Vālmīki Rāmāyaṇa (critical edition) 1.48

अफलस् तु ततः शक्रो देवान् अग्निपुरोगमान् अब्रवीत् त्रस्तवदनः सर्षिसंघान् सचारणान्

aphalas tu tataḥ śakro devān agnipurogamān abravīt trastavadanaḥ sarṣisaṃghān sacāraṇān

Sanskrit only: no published translation is held for this verse.

कुर्वता तपसो विघ्नं गौतमस्य महात्मनः क्रोधम् उत्पाद्य हि मया सुरकार्यम् इदं कृतम्

kurvatā tapaso vighnaṃ gautamasya mahātmanaḥ krodham utpādya hi mayā surakāryam idaṃ kṛtam

Sanskrit only: no published translation is held for this verse.

अफलो ऽस्मि कृतस् तेन क्रोधात् सा च निराकृता शापमोक्षेण महता तपो ऽस्यापहृतं मया

aphalo 'smi kṛtas tena krodhāt sā ca nirākṛtā śāpamokṣeṇa mahatā tapo 'syāpahṛtaṃ mayā

Sanskrit only: no published translation is held for this verse.

तन् मां सुरवराः सर्वे सर्षिसंघाः सचारणाः सुरसाह्यकरं सर्वे सफलं कर्तुम् अर्हथ

tan māṃ suravarāḥ sarve sarṣisaṃghāḥ sacāraṇāḥ surasāhyakaraṃ sarve saphalaṃ kartum arhatha

Sanskrit only: no published translation is held for this verse.

शतक्रतोर् वचः श्रुत्वा देवाः साग्निपुरोगमाः पितृदेवान् उपेत्याहुः सह सर्वैर् मरुद्गणैः

śatakrator vacaḥ śrutvā devāḥ sāgnipurogamāḥ pitṛdevān upetyāhuḥ saha sarvair marudgaṇaiḥ

Sanskrit only: no published translation is held for this verse.

अयं मेषः सवृषणः शक्रो ह्य् अवृषणः कृतः मेषस्य वृषणौ गृह्य शक्रायाशु प्रयच्छत

ayaṃ meṣaḥ savṛṣaṇaḥ śakro hy avṛṣaṇaḥ kṛtaḥ meṣasya vṛṣaṇau gṛhya śakrāyāśu prayacchata

Sanskrit only: no published translation is held for this verse.

अफलस् तु कृतो मेषः परां तुष्टिं प्रदास्यति भवतां हर्षणार्थाय ये च दास्यन्ति मानवाः

aphalas tu kṛto meṣaḥ parāṃ tuṣṭiṃ pradāsyati bhavatāṃ harṣaṇārthāya ye ca dāsyanti mānavāḥ

Sanskrit only: no published translation is held for this verse.

अग्नेस् तु वचनं श्रुत्वा पितृदेवाः समागताः उत्पाट्य मेषवृषणौ सहस्राक्षे न्यवेदयन्

agnes tu vacanaṃ śrutvā pitṛdevāḥ samāgatāḥ utpāṭya meṣavṛṣaṇau sahasrākṣe nyavedayan

Sanskrit only: no published translation is held for this verse.

तदा प्रभृति काकुत्स्थ पितृदेवाः समागताः अफलान् भुञ्जते मेषान् फलैस् तेषाम् अयोजयन्

tadā prabhṛti kākutstha pitṛdevāḥ samāgatāḥ aphalān bhuñjate meṣān phalais teṣām ayojayan

Sanskrit only: no published translation is held for this verse.

इन्द्रस् तु मेषवृषणस् तदा प्रभृति राघव गौतमस्य प्रभावेन तपसश् च महात्मनः

indras tu meṣavṛṣaṇas tadā prabhṛti rāghava gautamasya prabhāvena tapasaś ca mahātmanaḥ

Sanskrit only: no published translation is held for this verse.

तदागच्छ महातेज आश्रमं पुण्यकर्मणः तारयैनां महाभागाम् अहल्यां देवरूपिणीम्

tadāgaccha mahāteja āśramaṃ puṇyakarmaṇaḥ tārayaināṃ mahābhāgām ahalyāṃ devarūpiṇīm

Sanskrit only: no published translation is held for this verse.

