Ṛgveda Saṃhitā 8.95

आ त्वा गिरो रथीर् इवास्थुः सुतेषु गिर्वणः । अभि त्वा सम् अनूषतेन्द्र वत्सं न मातरः ॥

ā tvā giro rathīr ivāsthuḥ suteṣu girvaṇaḥ | abhi tvā sam anūṣatendra vatsaṃ na mātaraḥ ||

Sanskrit only: no published translation is held for this verse.

आ त्वा शुक्रा अचुच्यवुः सुतास इन्द्र गिर्वणः । पिबा त्व् अस्यान्धस इन्द्र विश्वासु ते हितम् ॥

ā tvā śukrā acucyavuḥ sutāsa indra girvaṇaḥ | pibā tv asyāndhasa indra viśvāsu te hitam ||

Sanskrit only: no published translation is held for this verse.

पिबा सोमम् मदाय कम् इन्द्र श्येनाभृतं सुतम् । त्वं हि शश्वतीनाम् पती राजा विशाम् असि ॥

pibā somam madāya kam indra śyenābhṛtaṃ sutam | tvaṃ hi śaśvatīnām patī rājā viśām asi ||

Sanskrit only: no published translation is held for this verse.

श्रुधी हवं तिरश्च्या इन्द्र यस् त्वा सपर्यति । सुवीर्यस्य गोमतो रायस् पूर्धि महां असि ॥

śrudhī havaṃ tiraścyā indra yas tvā saparyati | suvīryasya gomato rāyas pūrdhi mahāṃ asi ||

Sanskrit only: no published translation is held for this verse.

इन्द्र यस् ते नवीयसीं गिरम् मन्द्राम् अजीजनत् । चिकित्विन्मनसं धियम् प्रत्नाम् ऋतस्य पिप्युषीम् ॥

indra yas te navīyasīṃ giram mandrām ajījanat | cikitvinmanasaṃ dhiyam pratnām ṛtasya pipyuṣīm ||

Sanskrit only: no published translation is held for this verse.

तम् उ ष्टवाम यं गिर इन्द्रम् उक्थानि वावृधुः । पुरूण्य् अस्य पौंस्या सिषासन्तो वनामहे ॥

tam u ṣṭavāma yaṃ gira indram ukthāni vāvṛdhuḥ | purūṇy asya pauṃsyā siṣāsanto vanāmahe ||

Sanskrit only: no published translation is held for this verse.

एतो न्व् इन्द्रं स्तवाम शुद्धं शुद्धेन साम्ना । शुद्धैर् उक्थैर् वावृध्वांसं शुद्ध आशीर्वान् ममत्तु ॥

eto nv indraṃ stavāma śuddhaṃ śuddhena sāmnā | śuddhair ukthair vāvṛdhvāṃsaṃ śuddha āśīrvān mamattu ||

Sanskrit only: no published translation is held for this verse.

इन्द्र शुद्धो न आ गहि शुद्धः शुद्धाभिर् ऊतिभिः । शुद्धो रयिं नि धारय शुद्धो ममद्धि सोम्यः ॥

indra śuddho na ā gahi śuddhaḥ śuddhābhir ūtibhiḥ | śuddho rayiṃ ni dhāraya śuddho mamaddhi somyaḥ ||

Sanskrit only: no published translation is held for this verse.

इन्द्र शुद्धो हि नो रयिं शुद्धो रत्नानि दाशुषे । शुद्धो वृत्राणि जिघ्नसे शुद्धो वाजं सिषाससि ॥

indra śuddho hi no rayiṃ śuddho ratnāni dāśuṣe | śuddho vṛtrāṇi jighnase śuddho vājaṃ siṣāsasi ||

Sanskrit only: no published translation is held for this verse.