Ṛgveda Saṃhitā 9.111

अया रुचा हरिण्या पुनानो विश्वा द्वेषांसि तरति स्वयुग्वभिः सूरो न स्वयुग्वभिः । धारा सुतस्य रोचते पुनानो अरुषो हरिः । विश्वा यद् रूपा परियात्य् ऋक्वभिः सप्तास्येभिर् ऋक्वभिः ॥

ayā rucā hariṇyā punāno viśvā dveṣāṃsi tarati svayugvabhiḥ sūro na svayugvabhiḥ | dhārā sutasya rocate punāno aruṣo hariḥ | viśvā yad rūpā pariyāty ṛkvabhiḥ saptāsyebhir ṛkvabhiḥ ||

Sanskrit only: no published translation is held for this verse.

त्वं त्यत् पणीनां विदो वसु सम् मातृभिर् मर्जयसि स्व आ दम ऋतस्य धीतिभिर् दमे । परावतो न साम तद् यत्रा रणन्ति धीतयः । त्रिधातुभिर् अरुषीभिर् वयो दधे रोचमानो वयो दधे ॥

tvaṃ tyat paṇīnāṃ vido vasu sam mātṛbhir marjayasi sva ā dama ṛtasya dhītibhir dame | parāvato na sāma tad yatrā raṇanti dhītayaḥ | tridhātubhir aruṣībhir vayo dadhe rocamāno vayo dadhe ||

Sanskrit only: no published translation is held for this verse.

पूर्वाम् अनु प्रदिशं याति चेकितत् सं रश्मिभिर् यतते दर्शतो रथो दैव्यो दर्शतो रथः । अग्मन्न् उक्थानि पौंस्येन्द्रं जैत्राय हर्षयन् । वज्रश् च यद् भवथो अनपच्युता समत्स्व् अनपच्युता ॥

pūrvām anu pradiśaṃ yāti cekitat saṃ raśmibhir yatate darśato ratho daivyo darśato rathaḥ | agmann ukthāni pauṃsyendraṃ jaitrāya harṣayan | vajraś ca yad bhavatho anapacyutā samatsv anapacyutā ||

Sanskrit only: no published translation is held for this verse.