Vālmīki Rāmāyaṇa (critical edition) 2.28

ततो ऽब्रवीन् महातेजा रामो लक्ष्मणम् अग्रतः । स्थितं प्राग्गामिनं वीरं याचमानं कृताञ्जलिम्

tato 'bravīn mahātejā rāmo lakṣmaṇam agrataḥ / sthitaṃ prāggāminaṃ vīraṃ yācamānaṃ kṛtāñjalim

Sanskrit only: no published translation is held for this verse.

मयाद्य सह सौमित्रे त्वयि गच्छति तद् वनम् । को भरिष्यति कौसल्यां सुमित्रां वा यशस्विनीम्

mayādya saha saumitre tvayi gacchati tad vanam / ko bhariṣyati kausalyāṃ sumitrāṃ vā yaśasvinīm

Sanskrit only: no published translation is held for this verse.

अभिवर्षति कामैर् यः पर्जन्यः पृथिवीम् इव । स कामपाशपर्यस्तो महातेजा महीपतिः

abhivarṣati kāmair yaḥ parjanyaḥ pṛthivīm iva / sa kāmapāśaparyasto mahātejā mahīpatiḥ

Sanskrit only: no published translation is held for this verse.

सा हि राज्यम् इदं प्राप्य नृपस्याश्वपतेः सुता । दुःखितानां सपत्नीनां न करिष्यति शोभनम्

sā hi rājyam idaṃ prāpya nṛpasyāśvapateḥ sutā / duḥkhitānāṃ sapatnīnāṃ na kariṣyati śobhanam

Sanskrit only: no published translation is held for this verse.

एवम् उक्तस् तु रामेण लक्ष्मणः श्लक्ष्णया गिरा । प्रत्युवाच तदा रामं वाक्यज्ञो वाक्यकोविदम्

evam uktas tu rāmeṇa lakṣmaṇaḥ ślakṣṇayā girā / pratyuvāca tadā rāmaṃ vākyajño vākyakovidam

Sanskrit only: no published translation is held for this verse.

तवैव तेजसा वीर भरतः पूजयिष्यति । कौसल्यां च सुमित्रां च प्रयतो नात्र संशयः

tavaiva tejasā vīra bharataḥ pūjayiṣyati / kausalyāṃ ca sumitrāṃ ca prayato nātra saṃśayaḥ

Sanskrit only: no published translation is held for this verse.

कौसल्या बिभृयाद् आर्या सहस्रम् अपि मद्विधान् । यस्याः सहस्रं ग्रामाणां सम्प्राप्तम् उपजीवनम्

kausalyā bibhṛyād āryā sahasram api madvidhān / yasyāḥ sahasraṃ grāmāṇāṃ samprāptam upajīvanam

Sanskrit only: no published translation is held for this verse.

धनुर् आदाय सशरं खनित्रपिटकाधरः । अग्रतस् ते गमिष्यामि पन्थानम् अनुदर्शयन्

dhanur ādāya saśaraṃ khanitrapiṭakādharaḥ / agratas te gamiṣyāmi panthānam anudarśayan

Sanskrit only: no published translation is held for this verse.

आहरिष्यामि ते नित्यं मूलानि च फलानि च । वन्यानि यानि चान्यानि स्वाहाराणि तपस्विनाम्

āhariṣyāmi te nityaṃ mūlāni ca phalāni ca / vanyāni yāni cānyāni svāhārāṇi tapasvinām

Sanskrit only: no published translation is held for this verse.

भवांस् तु सह वैदेह्या गिरिसानुषु रंस्यते । अहं सर्वं करिष्यामि जाग्रतः स्वपतश् च ते

bhavāṃs tu saha vaidehyā girisānuṣu raṃsyate / ahaṃ sarvaṃ kariṣyāmi jāgrataḥ svapataś ca te

Sanskrit only: no published translation is held for this verse.

