Vālmīki Rāmāyaṇa (critical edition) 1.67

जनकेन समादिष्टा दूतास् ते क्लान्तवाहनाः त्रिरात्रम् उषित्वा मार्गे ते ऽयोध्यां प्राविशन् पुरीम्

janakena samādiṣṭā dūtās te klāntavāhanāḥ trirātram uṣitvā mārge te 'yodhyāṃ prāviśan purīm

Sanskrit only: no published translation is held for this verse.

ते राजवचनाद् दूता राजवेश्मप्रवेशिताः ददृशुर् देवसंकाशं वृद्धं दशरथं नृपम्

te rājavacanād dūtā rājaveśmapraveśitāḥ dadṛśur devasaṃkāśaṃ vṛddhaṃ daśarathaṃ nṛpam

Sanskrit only: no published translation is held for this verse.

बद्धाञ्जलिपुटाः सर्वे दूता विगतसाध्वसाः राजानं प्रयता वाक्यम् अब्रुवन् मधुराक्षरम्

baddhāñjalipuṭāḥ sarve dūtā vigatasādhvasāḥ rājānaṃ prayatā vākyam abruvan madhurākṣaram

Sanskrit only: no published translation is held for this verse.

मैथिलो जनको राजा साग्निहोत्रपुरस्कृतः कुशलं चाव्ययं चैव सोपाध्यायपुरोहितम्

maithilo janako rājā sāgnihotrapuraskṛtaḥ kuśalaṃ cāvyayaṃ caiva sopādhyāyapurohitam

Sanskrit only: no published translation is held for this verse.

मुहुर् मुहुर् मधुरया स्नेहसंयुक्तया गिरा जनकस् त्वां महाराज पृच्छते सपुरःसरम्

muhur muhur madhurayā snehasaṃyuktayā girā janakas tvāṃ mahārāja pṛcchate sapuraḥsaram

Sanskrit only: no published translation is held for this verse.

पृष्ट्वा कुशलम् अव्यग्रं वैदेहो मिथिलाधिपः कौशिकानुमते वाक्यं भवन्तम् इदम् अब्रवीत्

pṛṣṭvā kuśalam avyagraṃ vaideho mithilādhipaḥ kauśikānumate vākyaṃ bhavantam idam abravīt

Sanskrit only: no published translation is held for this verse.

पूर्वं प्रतिज्ञा विदिता वीर्यशुल्का ममात्मजा राजानश् च कृतामर्षा निर्वीर्या विमुखीकृताः

pūrvaṃ pratijñā viditā vīryaśulkā mamātmajā rājānaś ca kṛtāmarṣā nirvīryā vimukhīkṛtāḥ

Sanskrit only: no published translation is held for this verse.

सेयं मम सुता राजन् विश्वामित्र पुरःसरैः यदृच्छयागतैर् वीरैर् निर्जिता तव पुत्रकैः

seyaṃ mama sutā rājan viśvāmitra puraḥsaraiḥ yadṛcchayāgatair vīrair nirjitā tava putrakaiḥ

Sanskrit only: no published translation is held for this verse.

तच् च राजन् धनुर् दिव्यं मध्ये भग्नं महात्मना रामेण हि महाराज महत्यां जनसंसदि

tac ca rājan dhanur divyaṃ madhye bhagnaṃ mahātmanā rāmeṇa hi mahārāja mahatyāṃ janasaṃsadi

Sanskrit only: no published translation is held for this verse.

अस्मै देया मया सीता वीर्यशुल्का महात्मने प्रतिज्ञां तर्तुम् इच्छामि तद् अनुज्ञातुम् अर्हसि

asmai deyā mayā sītā vīryaśulkā mahātmane pratijñāṃ tartum icchāmi tad anujñātum arhasi

Sanskrit only: no published translation is held for this verse.

सोपाध्यायो महाराज पुरोहितपुरस्कृतः शीघ्रम् आगच्छ भद्रं ते द्रष्टुम् अर्हसि राघवौ

sopādhyāyo mahārāja purohitapuraskṛtaḥ śīghram āgaccha bhadraṃ te draṣṭum arhasi rāghavau

Sanskrit only: no published translation is held for this verse.

प्रीतिं च मम राजेन्द्र निर्वर्तयितुम् अर्हसि पुत्रयोर् उभयोर् एव प्रीतिं त्वम् अपि लप्स्यसे

prītiṃ ca mama rājendra nirvartayitum arhasi putrayor ubhayor eva prītiṃ tvam api lapsyase

Sanskrit only: no published translation is held for this verse.

एवं विदेहाधिपतिर् मधुरं वाक्यम् अब्रवीत् विश्वामित्राभ्यनुज्ञातः शतानन्दमते स्थितः

evaṃ videhādhipatir madhuraṃ vākyam abravīt viśvāmitrābhyanujñātaḥ śatānandamate sthitaḥ

Sanskrit only: no published translation is held for this verse.

दूतवाक्यं तु तच् छ्रुत्वा राजा परमहर्षितः वसिष्ठं वामदेवं च मन्त्रिणो ऽन्यांश् च सो ऽब्रवीत्

dūtavākyaṃ tu tac chrutvā rājā paramaharṣitaḥ vasiṣṭhaṃ vāmadevaṃ ca mantriṇo 'nyāṃś ca so 'bravīt

Sanskrit only: no published translation is held for this verse.

गुप्तः कुशिकपुत्रेण कौसल्यानन्दवर्धनः लक्ष्मणेन सह भ्रात्रा विदेहेषु वसत्य् असौ

guptaḥ kuśikaputreṇa kausalyānandavardhanaḥ lakṣmaṇena saha bhrātrā videheṣu vasaty asau

Sanskrit only: no published translation is held for this verse.

दृष्टवीर्यस् तु काकुत्स्थो जनकेन महात्मना संप्रदानं सुतायास् तु राघवे कर्तुम् इच्छति

dṛṣṭavīryas tu kākutstho janakena mahātmanā saṃpradānaṃ sutāyās tu rāghave kartum icchati

Sanskrit only: no published translation is held for this verse.

यदि वो रोचते वृत्तं जनकस्य महात्मनः पुरीं गच्छामहे शीघ्रं मा भूत् कालस्य पर्ययः

yadi vo rocate vṛttaṃ janakasya mahātmanaḥ purīṃ gacchāmahe śīghraṃ mā bhūt kālasya paryayaḥ

Sanskrit only: no published translation is held for this verse.

मन्त्रिणो बाढम् इत्य् आहुः सह सर्वैर् महर्षिभिः सुप्रीतश् चाब्रवीद् राजा श्वो यात्रेति स मन्त्रिणः

mantriṇo bāḍham ity āhuḥ saha sarvair maharṣibhiḥ suprītaś cābravīd rājā śvo yātreti sa mantriṇaḥ

Sanskrit only: no published translation is held for this verse.

मन्त्रिणस् तु नरेन्द्रस्य रात्रिं परमसत्कृताः ऊषुः प्रमुदिताः सर्वे गुणैः सर्वैः समन्विताः

mantriṇas tu narendrasya rātriṃ paramasatkṛtāḥ ūṣuḥ pramuditāḥ sarve guṇaiḥ sarvaiḥ samanvitāḥ

Sanskrit only: no published translation is held for this verse.