Vālmīki Rāmāyaṇa (critical edition) 2.43

रामो ऽपि रात्रिशेषेण तेनैव महद् अन्तरम् । जगाम पुरुषव्याघ्रः पितुर् आज्ञाम् अनुस्मरन्

rāmo 'pi rātriśeṣeṇa tenaiva mahad antaram / jagāma puruṣavyāghraḥ pitur ājñām anusmaran

Sanskrit only: no published translation is held for this verse.

तथैव गच्छतस् तस्य व्यपायाद् रजनी शिवा । उपास्य स शिवां संध्यां विषयान्तं व्यगाहत

tathaiva gacchatas tasya vyapāyād rajanī śivā / upāsya sa śivāṃ saṃdhyāṃ viṣayāntaṃ vyagāhata

Sanskrit only: no published translation is held for this verse.

ग्रामान् विकृष्टसीमांस् तान् पुष्पितानि वनानि च । पश्यन्न् अतिययौ शीघ्रं शरैर् इव हयोत्तमैः

grāmān vikṛṣṭasīmāṃs tān puṣpitāni vanāni ca / paśyann atiyayau śīghraṃ śarair iva hayottamaiḥ

Sanskrit only: no published translation is held for this verse.

शृण्वन् वाचो मनुष्याणां ग्रामसंवासवासिनाम् । राजानं धिग् दशरथं कामस्य वशम् आगतम्

śṛṇvan vāco manuṣyāṇāṃ grāmasaṃvāsavāsinām / rājānaṃ dhig daśarathaṃ kāmasya vaśam āgatam

Sanskrit only: no published translation is held for this verse.

हा नृशंसाद्य कैकेयी पापा पापानुबन्धिनी । तीक्ष्णा संभिन्नमर्यादा तीक्ष्णे कर्मणि वर्तते

hā nṛśaṃsādya kaikeyī pāpā pāpānubandhinī / tīkṣṇā saṃbhinnamaryādā tīkṣṇe karmaṇi vartate

Sanskrit only: no published translation is held for this verse.

या पुत्रम् ईदृशं राज्ञः प्रवासयति धार्मिकम् । वनवासे महाप्राज्ञं सानुक्रोशम् अतन्द्रितम्

yā putram īdṛśaṃ rājñaḥ pravāsayati dhārmikam / vanavāse mahāprājñaṃ sānukrośam atandritam

Sanskrit only: no published translation is held for this verse.

एता वाचो मनुष्याणां ग्रामसंवासवासिनाम् । शृण्वन्न् अतिययौ वीरः कोसलान् कोसलेश्वरः

etā vāco manuṣyāṇāṃ grāmasaṃvāsavāsinām / śṛṇvann atiyayau vīraḥ kosalān kosaleśvaraḥ

Sanskrit only: no published translation is held for this verse.

ततो वेदश्रुतिं नाम शिववारिवहां नदीम् । उत्तीर्याभिमुखः प्रायाद् अगस्त्याध्युषितां दिशम्

tato vedaśrutiṃ nāma śivavārivahāṃ nadīm / uttīryābhimukhaḥ prāyād agastyādhyuṣitāṃ diśam

Sanskrit only: no published translation is held for this verse.

गत्वा तु सुचिरं कालं ततः शीतजलां नदीम् । गोमतीं गोयुतानूपाम् अतरत् सागरंगमाम्

gatvā tu suciraṃ kālaṃ tataḥ śītajalāṃ nadīm / gomatīṃ goyutānūpām atarat sāgaraṃgamām

Sanskrit only: no published translation is held for this verse.

गोमतीं चाप्य् अतिक्रम्य राघवः शीघ्रगैर् हयैः । मयूरहंसाभिरुतां ततार स्यन्दिकां नदीम्

gomatīṃ cāpy atikramya rāghavaḥ śīghragair hayaiḥ / mayūrahaṃsābhirutāṃ tatāra syandikāṃ nadīm

Sanskrit only: no published translation is held for this verse.

स महीं मनुना राज्ञा दत्ताम् इक्ष्वाकवे पुरा । स्फीतां राष्ट्रावृतां रामो वैदेहीम् अन्वदर्शयत्

sa mahīṃ manunā rājñā dattām ikṣvākave purā / sphītāṃ rāṣṭrāvṛtāṃ rāmo vaidehīm anvadarśayat

Sanskrit only: no published translation is held for this verse.

सूत इत्य् एव चाभाष्य सारथिं तम् अभीक्ष्णशः । हंसमत्तस्वरः श्रीमान् उवाच पुरुषर्षभः

sūta ity eva cābhāṣya sārathiṃ tam abhīkṣṇaśaḥ / haṃsamattasvaraḥ śrīmān uvāca puruṣarṣabhaḥ

Sanskrit only: no published translation is held for this verse.

कदाहं पुनर् आगम्य सरय्वाः पुष्पिते वने । मृगयां पर्यटिष्यामि मात्रा पित्रा च संगतः

kadāhaṃ punar āgamya sarayvāḥ puṣpite vane / mṛgayāṃ paryaṭiṣyāmi mātrā pitrā ca saṃgataḥ

Sanskrit only: no published translation is held for this verse.

नात्यर्थम् अभिकाङ्क्षामि मृगयां सरयूवने । रतिर् ह्य् एषातुला लोके राजर्षिगणसंमता

nātyartham abhikāṅkṣāmi mṛgayāṃ sarayūvane / ratir hy eṣātulā loke rājarṣigaṇasaṃmatā

Sanskrit only: no published translation is held for this verse.

स तम् अध्वानम् ऐक्ष्वाकः सूतं मधुरया गिरा । तं तम् अर्थम् अभिप्रेत्य ययौ वाक्यम् उदीरयन्

sa tam adhvānam aikṣvākaḥ sūtaṃ madhurayā girā / taṃ tam artham abhipretya yayau vākyam udīrayan

Sanskrit only: no published translation is held for this verse.