Ṛgveda Saṃhitā 8.80

नह्य् अन्यम् बळाकरम् मर्डितारं शतक्रतो । त्वं न इन्द्र मृळय ॥

nahy anyam baḷākaram marḍitāraṃ śatakrato | tvaṃ na indra mṛḷaya ||

Sanskrit only: no published translation is held for this verse.

यो नः शश्वत् पुराविथामृध्रो वाजसातये । स त्वं न इन्द्र मृळय ॥

yo naḥ śaśvat purāvithāmṛdhro vājasātaye | sa tvaṃ na indra mṛḷaya ||

Sanskrit only: no published translation is held for this verse.

किम् अङ्ग रध्रचोदनः सुन्वानस्यावितेद् असि । कुवित् स्व् इन्द्र णः शकः ॥

kim aṅga radhracodanaḥ sunvānasyāvited asi | kuvit sv indra ṇaḥ śakaḥ ||

Sanskrit only: no published translation is held for this verse.

इन्द्र प्र णो रथम् अव पश्चाच् चित् सन्तम् अद्रिवः । पुरस्ताद् एनम् मे कृधि ॥

indra pra ṇo ratham ava paścāc cit santam adrivaḥ | purastād enam me kṛdhi ||

Sanskrit only: no published translation is held for this verse.

हन्तो नु किम् आससे प्रथमं नो रथं कृधि । उपमं वाजयु श्रवः ॥

hanto nu kim āsase prathamaṃ no rathaṃ kṛdhi | upamaṃ vājayu śravaḥ ||

Sanskrit only: no published translation is held for this verse.

अवा नो वाजयुं रथं सुकरं ते किम् इत् परि । अस्मान् सु जिग्युषस् कृधि ॥

avā no vājayuṃ rathaṃ sukaraṃ te kim it pari | asmān su jigyuṣas kṛdhi ||

Sanskrit only: no published translation is held for this verse.

इन्द्र दृह्यस्व पूर् असि भद्रा त एति निष्कृतम् । इयं धीर् ऋत्वियावती ॥

indra dṛhyasva pūr asi bhadrā ta eti niṣkṛtam | iyaṃ dhīr ṛtviyāvatī ||

Sanskrit only: no published translation is held for this verse.

मा सीम् अवद्य आ भाग् उर्वी काष्ठा हितं धनम् । अपावृक्ता अरत्नयः ॥

mā sīm avadya ā bhāg urvī kāṣṭhā hitaṃ dhanam | apāvṛktā aratnayaḥ ||

Sanskrit only: no published translation is held for this verse.

तुरीयं नाम यज्ञियं यदा करस् तद् उश्मसि । आद् इत् पतिर् न ओहसे ॥

turīyaṃ nāma yajñiyaṃ yadā karas tad uśmasi | ād it patir na ohase ||

Sanskrit only: no published translation is held for this verse.

अवीवृधद् वो अमृता अमन्दीद् एकद्यूर् देवा उत याश् च देवीः । तस्मा उ राधः कृणुत प्रशस्तम् प्रातर् मक्षू धियावसुर् जगम्यात् ॥

avīvṛdhad vo amṛtā amandīd ekadyūr devā uta yāś ca devīḥ | tasmā u rādhaḥ kṛṇuta praśastam prātar makṣū dhiyāvasur jagamyāt ||

Sanskrit only: no published translation is held for this verse.