Vālmīki Rāmāyaṇa (critical edition) 2.22

सापनीय तम् आयासम् उपस्पृश्य जलं शुचि । चकार माता रामस्य मङ्गलानि मनस्विनी

sāpanīya tam āyāsam upaspṛśya jalaṃ śuci / cakāra mātā rāmasya maṅgalāni manasvinī

Sanskrit only: no published translation is held for this verse.

स्वस्ति साध्याश् च विश्वे च मरुतश् च महर्षयः । स्वस्ति धाता विधाता च स्वस्ति पूषा भगो ऽर्यमा

svasti sādhyāś ca viśve ca marutaś ca maharṣayaḥ / svasti dhātā vidhātā ca svasti pūṣā bhago 'ryamā

Sanskrit only: no published translation is held for this verse.

ऋतवश् चैव पक्षाश् च मासाः संवत्सराः क्षपाः । दिनानि च मुहूर्ताश् च स्वस्ति कुर्वन्तु ते सदा

ṛtavaś caiva pakṣāś ca māsāḥ saṃvatsarāḥ kṣapāḥ / dināni ca muhūrtāś ca svasti kurvantu te sadā

Sanskrit only: no published translation is held for this verse.

स्मृतिर् धृतिश् च धर्मश् च पान्तु त्वां पुत्र सर्वतः । स्कन्दश् च भगवान् देवः सोमश् च सबृहस्पतिः

smṛtir dhṛtiś ca dharmaś ca pāntu tvāṃ putra sarvataḥ / skandaś ca bhagavān devaḥ somaś ca sabṛhaspatiḥ

Sanskrit only: no published translation is held for this verse.

सप्तर्षयो नारदश् च ते त्वां रक्षन्तु सर्वतः । नक्षत्राणि च सर्वाणि ग्रहाश् च सहदेवताः । महावनानि चरतो मुनिवेषस्य धीमतः

saptarṣayo nāradaś ca te tvāṃ rakṣantu sarvataḥ / nakṣatrāṇi ca sarvāṇi grahāś ca sahadevatāḥ / mahāvanāni carato muniveṣasya dhīmataḥ

Sanskrit only: no published translation is held for this verse.

प्लवगा वृश्चिका दंशा मशकाश् चैव कानने । सरीसृपाश् च कीटाश् च मा भूवन् गहने तव

plavagā vṛścikā daṃśā maśakāś caiva kānane / sarīsṛpāś ca kīṭāś ca mā bhūvan gahane tava

Sanskrit only: no published translation is held for this verse.

महाद्विपाश् च सिंहाश् च व्याघ्रा ऋक्षाश् च दंष्ट्रिणः । महिषाः शृङ्गिणो रौद्रा न ते द्रुह्यन्तु पुत्रक

mahādvipāś ca siṃhāś ca vyāghrā ṛkṣāś ca daṃṣṭriṇaḥ / mahiṣāḥ śṛṅgiṇo raudrā na te druhyantu putraka

Sanskrit only: no published translation is held for this verse.

नृमांसभोजना रौद्रा ये चान्ये सत्त्वजातयः । मा च त्वां हिंसिषुः पुत्र मया सम्पूजितास् त्व् इह

nṛmāṃsabhojanā raudrā ye cānye sattvajātayaḥ / mā ca tvāṃ hiṃsiṣuḥ putra mayā sampūjitās tv iha

Sanskrit only: no published translation is held for this verse.

आगमास् ते शिवाः सन्तु सिध्यन्तु च पराक्रमाः । सर्वसम्पत्तयो राम स्वस्तिमान् गच्छ पुत्रक

āgamās te śivāḥ santu sidhyantu ca parākramāḥ / sarvasampattayo rāma svastimān gaccha putraka

Sanskrit only: no published translation is held for this verse.

स्वस्ति ते ऽस्त्व् आन्तरिक्षेभ्यः पार्थिवेभ्यः पुनः पुनः । सर्वेभ्यश् चैव देवेभ्यो ये च ते परिपन्थिनः

svasti te 'stv āntarikṣebhyaḥ pārthivebhyaḥ punaḥ punaḥ / sarvebhyaś caiva devebhyo ye ca te paripanthinaḥ

Sanskrit only: no published translation is held for this verse.

