Library·Ṛgveda Saṃhitā·8·8.88
तं वो दस्मम् ऋतीषहं वसोर् मन्दानम् अन्धसः । अभि वत्सं न स्वसरेषु धेनव इन्द्रं गीर्भिर् नवामहे ॥
taṃ vo dasmam ṛtīṣahaṃ vasor mandānam andhasaḥ | abhi vatsaṃ na svasareṣu dhenava indraṃ gīrbhir navāmahe ||
Sanskrit only: no published translation is held for this verse.
द्युक्षं सुदानुं तविषीभिर् आवृतं गिरिं न पुरुभोजसम् । क्षुमन्तं वाजं शतिनं सहस्रिणम् मक्षू गोमन्तम् ईमहे ॥
dyukṣaṃ sudānuṃ taviṣībhir āvṛtaṃ giriṃ na purubhojasam | kṣumantaṃ vājaṃ śatinaṃ sahasriṇam makṣū gomantam īmahe ||
Sanskrit only: no published translation is held for this verse.
न त्वा बृहन्तो अद्रयो वरन्त इन्द्र वीळवः । यद् दित्ससि स्तुवते मावते वसु नकिष् टद् आ मिनाति ते ॥
na tvā bṛhanto adrayo varanta indra vīḷavaḥ | yad ditsasi stuvate māvate vasu nakiṣ ṭad ā mināti te ||
Sanskrit only: no published translation is held for this verse.
योद्धासि क्रत्वा शवसोत दंसना विश्वा जाताभि मज्मना । आ त्वायम् अर्क ऊतये ववर्तति यं गोतमा अजीजनन् ॥
yoddhāsi kratvā śavasota daṃsanā viśvā jātābhi majmanā | ā tvāyam arka ūtaye vavartati yaṃ gotamā ajījanan ||
Sanskrit only: no published translation is held for this verse.
प्र हि रिरिक्ष ओजसा दिवो अन्तेभ्यस् परि । न त्वा विव्याच रज इन्द्र पार्थिवम् अनु स्वधां ववक्षिथ ॥
pra hi ririkṣa ojasā divo antebhyas pari | na tvā vivyāca raja indra pārthivam anu svadhāṃ vavakṣitha ||
Sanskrit only: no published translation is held for this verse.
नकिः परिष्टिर् मघवन् मघस्य ते यद् दाशुषे दशस्यसि । अस्माकम् बोध्य् उचथस्य चोदिता मंहिष्ठो वाजसातये ॥
nakiḥ pariṣṭir maghavan maghasya te yad dāśuṣe daśasyasi | asmākam bodhy ucathasya coditā maṃhiṣṭho vājasātaye ||
Sanskrit only: no published translation is held for this verse.