Vālmīki Rāmāyaṇa (critical edition) 2.59

अथ रात्र्यां व्यतीतायां प्रातर् एवापरे ऽहनि । बन्दिनः पर्युपातिष्ठंस् तत् पार्थिवनिवेशनम्

atha rātryāṃ vyatītāyāṃ prātar evāpare 'hani / bandinaḥ paryupātiṣṭhaṃs tat pārthivaniveśanam

Sanskrit only: no published translation is held for this verse.

ततः शुचिसमाचाराः पर्युपस्थानकोविदाः । स्त्रीवर्षवरभूयिष्ठा उपतस्थुर् यथापुरम्

tataḥ śucisamācārāḥ paryupasthānakovidāḥ / strīvarṣavarabhūyiṣṭhā upatasthur yathāpuram

Sanskrit only: no published translation is held for this verse.

हरिचन्दनसंपृक्तम् उदकं काञ्चनैर् घटैः । आनिन्युः स्नानशिक्षाज्ञा यथाकालं यथाविधि

haricandanasaṃpṛktam udakaṃ kāñcanair ghaṭaiḥ / āninyuḥ snānaśikṣājñā yathākālaṃ yathāvidhi

Sanskrit only: no published translation is held for this verse.

मङ्गलालम्भनीयानि प्राशनीयान् उपस्करान् । उपनिन्युस् तथाप्य् अन्याः कुमारीबहुलाः स्त्रियः

maṅgalālambhanīyāni prāśanīyān upaskarān / upaninyus tathāpy anyāḥ kumārībahulāḥ striyaḥ

Sanskrit only: no published translation is held for this verse.

अथ याः कोसलेन्द्रस्य शयनं प्रत्यनन्तराः । ताः स्त्रियस् तु समागम्य भर्तारं प्रत्यबोधयन्

atha yāḥ kosalendrasya śayanaṃ pratyanantarāḥ / tāḥ striyas tu samāgamya bhartāraṃ pratyabodhayan

Sanskrit only: no published translation is held for this verse.

ता वेपथुपरीताश् च राज्ञः प्राणेषु शङ्किताः । प्रतिस्रोतस् तृणाग्राणां सदृशं संचकम्पिरे

tā vepathuparītāś ca rājñaḥ prāṇeṣu śaṅkitāḥ / pratisrotas tṛṇāgrāṇāṃ sadṛśaṃ saṃcakampire

Sanskrit only: no published translation is held for this verse.

अथ संवेपमानानां स्त्रीणां दृष्ट्वा च पार्थिवम् । यत् तद् आशङ्कितं पापं तस्य जज्ञे विनिश्चयः

atha saṃvepamānānāṃ strīṇāṃ dṛṣṭvā ca pārthivam / yat tad āśaṅkitaṃ pāpaṃ tasya jajñe viniścayaḥ

Sanskrit only: no published translation is held for this verse.

ततः प्रचुक्रुशुर् दीनाः सस्वरं ता वराङ्गनाः । करेणव इवारण्ये स्थानप्रच्युतयूथपाः

tataḥ pracukruśur dīnāḥ sasvaraṃ tā varāṅganāḥ / kareṇava ivāraṇye sthānapracyutayūthapāḥ

Sanskrit only: no published translation is held for this verse.

तासाम् आक्रन्दशब्देन सहसोद्गतचेतने । कौसल्या च सुमित्रा च त्यक्तनिद्रे बभूवतुः

tāsām ākrandaśabdena sahasodgatacetane / kausalyā ca sumitrā ca tyaktanidre babhūvatuḥ

Sanskrit only: no published translation is held for this verse.

कौसल्या च सुमित्रा च दृष्ट्वा स्पृष्ट्वा च पार्थिवम् । हा नाथेति परिक्रुश्य पेततुर् धरणीतले

kausalyā ca sumitrā ca dṛṣṭvā spṛṣṭvā ca pārthivam / hā nātheti parikruśya petatur dharaṇītale

Sanskrit only: no published translation is held for this verse.

सा कोसलेन्द्रदुहिता वेष्टमाना महीतले । न बभ्राज रजोध्वस्ता तारेव गगनच्युता

sā kosalendraduhitā veṣṭamānā mahītale / na babhrāja rajodhvastā tāreva gaganacyutā

Sanskrit only: no published translation is held for this verse.

तत् समुत्त्रस्तसंभ्रान्तं पर्युत्सुकजनाकुलम् । सर्वतस् तुमुलाक्रन्दं परितापार्तबान्धवम्

tat samuttrastasaṃbhrāntaṃ paryutsukajanākulam / sarvatas tumulākrandaṃ paritāpārtabāndhavam

Sanskrit only: no published translation is held for this verse.

सद्यो निपतितानन्दं दीनविक्लवदर्शनम् । बभूव नरदेवस्य सद्म दिष्टान्तम् ईयुषः

sadyo nipatitānandaṃ dīnaviklavadarśanam / babhūva naradevasya sadma diṣṭāntam īyuṣaḥ

Sanskrit only: no published translation is held for this verse.

अतीतम् आज्ञाय तु पार्थिवर्षभं यशस्विनं संपरिवार्य पत्नयः । भृशं रुदन्त्यः करुणं सुदुःखिताः प्रगृह्य बाहू व्यलपन्न् अनाथवत्

atītam ājñāya tu pārthivarṣabhaṃ yaśasvinaṃ saṃparivārya patnayaḥ / bhṛśaṃ rudantyaḥ karuṇaṃ suduḥkhitāḥ pragṛhya bāhū vyalapann anāthavat

Sanskrit only: no published translation is held for this verse.