Ṛgveda Saṃhitā 8.94

गौर् धयति मरुतां श्रवस्युर् माता मघोनाम् । युक्ता वह्नी रथानाम् ॥

gaur dhayati marutāṃ śravasyur mātā maghonām | yuktā vahnī rathānām ||

Sanskrit only: no published translation is held for this verse.

यस्या देवा उपस्थे व्रता विश्वे धारयन्ते । सूर्यामासा दृशे कम् ॥

yasyā devā upasthe vratā viśve dhārayante | sūryāmāsā dṛśe kam ||

Sanskrit only: no published translation is held for this verse.

तत् सु नो विश्वे अर्य आ सदा गृणन्ति कारवः । मरुतः सोमपीतये ॥

tat su no viśve arya ā sadā gṛṇanti kāravaḥ | marutaḥ somapītaye ||

Sanskrit only: no published translation is held for this verse.

अस्ति सोमो अयं सुतः पिबन्त्य् अस्य मरुतः । उत स्वराजो अश्विना ॥

asti somo ayaṃ sutaḥ pibanty asya marutaḥ | uta svarājo aśvinā ||

Sanskrit only: no published translation is held for this verse.

पिबन्ति मित्रो अर्यमा तना पूतस्य वरुणः । त्रिषधस्थस्य जावतः ॥

pibanti mitro aryamā tanā pūtasya varuṇaḥ | triṣadhasthasya jāvataḥ ||

Sanskrit only: no published translation is held for this verse.

उतो न्व् अस्य जोषम् आं इन्द्रः सुतस्य गोमतः । प्रातर् होतेव मत्सति ॥

uto nv asya joṣam āṃ indraḥ sutasya gomataḥ | prātar hoteva matsati ||

Sanskrit only: no published translation is held for this verse.

कद् अत्विषन्त सूरयस् तिर आप इव स्रिधः । अर्षन्ति पूतदक्षसः ॥

kad atviṣanta sūrayas tira āpa iva sridhaḥ | arṣanti pūtadakṣasaḥ ||

Sanskrit only: no published translation is held for this verse.

कद् वो अद्य महानां देवानाम् अवो वृणे । त्मना च दस्मवर्चसाम् ॥

kad vo adya mahānāṃ devānām avo vṛṇe | tmanā ca dasmavarcasām ||

Sanskrit only: no published translation is held for this verse.

आ ये विश्वा पार्थिवानि पप्रथन् रोचना दिवः । मरुतः सोमपीतये ॥

ā ye viśvā pārthivāni paprathan rocanā divaḥ | marutaḥ somapītaye ||

Sanskrit only: no published translation is held for this verse.

त्यान् नु पूतदक्षसो दिवो वो मरुतो हुवे । अस्य सोमस्य पीतये ॥

tyān nu pūtadakṣaso divo vo maruto huve | asya somasya pītaye ||

Sanskrit only: no published translation is held for this verse.

त्यान् नु ये वि रोदसी तस्तभुर् मरुतो हुवे । अस्य सोमस्य पीतये ॥

tyān nu ye vi rodasī tastabhur maruto huve | asya somasya pītaye ||

Sanskrit only: no published translation is held for this verse.

त्यं नु मारुतं गणं गिरिष्ठां वृषणं हुवे । अस्य सोमस्य पीतये ॥

tyaṃ nu mārutaṃ gaṇaṃ giriṣṭhāṃ vṛṣaṇaṃ huve | asya somasya pītaye ||

Sanskrit only: no published translation is held for this verse.