Library·Ṛgveda Saṃhitā·8·8.97
या इन्द्र भुज आभरः स्वर्वां असुरेभ्यः । स्तोतारम् इन् मघवन्न् अस्य वर्धय ये च त्वे वृक्तबर्हिषः ॥
yā indra bhuja ābharaḥ svarvāṃ asurebhyaḥ | stotāram in maghavann asya vardhaya ye ca tve vṛktabarhiṣaḥ ||
Sanskrit only: no published translation is held for this verse.
यम् इन्द्र दधिषे त्वम् अश्वं गाम् भागम् अव्ययम् । यजमाने सुन्वति दक्षिणावति तस्मिन् तं धेहि मा पणौ ॥
yam indra dadhiṣe tvam aśvaṃ gām bhāgam avyayam | yajamāne sunvati dakṣiṇāvati tasmin taṃ dhehi mā paṇau ||
Sanskrit only: no published translation is held for this verse.
य इन्द्र सस्त्य् अव्रतो ऽनुष्वापम् अदेवयुः । स्वैः ष एवैर् मुमुरत् पोष्यं रयिं सनुतर् धेहि तं ततः ॥
ya indra sasty avrato 'nuṣvāpam adevayuḥ | svaiḥ ṣa evair mumurat poṣyaṃ rayiṃ sanutar dhehi taṃ tataḥ ||
Sanskrit only: no published translation is held for this verse.
यच् छक्रासि परावति यद् अर्वावति वृत्रहन् । अतस् त्वा गीर्भिर् द्युगद् इन्द्र केशिभिः सुतावां आ विवासति ॥
yac chakrāsi parāvati yad arvāvati vṛtrahan | atas tvā gīrbhir dyugad indra keśibhiḥ sutāvāṃ ā vivāsati ||
Sanskrit only: no published translation is held for this verse.
यद् वासि रोचने दिवः समुद्रस्याधि विष्टपि । यत् पार्थिवे सदने वृत्रहन्तम यद् अन्तरिक्ष आ गहि ॥
yad vāsi rocane divaḥ samudrasyādhi viṣṭapi | yat pārthive sadane vṛtrahantama yad antarikṣa ā gahi ||
Sanskrit only: no published translation is held for this verse.
स नः सोमेषु सोमपाः सुतेषु शवसस् पते । मादयस्व राधसा सूनृतावतेन्द्र राया परीणसा ॥
sa naḥ someṣu somapāḥ suteṣu śavasas pate | mādayasva rādhasā sūnṛtāvatendra rāyā parīṇasā ||
Sanskrit only: no published translation is held for this verse.
मा न इन्द्र परा वृणग् भवा नः सधमाद्यः । त्वं न ऊती त्वम् इन् न आप्यम् मा न इन्द्र परा वृणक् ॥
mā na indra parā vṛṇag bhavā naḥ sadhamādyaḥ | tvaṃ na ūtī tvam in na āpyam mā na indra parā vṛṇak ||
Sanskrit only: no published translation is held for this verse.
अस्मे इन्द्र सचा सुते नि षदा पीतये मधु । कृधी जरित्रे मघवन्न् अवो महद् अस्मे इन्द्र सचा सुते ॥
asme indra sacā sute ni ṣadā pītaye madhu | kṛdhī jaritre maghavann avo mahad asme indra sacā sute ||
Sanskrit only: no published translation is held for this verse.
न त्वा देवास आशत न मर्त्यासो अद्रिवः । विश्वा जातानि शवसाभिभूर् असि न त्वा देवास आशत ॥
na tvā devāsa āśata na martyāso adrivaḥ | viśvā jātāni śavasābhibhūr asi na tvā devāsa āśata ||
Sanskrit only: no published translation is held for this verse.
विश्वाः पृतना अभिभूतरं नरं सजूस् ततक्षुर् इन्द्रं जजनुश् च राजसे । क्रत्वा वरिष्ठं वर आमुरिम् उतोग्रम् ओजिष्ठं तवसं तरस्विनम् ॥
viśvāḥ pṛtanā abhibhūtaraṃ naraṃ sajūs tatakṣur indraṃ jajanuś ca rājase | kratvā variṣṭhaṃ vara āmurim utogram ojiṣṭhaṃ tavasaṃ tarasvinam ||
Sanskrit only: no published translation is held for this verse.
सम् ईं रेभासो अस्वरन्न् इन्द्रं सोमस्य पीतये । स्वर्पतिं यद् ईं वृधे धृतव्रतो ह्य् ओजसा सम् ऊतिभिः ॥
sam īṃ rebhāso asvarann indraṃ somasya pītaye | svarpatiṃ yad īṃ vṛdhe dhṛtavrato hy ojasā sam ūtibhiḥ ||
Sanskrit only: no published translation is held for this verse.
नेमिं नमन्ति चक्षसा मेषं विप्रा अभिस्वरा । सुदीतयो वो अद्रुहो ऽपि कर्णे तरस्विनः सम् ऋक्वभिः ॥
nemiṃ namanti cakṣasā meṣaṃ viprā abhisvarā | sudītayo vo adruho 'pi karṇe tarasvinaḥ sam ṛkvabhiḥ ||
Sanskrit only: no published translation is held for this verse.
तम् इन्द्रं जोहवीमि मघवानम् उग्रं सत्रा दधानम् अप्रतिष्कुतं शवांसि । मंहिष्ठो गीर्भिर् आ च यज्ञियो ववर्तद् राये नो विश्वा सुपथा कृणोतु वज्री ॥
tam indraṃ johavīmi maghavānam ugraṃ satrā dadhānam apratiṣkutaṃ śavāṃsi | maṃhiṣṭho gīrbhir ā ca yajñiyo vavartad rāye no viśvā supathā kṛṇotu vajrī ||
Sanskrit only: no published translation is held for this verse.
त्वम् पुर इन्द्र चिकिद् एना व्य् ओजसा शविष्ठ शक्र नाशयध्यै । त्वद् विश्वानि भुवनानि वज्रिन् द्यावा रेजेते पृथिवी च भीषा ॥
tvam pura indra cikid enā vy ojasā śaviṣṭha śakra nāśayadhyai | tvad viśvāni bhuvanāni vajrin dyāvā rejete pṛthivī ca bhīṣā ||
Sanskrit only: no published translation is held for this verse.
तन् म ऋतम् इन्द्र शूर चित्र पात्व् अपो न वज्रिन् दुरिताति पर्षि भूरि । कदा न इन्द्र राय आ दशस्येर् विश्वप्स्न्यस्य स्पृहयाय्यस्य राजन् ॥
tan ma ṛtam indra śūra citra pātv apo na vajrin duritāti parṣi bhūri | kadā na indra rāya ā daśasyer viśvapsnyasya spṛhayāyyasya rājan ||
Sanskrit only: no published translation is held for this verse.