प्र-प्र वस् त्रिष्टुभम् इषम् मन्दद्वीरायेन्दवे । धिया वो मेधसातये पुरन्ध्या विवासति ॥
pra-pra vas triṣṭubham iṣam mandadvīrāyendave | dhiyā vo medhasātaye purandhyā vivāsati ||
Sanskrit only: no published translation is held for this verse.
Library·Ṛgveda Saṃhitā·8·8.69
Ṛgveda Saṃhitā 8.69
नदं व ओदतीनां नदं योयुवतीनाम् । पतिं वो अघ्न्यानां धेनूनाम् इषुध्यसि ॥
nadaṃ va odatīnāṃ nadaṃ yoyuvatīnām | patiṃ vo aghnyānāṃ dhenūnām iṣudhyasi ||
Sanskrit only: no published translation is held for this verse.
ता अस्य सूददोहसः सोमं श्रीणन्ति पृश्नयः । जन्मन् देवानां विशस् त्रिष्व् आ रोचने दिवः ॥
tā asya sūdadohasaḥ somaṃ śrīṇanti pṛśnayaḥ | janman devānāṃ viśas triṣv ā rocane divaḥ ||
Sanskrit only: no published translation is held for this verse.
अभि प्र गोपतिं गिरेन्द्रम् अर्च यथा विदे । सूनुं सत्यस्य सत्पतिम् ॥
abhi pra gopatiṃ girendram arca yathā vide | sūnuṃ satyasya satpatim ||
Sanskrit only: no published translation is held for this verse.
आ हरयः ससृज्रिरे ऽरुषीर् अधि बर्हिषि । यत्राभि संनवामहे ॥
ā harayaḥ sasṛjrire 'ruṣīr adhi barhiṣi | yatrābhi saṃnavāmahe ||
Sanskrit only: no published translation is held for this verse.
इन्द्राय गाव आशिरं दुदुह्रे वज्रिणे मधु । यत् सीम् उपह्वरे विदत् ॥
indrāya gāva āśiraṃ duduhre vajriṇe madhu | yat sīm upahvare vidat ||
Sanskrit only: no published translation is held for this verse.
उद् यद् ब्रध्नस्य विष्टपं गृहम् इन्द्रश् च गन्वहि । मध्वः पीत्वा सचेवहि त्रिः सप्त सख्युः पदे ॥
ud yad bradhnasya viṣṭapaṃ gṛham indraś ca ganvahi | madhvaḥ pītvā sacevahi triḥ sapta sakhyuḥ pade ||
Sanskrit only: no published translation is held for this verse.
अर्चत प्रार्चत प्रियमेधासो अर्चत । अर्चन्तु पुत्रका उत पुरं न धृष्ण्व् अर्चत ॥
arcata prārcata priyamedhāso arcata | arcantu putrakā uta puraṃ na dhṛṣṇv arcata ||
Sanskrit only: no published translation is held for this verse.
अव स्वराति गर्गरो गोधा परि सनिष्वणत् । पिङ्गा परि चनिष्कदद् इन्द्राय ब्रह्मोद्यतम् ॥
ava svarāti gargaro godhā pari saniṣvaṇat | piṅgā pari caniṣkadad indrāya brahmodyatam ||
Sanskrit only: no published translation is held for this verse.
आ यत् पतन्त्य् एन्यः सुदुघा अनपस्फुरः । अपस्फुरं गृभायत सोमम् इन्द्राय पातवे ॥
ā yat patanty enyaḥ sudughā anapasphuraḥ | apasphuraṃ gṛbhāyata somam indrāya pātave ||
Sanskrit only: no published translation is held for this verse.
अपाद् इन्द्रो अपाद् अग्निर् विश्वे देवा अमत्सत । वरुण इद् इह क्षयत् तम् आपो अभ्य् अनूषत वत्सं संशिश्वरीर् इव ॥
apād indro apād agnir viśve devā amatsata | varuṇa id iha kṣayat tam āpo abhy anūṣata vatsaṃ saṃśiśvarīr iva ||
Sanskrit only: no published translation is held for this verse.
सुदेवो असि वरुण यस्य ते सप्त सिन्धवः । अनुक्षरन्ति काकुदं सूर्म्यं सुषिराम् इव ॥
sudevo asi varuṇa yasya te sapta sindhavaḥ | anukṣaranti kākudaṃ sūrmyaṃ suṣirām iva ||
Sanskrit only: no published translation is held for this verse.
यो व्यतींर् अफाणयत् सुयुक्तां उप दाशुषे । तक्वो नेता तद् इद् वपुर् उपमा यो अमुच्यत ॥
yo vyatīṃr aphāṇayat suyuktāṃ upa dāśuṣe | takvo netā tad id vapur upamā yo amucyata ||
Sanskrit only: no published translation is held for this verse.
अतीद् उ शक्र ओहत इन्द्रो विश्वा अति द्विषः । भिनत् कनीन ओदनम् पच्यमानम् परो गिरा ॥
atīd u śakra ohata indro viśvā ati dviṣaḥ | bhinat kanīna odanam pacyamānam paro girā ||
Sanskrit only: no published translation is held for this verse.
अर्भको न कुमारको ऽधि तिष्ठन् नवं रथम् । स पक्षन् महिषम् मृगम् पित्रे मात्रे विभुक्रतुम् ॥
arbhako na kumārako 'dhi tiṣṭhan navaṃ ratham | sa pakṣan mahiṣam mṛgam pitre mātre vibhukratum ||
Sanskrit only: no published translation is held for this verse.
आ तू सुशिप्र दम्पते रथं तिष्ठा हिरण्ययम् । अध द्युक्षं सचेवहि सहस्रपादम् अरुषं स्वस्तिगाम् अनेहसम् ॥
ā tū suśipra dampate rathaṃ tiṣṭhā hiraṇyayam | adha dyukṣaṃ sacevahi sahasrapādam aruṣaṃ svastigām anehasam ||
Sanskrit only: no published translation is held for this verse.
तं घेम् इत्था नमस्विन उप स्वराजम् आसते । अर्थं चिद् अस्य सुधितं यद् एतव आवर्तयन्ति दावने ॥
taṃ ghem itthā namasvina upa svarājam āsate | arthaṃ cid asya sudhitaṃ yad etava āvartayanti dāvane ||
Sanskrit only: no published translation is held for this verse.
अनु प्रत्नस्यौकसः प्रियमेधास एषाम् । पूर्वाम् अनु प्रयतिं वृक्तबर्हिषो हितप्रयस आशत ॥
anu pratnasyaukasaḥ priyamedhāsa eṣām | pūrvām anu prayatiṃ vṛktabarhiṣo hitaprayasa āśata ||
Sanskrit only: no published translation is held for this verse.