयशसः । व्रता रक्षन्ते अद्रुहः ॥

ye mūrdhānaḥ kṣitīnām adabdhāsaḥ svayaśasaḥ | vratā rakṣante adruhaḥ ||

Sanskrit only: no published translation is held for this verse.

ते न आस्नो वृकाणाम् आदित्यासो मुमोचत । स्तेनम् बद्धम् इवादिते ॥

te na āsno vṛkāṇām ādityāso mumocata | stenam baddham ivādite ||

Sanskrit only: no published translation is held for this verse.

अपो षु ण इयं शरुर् आदित्या अप दुर्मतिः । अस्मद् एत्व् अजघ्नुषी ॥

apo ṣu ṇa iyaṃ śarur ādityā apa durmatiḥ | asmad etv ajaghnuṣī ||

Sanskrit only: no published translation is held for this verse.

शश्वद् धि वः सुदानव आदित्या ऊतिभिर् वयम् । पुरा नूनम् बुभुज्महे ॥

śaśvad dhi vaḥ sudānava ādityā ūtibhir vayam | purā nūnam bubhujmahe ||

Sanskrit only: no published translation is held for this verse.

शश्वन्तं हि प्रचेतसः प्रतियन्तं चिद् एनसः । देवाः कृणुथ जीवसे ॥

śaśvantaṃ hi pracetasaḥ pratiyantaṃ cid enasaḥ | devāḥ kṛṇutha jīvase ||

Sanskrit only: no published translation is held for this verse.

तत् सु नो नव्यं सन्यस आदित्या यन् मुमोचति । बन्धाद् बद्धम् इवादिते ॥

tat su no navyaṃ sanyasa ādityā yan mumocati | bandhād baddham ivādite ||

Sanskrit only: no published translation is held for this verse.

नास्माकम् अस्ति तत् तर आदित्यासो अतिष्कदे । यूयम् अस्मभ्यम् मृळत ॥

nāsmākam asti tat tara ādityāso atiṣkade | yūyam asmabhyam mṛḷata ||

Sanskrit only: no published translation is held for this verse.

मा नो हेतिर् विवस्वत आदित्याः कृत्रिमा शरुः । पुरा नु जरसो वधीत् ॥

mā no hetir vivasvata ādityāḥ kṛtrimā śaruḥ | purā nu jaraso vadhīt ||

Sanskrit only: no published translation is held for this verse.

वि षु द्वेषो व्य् अंहतिम् आदित्यासो वि संहितम् । विष्वग् वि वृहता रपः ॥

vi ṣu dveṣo vy aṃhatim ādityāso vi saṃhitam | viṣvag vi vṛhatā rapaḥ ||

Sanskrit only: no published translation is held for this verse.