Vālmīki Rāmāyaṇa (critical edition) 2.78

ततो निविष्टां ध्वजिनीं गङ्गाम् अन्वाश्रितां नदीम् । निषादराजो दृष्ट्वैव ज्ञातीन् संत्वरितो ऽब्रवीत्

tato niviṣṭāṃ dhvajinīṃ gaṅgām anvāśritāṃ nadīm / niṣādarājo dṛṣṭvaiva jñātīn saṃtvarito 'bravīt

Sanskrit only: no published translation is held for this verse.

महतीयम् अतः सेना सागराभा प्रदृश्यते । नास्यान्तम् अवगच्छामि मनसापि विचिन्तयन्

mahatīyam ataḥ senā sāgarābhā pradṛśyate / nāsyāntam avagacchāmi manasāpi vicintayan

Sanskrit only: no published translation is held for this verse.

स एष हि महाकायः कोविदारध्वजो रथे । बन्धयिष्यति वा दाशान् अथ वास्मान् वधिष्यति

sa eṣa hi mahākāyaḥ kovidāradhvajo rathe / bandhayiṣyati vā dāśān atha vāsmān vadhiṣyati

Sanskrit only: no published translation is held for this verse.

अथ दाशरथिं रामं पित्रा राज्याद् विवासितम् । भरतः कैकेयीपुत्रो हन्तुं समधिगच्छति

atha dāśarathiṃ rāmaṃ pitrā rājyād vivāsitam / bharataḥ kaikeyīputro hantuṃ samadhigacchati

Sanskrit only: no published translation is held for this verse.

भर्ता चैव सखा चैव रामो दाशरथिर् मम । तस्यार्थकामाः संनद्धा गङ्गानूपे ऽत्र तिष्ठत

bhartā caiva sakhā caiva rāmo dāśarathir mama / tasyārthakāmāḥ saṃnaddhā gaṅgānūpe 'tra tiṣṭhata

Sanskrit only: no published translation is held for this verse.

तिष्ठन्तु सर्वदाशाश् च गङ्गाम् अन्वाश्रिता नदीम् । बलयुक्ता नदीरक्षा मांसमूलफलाशनाः

tiṣṭhantu sarvadāśāś ca gaṅgām anvāśritā nadīm / balayuktā nadīrakṣā māṃsamūlaphalāśanāḥ

Sanskrit only: no published translation is held for this verse.

नावां शतानां पञ्चानां कैवर्तानां शतं शतम् । संनद्धानां तथा यूनां तिष्ठन्त्व् इत्य् अभ्यचोदयत्

nāvāṃ śatānāṃ pañcānāṃ kaivartānāṃ śataṃ śatam / saṃnaddhānāṃ tathā yūnāṃ tiṣṭhantv ity abhyacodayat

Sanskrit only: no published translation is held for this verse.

यदा तुष्टस् तु भरतो रामस्येह भविष्यति । सेयं स्वस्तिमयी सेना गङ्गाम् अद्य तरिष्यति

yadā tuṣṭas tu bharato rāmasyeha bhaviṣyati / seyaṃ svastimayī senā gaṅgām adya tariṣyati

Sanskrit only: no published translation is held for this verse.

इत्य् उक्त्वोपायनं गृह्य मत्स्यमांसमधूनि च । अभिचक्राम भरतं निषादाधिपतिर् गुहः

ity uktvopāyanaṃ gṛhya matsyamāṃsamadhūni ca / abhicakrāma bharataṃ niṣādādhipatir guhaḥ

Sanskrit only: no published translation is held for this verse.

तम् आयान्तं तु सम्प्रेक्ष्य सूतपुत्रः प्रतापवान् । भरतायाचचक्षे ऽथ विनयज्ञो विनीतवत्

tam āyāntaṃ tu samprekṣya sūtaputraḥ pratāpavān / bharatāyācacakṣe 'tha vinayajño vinītavat

Sanskrit only: no published translation is held for this verse.

एष ज्ञातिसहस्रेण स्थपतिः परिवारितः । कुशलो दण्डकारण्ये वृद्धो भ्रातुश् च ते सखा

eṣa jñātisahasreṇa sthapatiḥ parivāritaḥ / kuśalo daṇḍakāraṇye vṛddho bhrātuś ca te sakhā

Sanskrit only: no published translation is held for this verse.

तस्मात् पश्यतु काकुत्स्थ त्वां निषादाधिपो गुहः । असंशयं विजानीते यत्र तौ रामलक्ष्मणौ

tasmāt paśyatu kākutstha tvāṃ niṣādādhipo guhaḥ / asaṃśayaṃ vijānīte yatra tau rāmalakṣmaṇau

Sanskrit only: no published translation is held for this verse.

एतत् तु वचनं श्रुत्वा सुमन्त्राद् भरतः शुभम् । उवाच वचनं शीघ्रं गुहः पश्यतु माम् इति

etat tu vacanaṃ śrutvā sumantrād bharataḥ śubham / uvāca vacanaṃ śīghraṃ guhaḥ paśyatu mām iti

Sanskrit only: no published translation is held for this verse.

लब्ध्वाभ्यनुज्ञां संहृष्टो ज्ञातिभिः परिवारितः । आगम्य भरतं प्रह्वो गुहो वचनम् अब्रवीत्

labdhvābhyanujñāṃ saṃhṛṣṭo jñātibhiḥ parivāritaḥ / āgamya bharataṃ prahvo guho vacanam abravīt

Sanskrit only: no published translation is held for this verse.

निष्कुटश् चैव देशो ऽयं वञ्चिताश् चापि ते वयम् । निवेदयामस् ते सर्वे स्वके दाशकुले वस

niṣkuṭaś caiva deśo 'yaṃ vañcitāś cāpi te vayam / nivedayāmas te sarve svake dāśakule vasa

Sanskrit only: no published translation is held for this verse.

अस्ति मूलं फलं चैव निषादैः समुपाहृतम् । आर्द्रं च मांसं शुष्कं च वन्यं चोच्चावचं महत्

asti mūlaṃ phalaṃ caiva niṣādaiḥ samupāhṛtam / ārdraṃ ca māṃsaṃ śuṣkaṃ ca vanyaṃ coccāvacaṃ mahat

Sanskrit only: no published translation is held for this verse.

आशंसे स्वाशिता सेना वत्स्यतीमां विभावरीम् । अर्चितो विविधैः कामैः श्वः ससैन्यो गमिष्यसि

āśaṃse svāśitā senā vatsyatīmāṃ vibhāvarīm / arcito vividhaiḥ kāmaiḥ śvaḥ sasainyo gamiṣyasi

Sanskrit only: no published translation is held for this verse.