सर्वलोकप्रभुर् ब्रह्मा भूतभर्ता तथर्षयः । ये च शेषाः सुरास् ते त्वां रक्षन्तु वनवासिनम्

sarvalokaprabhur brahmā bhūtabhartā tatharṣayaḥ / ye ca śeṣāḥ surās te tvāṃ rakṣantu vanavāsinam

Sanskrit only: no published translation is held for this verse.

इति माल्यैः सुरगणान् गन्धैश् चापि यशस्विनी । स्तुतिभिश् चानुरूपाभिर् आनर्चायतलोचना

iti mālyaiḥ suragaṇān gandhaiś cāpi yaśasvinī / stutibhiś cānurūpābhir ānarcāyatalocanā

Sanskrit only: no published translation is held for this verse.

यन् मङ्गलं सहस्राक्षे सर्वदेवनमस्कृते । वृत्रनाशे समभवत् तत् ते भवतु मङ्गलम्

yan maṅgalaṃ sahasrākṣe sarvadevanamaskṛte / vṛtranāśe samabhavat tat te bhavatu maṅgalam

Sanskrit only: no published translation is held for this verse.

यन् मङ्गलं सुपर्णस्य विनताकल्पयत् पुरा । अमृतं प्रार्थयानस्य तत् ते भवतु मङ्गलम्

yan maṅgalaṃ suparṇasya vinatākalpayat purā / amṛtaṃ prārthayānasya tat te bhavatu maṅgalam

Sanskrit only: no published translation is held for this verse.

ओषधीं चापि सिद्धार्थां विशल्यकरणीं शुभाम् । चकार रक्षां कौसल्या मन्त्रैर् अभिजजाप च

oṣadhīṃ cāpi siddhārthāṃ viśalyakaraṇīṃ śubhām / cakāra rakṣāṃ kausalyā mantrair abhijajāpa ca

Sanskrit only: no published translation is held for this verse.

आनम्य मूर्ध्नि चाघ्राय परिष्वज्य यशस्विनी । अवदत् पुत्र सिद्धार्थो गच्छ राम यथासुखम्

ānamya mūrdhni cāghrāya pariṣvajya yaśasvinī / avadat putra siddhārtho gaccha rāma yathāsukham

Sanskrit only: no published translation is held for this verse.

अरोगं सर्वसिद्धार्थम् अयोध्यां पुनर् आगतम् । पश्यामि त्वां सुखं वत्स सुस्थितं राजवेश्मनि

arogaṃ sarvasiddhārtham ayodhyāṃ punar āgatam / paśyāmi tvāṃ sukhaṃ vatsa susthitaṃ rājaveśmani

Sanskrit only: no published translation is held for this verse.

मयार्चिता देवगणाः शिवादयो महर्षयो भूतमहासुरोरगाः । अभिप्रयातस्य वनं चिराय ते हितानि काङ्क्षन्तु दिशश् च राघव

mayārcitā devagaṇāḥ śivādayo maharṣayo bhūtamahāsuroragāḥ / abhiprayātasya vanaṃ cirāya te hitāni kāṅkṣantu diśaś ca rāghava

Sanskrit only: no published translation is held for this verse.

इतीव चाश्रुप्रतिपूर्णलोचना समाप्य च स्वस्त्ययनं यथाविधि । प्रदक्षिणं चैव चकार राघवं पुनः पुनश् चापि निपीड्य सस्वजे

itīva cāśrupratipūrṇalocanā samāpya ca svastyayanaṃ yathāvidhi / pradakṣiṇaṃ caiva cakāra rāghavaṃ punaḥ punaś cāpi nipīḍya sasvaje

Sanskrit only: no published translation is held for this verse.

तथा तु देव्या स कृतप्रदक्षिणो निपीड्य मातुश् चरणौ पुनः पुनः । जगाम सीतानिलयं महायशाः स राघवः प्रज्वलितः स्वया श्रिया

tathā tu devyā sa kṛtapradakṣiṇo nipīḍya mātuś caraṇau punaḥ punaḥ / jagāma sītānilayaṃ mahāyaśāḥ sa rāghavaḥ prajvalitaḥ svayā śriyā

Sanskrit only: no published translation is held for this verse.