Vālmīki Rāmāyaṇa (critical edition) 2.89

अथ शैलाद् विनिष्क्रम्य मैथिलीं कोसलेश्वरः । अदर्शयच् छुभजलां रम्यां मन्दाकिनीं नदीम्

atha śailād viniṣkramya maithilīṃ kosaleśvaraḥ / adarśayac chubhajalāṃ ramyāṃ mandākinīṃ nadīm

Sanskrit only: no published translation is held for this verse.

अब्रवीच् च वरारोहां चारुचन्द्रनिभाननाम् । विदेहराजस्य सुतां रामो राजीवलोचनः

abravīc ca varārohāṃ cārucandranibhānanām / videharājasya sutāṃ rāmo rājīvalocanaḥ

Sanskrit only: no published translation is held for this verse.

विचित्रपुलिनां रम्यां हंससारससेविताम् । कुसुमैर् उपसंपन्नां पश्य मन्दाकिनीं नदीम्

vicitrapulināṃ ramyāṃ haṃsasārasasevitām / kusumair upasaṃpannāṃ paśya mandākinīṃ nadīm

Sanskrit only: no published translation is held for this verse.

नानाविधैस् तीररुहैर् वृतां पुष्पफलद्रुमैः । राजन्तीं राजराजस्य नलिनीम् इव सर्वतः

nānāvidhais tīraruhair vṛtāṃ puṣpaphaladrumaiḥ / rājantīṃ rājarājasya nalinīm iva sarvataḥ

Sanskrit only: no published translation is held for this verse.

मृगयूथनिपीतानि कलुषाम्भांसि साम्प्रतम् । तीर्थानि रमणीयानि रतिं संजनयन्ति मे

mṛgayūthanipītāni kaluṣāmbhāṃsi sāmpratam / tīrthāni ramaṇīyāni ratiṃ saṃjanayanti me

Sanskrit only: no published translation is held for this verse.

जटाजिनधराः काले वल्कलोत्तरवाससः । ऋषयस् त्व् अवगाहन्ते नदीं मन्दाकिनीं प्रिये

jaṭājinadharāḥ kāle valkalottaravāsasaḥ / ṛṣayas tv avagāhante nadīṃ mandākinīṃ priye

Sanskrit only: no published translation is held for this verse.

आदित्यम् उपतिष्ठन्ते नियमाद् ऊर्ध्वबाहवः । एते ऽपरे विशालाक्षि मुनयः संशितव्रताः

ādityam upatiṣṭhante niyamād ūrdhvabāhavaḥ / ete 'pare viśālākṣi munayaḥ saṃśitavratāḥ

Sanskrit only: no published translation is held for this verse.

मारुतोद्धूतशिखरैः प्रनृत्त इव पर्वतः । पादपैः पत्त्रपुष्पाणि सृजद्भिर् अभितो नदीम्

mārutoddhūtaśikharaiḥ pranṛtta iva parvataḥ / pādapaiḥ pattrapuṣpāṇi sṛjadbhir abhito nadīm

Sanskrit only: no published translation is held for this verse.

कच्चिन् मणिनिकाशोदां कच्चित् पुलिनशालिनीम् । कच्चित् सिद्धजनाकीर्णां पश्य मन्दाकिनीं नदीम्

kaccin maṇinikāśodāṃ kaccit pulinaśālinīm / kaccit siddhajanākīrṇāṃ paśya mandākinīṃ nadīm

Sanskrit only: no published translation is held for this verse.

निर्धूतान् वायुना पश्य विततान् पुष्पसंचयान् । पोप्लूयमानान् अपरान् पश्य त्वं जलमध्यगान्

nirdhūtān vāyunā paśya vitatān puṣpasaṃcayān / poplūyamānān aparān paśya tvaṃ jalamadhyagān

Sanskrit only: no published translation is held for this verse.

तांश् चातिवल्गुवचसो रथाङ्गाह्वयना द्विजाः । अधिरोहन्ति कल्याणि निष्कूजन्तः शुभा गिरः

tāṃś cātivalguvacaso rathāṅgāhvayanā dvijāḥ / adhirohanti kalyāṇi niṣkūjantaḥ śubhā giraḥ

Sanskrit only: no published translation is held for this verse.

दर्शनं चित्रकूटस्य मन्दाकिन्याश् च शोभने । अधिकं पुरवासाच् च मन्ये च तव दर्शनात्

darśanaṃ citrakūṭasya mandākinyāś ca śobhane / adhikaṃ puravāsāc ca manye ca tava darśanāt

Sanskrit only: no published translation is held for this verse.

विधूतकलुषैः सिद्धैस् तपोदमशमान्वितैः । नित्यविक्षोभितजलां विगाहस्व मया सह

vidhūtakaluṣaiḥ siddhais tapodamaśamānvitaiḥ / nityavikṣobhitajalāṃ vigāhasva mayā saha

Sanskrit only: no published translation is held for this verse.

सखीवच् च विगाहस्व सीते मन्दाकिनीम् इमाम् । कमलान्य् अवमज्जन्ती पुष्कराणि च भामिनि

sakhīvac ca vigāhasva sīte mandākinīm imām / kamalāny avamajjantī puṣkarāṇi ca bhāmini

Sanskrit only: no published translation is held for this verse.

त्वं पौरजनवद् व्यालान् अयोध्याम् इव पर्वतम् । मन्यस्व वनिते नित्यं सरयूवद् इमां नदीम्

tvaṃ paurajanavad vyālān ayodhyām iva parvatam / manyasva vanite nityaṃ sarayūvad imāṃ nadīm

Sanskrit only: no published translation is held for this verse.

लक्ष्मणश् चैव धर्मात्मा मन्निदेशे व्यवस्थितः । त्वं चानुकूला वैदेहि प्रीतिं जनयथो मम

lakṣmaṇaś caiva dharmātmā mannideśe vyavasthitaḥ / tvaṃ cānukūlā vaidehi prītiṃ janayatho mama

Sanskrit only: no published translation is held for this verse.

उपस्पृशंस् त्रिषवणं मधुमूलफलाशनः । नायोध्यायै न राज्याय स्पृहये ऽद्य त्वया सह

upaspṛśaṃs triṣavaṇaṃ madhumūlaphalāśanaḥ / nāyodhyāyai na rājyāya spṛhaye 'dya tvayā saha

Sanskrit only: no published translation is held for this verse.

इमां हि रम्यां गजयूथलोलितां निपीततोयां गजसिंहवानरैः । सुपुष्पितैः पुष्पधरैर् अलंकृतां न सो ऽस्ति यः स्यान् न गतक्रमः सुखी

imāṃ hi ramyāṃ gajayūthalolitāṃ nipītatoyāṃ gajasiṃhavānaraiḥ / supuṣpitaiḥ puṣpadharair alaṃkṛtāṃ na so 'sti yaḥ syān na gatakramaḥ sukhī

Sanskrit only: no published translation is held for this verse.

इतीव रामो बहुसंगतं वचः प्रियासहायः सरितं प्रति ब्रुवन् । चचार रम्यं नयनाञ्जनप्रभं स चित्रकूटं रघुवंशवर्धनः

itīva rāmo bahusaṃgataṃ vacaḥ priyāsahāyaḥ saritaṃ prati bruvan / cacāra ramyaṃ nayanāñjanaprabhaṃ sa citrakūṭaṃ raghuvaṃśavardhanaḥ

Sanskrit only: no published translation is held for this verse.