Ṛgveda Saṃhitā 8.87

द्युम्नी वां स्तोमो अश्विना क्रिविर् न सेक आ गतम् । मध्वः सुतस्य स दिवि प्रियो नरा पातं गौराव् इवेरिणे ॥

dyumnī vāṃ stomo aśvinā krivir na seka ā gatam | madhvaḥ sutasya sa divi priyo narā pātaṃ gaurāv iveriṇe ||

Sanskrit only: no published translation is held for this verse.

पिबतं घर्मम् मधुमन्तम् अश्विना बर्हिः सीदतं नरा । ता मन्दसाना मनुषो दुरोण आ नि पातं वेदसा वयः ॥

pibataṃ gharmam madhumantam aśvinā barhiḥ sīdataṃ narā | tā mandasānā manuṣo duroṇa ā ni pātaṃ vedasā vayaḥ ||

Sanskrit only: no published translation is held for this verse.

आ वां विश्वाभिर् ऊतिभिः प्रियमेधा अहूषत । ता वर्तिर् यातम् उप वृक्तबर्हिषो जुष्टं यज्ञं दिविष्टिषु ॥

ā vāṃ viśvābhir ūtibhiḥ priyamedhā ahūṣata | tā vartir yātam upa vṛktabarhiṣo juṣṭaṃ yajñaṃ diviṣṭiṣu ||

Sanskrit only: no published translation is held for this verse.

पिबतं सोमम् मधुमन्तम् अश्विना बर्हिः सीदतं सुमत् । ता वावृधाना उप सुष्टुतिं दिवो गन्तं गौराव् इवेरिणम् ॥

pibataṃ somam madhumantam aśvinā barhiḥ sīdataṃ sumat | tā vāvṛdhānā upa suṣṭutiṃ divo gantaṃ gaurāv iveriṇam ||

Sanskrit only: no published translation is held for this verse.

आ नूनं यातम् अश्विनाश्वेभिः प्रुषितप्सुभिः । दस्रा हिरण्यवर्तनी शुभस् पती पातं सोमम् ऋतावृधा ॥

ā nūnaṃ yātam aśvināśvebhiḥ pruṣitapsubhiḥ | dasrā hiraṇyavartanī śubhas patī pātaṃ somam ṛtāvṛdhā ||

Sanskrit only: no published translation is held for this verse.

वयं हि वां हवामहे विपन्यवो विप्रासो वाजसातये । ता वल्गू दस्रा पुरुदंससा धियाश्विना श्रुष्ट्य् आ गतम् ॥

vayaṃ hi vāṃ havāmahe vipanyavo viprāso vājasātaye | tā valgū dasrā purudaṃsasā dhiyāśvinā śruṣṭy ā gatam ||

Sanskrit only: no published translation is held for this verse.