रामस् त्व् अनेन वाक्येन सुप्रीतः प्रत्युवाच तम् । व्रजापृच्छस्व सौमित्रे सर्वम् एव सुहृज्जनम्

rāmas tv anena vākyena suprītaḥ pratyuvāca tam / vrajāpṛcchasva saumitre sarvam eva suhṛjjanam

Sanskrit only: no published translation is held for this verse.

ये च राज्ञो ददौ दिव्ये महात्मा वरुणः स्वयम् । जनकस्य महायज्ञे धनुषी रौद्रदर्शने

ye ca rājño dadau divye mahātmā varuṇaḥ svayam / janakasya mahāyajñe dhanuṣī raudradarśane

Sanskrit only: no published translation is held for this verse.

अभेद्यकवचे दिव्ये तूणी चाक्षयसायकौ । आदित्यविमलौ चोभौ खड्गौ हेमपरिष्कृतौ

abhedyakavace divye tūṇī cākṣayasāyakau / ādityavimalau cobhau khaḍgau hemapariṣkṛtau

Sanskrit only: no published translation is held for this verse.

सत्कृत्य निहितं सर्वम् एतद् आचार्यसद्मनि । स त्वम् आयुधम् आदाय क्षिप्रम् आव्रज लक्ष्मण

satkṛtya nihitaṃ sarvam etad ācāryasadmani / sa tvam āyudham ādāya kṣipram āvraja lakṣmaṇa

Sanskrit only: no published translation is held for this verse.

स सुहृज्जनम् आमन्त्र्य वनवासाय निश्चितः । इक्ष्वाकुगुरुम् आमन्त्र्य जग्राहायुधम् उत्तमम्

sa suhṛjjanam āmantrya vanavāsāya niścitaḥ / ikṣvākugurum āmantrya jagrāhāyudham uttamam

Sanskrit only: no published translation is held for this verse.

तद् दिव्यं राजशार्दूलः सत्कृतं माल्यभूषितम् । रामाय दर्शयामास सौमित्रिः सर्वम् आयुधम्

tad divyaṃ rājaśārdūlaḥ satkṛtaṃ mālyabhūṣitam / rāmāya darśayāmāsa saumitriḥ sarvam āyudham

Sanskrit only: no published translation is held for this verse.

तम् उवाचात्मवान् रामः प्रीत्या लक्ष्मणम् आगतम् । काले त्वम् आगतः सौम्य काङ्क्षिते मम लक्ष्मण

tam uvācātmavān rāmaḥ prītyā lakṣmaṇam āgatam / kāle tvam āgataḥ saumya kāṅkṣite mama lakṣmaṇa

Sanskrit only: no published translation is held for this verse.

अहं प्रदातुम् इच्छामि यद् इदं मामकं धनम् । ब्राह्मणेभ्यस् तपस्विभ्यस् त्वया सह परंतप

ahaṃ pradātum icchāmi yad idaṃ māmakaṃ dhanam / brāhmaṇebhyas tapasvibhyas tvayā saha paraṃtapa

Sanskrit only: no published translation is held for this verse.

वसन्तीह दृढं भक्त्या गुरुषु द्विजसत्तमाः । तेषाम् अपि च मे भूयः सर्वेषां चोपजीविनाम्

vasantīha dṛḍhaṃ bhaktyā guruṣu dvijasattamāḥ / teṣām api ca me bhūyaḥ sarveṣāṃ copajīvinām

Sanskrit only: no published translation is held for this verse.

वसिष्ठपुत्रं तु सुयज्ञम् आर्यं त्वम् आनयाशु प्रवरं द्विजानाम् । अभिप्रयास्यामि वनं समस्तान् अभ्यर्च्य शिष्टान् अपरान् द्विजातीन्

vasiṣṭhaputraṃ tu suyajñam āryaṃ tvam ānayāśu pravaraṃ dvijānām / abhiprayāsyāmi vanaṃ samastān abhyarcya śiṣṭān aparān dvijātīn

Sanskrit only: no published translation is held for this verse.