Ṛgveda Saṃhitā 9.93

साकमुक्षो मर्जयन्त स्वसारो दश धीरस्य धीतयो धनुत्रीः । हरिः पर्य् अद्रवज् जाः सूर्यस्य द्रोणं ननक्षे अत्यो न वाजी ॥

sākamukṣo marjayanta svasāro daśa dhīrasya dhītayo dhanutrīḥ | hariḥ pary adravaj jāḥ sūryasya droṇaṃ nanakṣe atyo na vājī ||

Sanskrit only: no published translation is held for this verse.

सम् मातृभिर् न शिशुर् वावशानो वृषा दधन्वे पुरुवारो अद्भिः । मर्यो न योषाम् अभि निष्कृतं यन् सं गच्छते कलश उस्रियाभिः ॥

sam mātṛbhir na śiśur vāvaśāno vṛṣā dadhanve puruvāro adbhiḥ | maryo na yoṣām abhi niṣkṛtaṃ yan saṃ gacchate kalaśa usriyābhiḥ ||

Sanskrit only: no published translation is held for this verse.

उत प्र पिप्य ऊधर् अघ्न्याया इन्दुर् धाराभिः सचते सुमेधाः । मूर्धानं गावः पयसा चमूष्व् अभि श्रीणन्ति वसुभिर् न निक्तैः ॥

uta pra pipya ūdhar aghnyāyā indur dhārābhiḥ sacate sumedhāḥ | mūrdhānaṃ gāvaḥ payasā camūṣv abhi śrīṇanti vasubhir na niktaiḥ ||

Sanskrit only: no published translation is held for this verse.

स नो देवेभिः पवमान रदेन्दो रयिम् अश्विनं वावशानः । रथिरायताम् उशती पुरन्धिर् अस्मद्र्यग् आ दावने वसूनाम् ॥

sa no devebhiḥ pavamāna radendo rayim aśvinaṃ vāvaśānaḥ | rathirāyatām uśatī purandhir asmadryag ā dāvane vasūnām ||

Sanskrit only: no published translation is held for this verse.

नू नो रयिम् उप मास्व नृवन्तम् पुनानो वाताप्यं विश्वश्चन्द्रम् । प्र वन्दितुर् इन्दो तार्य् आयुः प्रातर् मक्षू धियावसुर् जगम्यात् ॥

nū no rayim upa māsva nṛvantam punāno vātāpyaṃ viśvaścandram | pra vanditur indo tāry āyuḥ prātar makṣū dhiyāvasur jagamyāt ||

Sanskrit only: no published translation is held for this verse.