विश्वामित्रवचः श्रुत्वा राघवः सहलक्ष्मणः विश्वामित्रं पुरस्कृत्य आश्रमं प्रविवेश ह

viśvāmitravacaḥ śrutvā rāghavaḥ sahalakṣmaṇaḥ viśvāmitraṃ puraskṛtya āśramaṃ praviveśa ha

Sanskrit only: no published translation is held for this verse.

ददर्श च महाभागां तपसा द्योतितप्रभाम् लोकैर् अपि समागम्य दुर्निरीक्ष्यां सुरासुरैः

dadarśa ca mahābhāgāṃ tapasā dyotitaprabhām lokair api samāgamya durnirīkṣyāṃ surāsuraiḥ

Sanskrit only: no published translation is held for this verse.

प्रयत्नान् निर्मितां धात्रा दिव्यां मायामयीम् इव धूमेनाभिपरीताङ्गीं पूर्णचन्द्रप्रभाम् इव

prayatnān nirmitāṃ dhātrā divyāṃ māyāmayīm iva dhūmenābhiparītāṅgīṃ pūrṇacandraprabhām iva

Sanskrit only: no published translation is held for this verse.

सतुषारावृतां साभ्रां पूर्णचन्द्रप्रभाम् इव मध्ये ऽम्भसो दुराधर्षां दीप्तां सूर्यप्रभाम् इव

satuṣārāvṛtāṃ sābhrāṃ pūrṇacandraprabhām iva madhye 'mbhaso durādharṣāṃ dīptāṃ sūryaprabhām iva

Sanskrit only: no published translation is held for this verse.

स हि गौतमवाक्येन दुर्निरीक्ष्या बभूव ह त्रयाणाम् अपि लोकानां यावद् रामस्य दर्शनम्

sa hi gautamavākyena durnirīkṣyā babhūva ha trayāṇām api lokānāṃ yāvad rāmasya darśanam

Sanskrit only: no published translation is held for this verse.

राघवौ तु ततस् तस्याः पादौ जगृहतुस् तदा स्मरन्ती गौतमवचः प्रतिजग्राह सा च तौ

rāghavau tu tatas tasyāḥ pādau jagṛhatus tadā smarantī gautamavacaḥ pratijagrāha sā ca tau

Sanskrit only: no published translation is held for this verse.

पाद्यम् अर्घ्यं तथातिथ्यं चकार सुसमाहिता प्रतिजग्राह काकुत्स्थो विधिदृष्टेन कर्मणा

pādyam arghyaṃ tathātithyaṃ cakāra susamāhitā pratijagrāha kākutstho vidhidṛṣṭena karmaṇā

Sanskrit only: no published translation is held for this verse.

पुष्पवृष्टिर् महत्य् आसीद् देवदुन्दुभिनिस्वनैः गन्धर्वाप्सरसां चापि महान् आसीत् समागमः

puṣpavṛṣṭir mahaty āsīd devadundubhinisvanaiḥ gandharvāpsarasāṃ cāpi mahān āsīt samāgamaḥ

Sanskrit only: no published translation is held for this verse.

साधु साध्व् इति देवास् ताम् अहल्यां समपूजयन् तपोबलविशुद्धाङ्गीं गौतमस्य वशानुगाम्

sādhu sādhv iti devās tām ahalyāṃ samapūjayan tapobalaviśuddhāṅgīṃ gautamasya vaśānugām

Sanskrit only: no published translation is held for this verse.

गौतमो ऽपि महातेजा अहल्यासहितः सुखी रामं संपूज्य विधिवत् तपस् तेपे महातपाः

gautamo 'pi mahātejā ahalyāsahitaḥ sukhī rāmaṃ saṃpūjya vidhivat tapas tepe mahātapāḥ

Sanskrit only: no published translation is held for this verse.

रामो ऽपि परमां पूजां गौतमस्य महामुनेः सकाशाद् विधिवत् प्राप्य जगाम मिथिलां ततः

rāmo 'pi paramāṃ pūjāṃ gautamasya mahāmuneḥ sakāśād vidhivat prāpya jagāma mithilāṃ tataḥ

Sanskrit only: no published translation is held for this verse.