Ṛgveda Saṃhitā 8.98

इन्द्राय साम गायत विप्राय बृहते बृहत् । धर्मकृते विपश्चिते पनस्यवे ॥

indrāya sāma gāyata viprāya bṛhate bṛhat | dharmakṛte vipaścite panasyave ||

Sanskrit only: no published translation is held for this verse.

त्वम् इन्द्राभिभूर् असि त्वं सूर्यम् अरोचयः । विश्वकर्मा विश्वदेवो महां असि ॥

tvam indrābhibhūr asi tvaṃ sūryam arocayaḥ | viśvakarmā viśvadevo mahāṃ asi ||

Sanskrit only: no published translation is held for this verse.

विभ्राजञ् ज्योतिषा स्वर् अगच्छो रोचनं दिवः । देवास् त इन्द्र सख्याय येमिरे ॥

vibhrājañ jyotiṣā svar agaccho rocanaṃ divaḥ | devās ta indra sakhyāya yemire ||

Sanskrit only: no published translation is held for this verse.

एन्द्र नो गधि प्रियः सत्राजिद् अगोह्यः । गिरिर् न विश्वतस् पृथुः पतिर् दिवः ॥

endra no gadhi priyaḥ satrājid agohyaḥ | girir na viśvatas pṛthuḥ patir divaḥ ||

Sanskrit only: no published translation is held for this verse.

अभि हि सत्य सोमपा उभे बभूथ रोदसी । इन्द्रासि सुन्वतो वृधः पतिर् दिवः ॥

abhi hi satya somapā ubhe babhūtha rodasī | indrāsi sunvato vṛdhaḥ patir divaḥ ||

Sanskrit only: no published translation is held for this verse.

त्वं हि शश्वतीनाम् इन्द्र दर्ता पुराम् असि । हन्ता दस्योर् मनोर् वृधः पतिर् दिवः ॥

tvaṃ hi śaśvatīnām indra dartā purām asi | hantā dasyor manor vṛdhaḥ patir divaḥ ||

Sanskrit only: no published translation is held for this verse.

अधा हीन्द्र गिर्वण उप त्वा कामान् महः ससृज्महे । उदेव यन्त उदभिः ॥

adhā hīndra girvaṇa upa tvā kāmān mahaḥ sasṛjmahe | udeva yanta udabhiḥ ||

Sanskrit only: no published translation is held for this verse.

वार् ण त्वा यव्याभिर् वर्धन्ति शूर ब्रह्माणि । वावृध्वांसं चिद् अद्रिवो दिवे-दिवे ॥

vār ṇa tvā yavyābhir vardhanti śūra brahmāṇi | vāvṛdhvāṃsaṃ cid adrivo dive-dive ||

Sanskrit only: no published translation is held for this verse.

युञ्जन्ति हरी इषिरस्य गाथयोरौ रथ उरुयुगे । इन्द्रवाहा वचोयुजा ॥

yuñjanti harī iṣirasya gāthayorau ratha uruyuge | indravāhā vacoyujā ||

Sanskrit only: no published translation is held for this verse.

त्वं न इन्द्रा भरं ओजो नृम्णं शतक्रतो विचर्षणे । आ वीरम् पृतनाषहम् ॥

tvaṃ na indrā bharaṃ ojo nṛmṇaṃ śatakrato vicarṣaṇe | ā vīram pṛtanāṣaham ||

Sanskrit only: no published translation is held for this verse.

त्वं हि नः पिता वसो त्वम् माता शतक्रतो बभूविथ । अधा ते सुम्नम् ईमहे ॥

tvaṃ hi naḥ pitā vaso tvam mātā śatakrato babhūvitha | adhā te sumnam īmahe ||

Sanskrit only: no published translation is held for this verse.

त्वां शुष्मिन् पुरुहूत वाजयन्तम् उप ब्रुवे शतक्रतो । स नो रास्व सुवीर्यम् ॥

tvāṃ śuṣmin puruhūta vājayantam upa bruve śatakrato | sa no rāsva suvīryam ||

Sanskrit only: no published translation is held for this verse.