Vālmīki Rāmāyaṇa (critical edition) 3.18

तां तथा पतितां दृष्ट्वा विरूपां शोणितोक्षिताम् । भगिनीं क्रोधसंतप्तः खरः पप्रच्छ राक्षसः

tāṃ tathā patitāṃ dṛṣṭvā virūpāṃ śoṇitokṣitām / bhaginīṃ krodhasaṃtaptaḥ kharaḥ papraccha rākṣasaḥ

Sanskrit only: no published translation is held for this verse.

बलविक्रमसम्पन्ना कामगा कामरूपिणी । इमाम् अवस्थां नीता त्वं केनान्तकसमा गता

balavikramasampannā kāmagā kāmarūpiṇī / imām avasthāṃ nītā tvaṃ kenāntakasamā gatā

Sanskrit only: no published translation is held for this verse.

देवगन्धर्वभूतानाम् ऋषीणां च महात्मनाम् । को ऽयम् एवं महावीर्यस् त्वां विरूपां चकार ह

devagandharvabhūtānām ṛṣīṇāṃ ca mahātmanām / ko 'yam evaṃ mahāvīryas tvāṃ virūpāṃ cakāra ha

Sanskrit only: no published translation is held for this verse.

न हि पश्याम्य् अहं लोके यः कुर्यान् मम विप्रियम् । अन्तरेन सहस्राक्षं महेन्द्रं पाकशासनम्

na hi paśyāmy ahaṃ loke yaḥ kuryān mama vipriyam / antarena sahasrākṣaṃ mahendraṃ pākaśāsanam

Sanskrit only: no published translation is held for this verse.

अद्याहं मार्गणैः प्राणान् आदास्ये जीवितान्तकैः । सलिले क्षीरम् आसक्तं निष्पिबन्न् इव सारसः

adyāhaṃ mārgaṇaiḥ prāṇān ādāsye jīvitāntakaiḥ / salile kṣīram āsaktaṃ niṣpibann iva sārasaḥ

Sanskrit only: no published translation is held for this verse.

निहतस्य मया संख्ये शरसंकृत्तमर्मणः । सफेनं रुधिरं रक्तं मेदिनी कस्य पास्यति

nihatasya mayā saṃkhye śarasaṃkṛttamarmaṇaḥ / saphenaṃ rudhiraṃ raktaṃ medinī kasya pāsyati

Sanskrit only: no published translation is held for this verse.

कस्य पत्त्ररथाः कायान् मांसम् उत्कृत्य संगताः । प्रहृष्टा भक्षयिष्यन्ति निहतस्य मया रणे

kasya pattrarathāḥ kāyān māṃsam utkṛtya saṃgatāḥ / prahṛṣṭā bhakṣayiṣyanti nihatasya mayā raṇe

Sanskrit only: no published translation is held for this verse.

तं न देवा न गन्धर्वा न पिशाचा न राक्षसाः । मयापकृष्टं कृपणं शक्तास् त्रातुं महाहवे

taṃ na devā na gandharvā na piśācā na rākṣasāḥ / mayāpakṛṣṭaṃ kṛpaṇaṃ śaktās trātuṃ mahāhave

Sanskrit only: no published translation is held for this verse.

उपलभ्य शनैः संज्ञां तं मे शंसितुम् अर्हसि । येन त्वं दुर्विनीतेन वने विक्रम्य निर्जिता

upalabhya śanaiḥ saṃjñāṃ taṃ me śaṃsitum arhasi / yena tvaṃ durvinītena vane vikramya nirjitā

Sanskrit only: no published translation is held for this verse.

इति भ्रातुर् वचः श्रुत्वा क्रुद्धस्य च विशेषतः । ततः शूर्पणखा वाक्यं सबाष्पम् इदम् अब्रवीत्

iti bhrātur vacaḥ śrutvā kruddhasya ca viśeṣataḥ / tataḥ śūrpaṇakhā vākyaṃ sabāṣpam idam abravīt

Sanskrit only: no published translation is held for this verse.

तरुणौ रूपसम्पन्नौ सुकुमारौ महाबलौ । पुण्डरीकविशालाक्षौ चीरकृष्णाजिनाम्बरौ

taruṇau rūpasampannau sukumārau mahābalau / puṇḍarīkaviśālākṣau cīrakṛṣṇājināmbarau

Sanskrit only: no published translation is held for this verse.

गन्धर्वराजप्रतिमौ पार्थिवव्यञ्जनान्वितौ । देवौ वा मानुषौ वा तौ न तर्कयितुम् उत्सहे

gandharvarājapratimau pārthivavyañjanānvitau / devau vā mānuṣau vā tau na tarkayitum utsahe

Sanskrit only: no published translation is held for this verse.

तरुणी रूपसम्पन्ना सर्वाभरणभूषिता । दृष्टा तत्र मया नारी तयोर् मध्ये सुमध्यमा

taruṇī rūpasampannā sarvābharaṇabhūṣitā / dṛṣṭā tatra mayā nārī tayor madhye sumadhyamā

Sanskrit only: no published translation is held for this verse.

ताभ्याम् उभाभ्यां सम्भूय प्रमदाम् अधिकृत्य ताम् । इमाम् अवस्थां नीताहं यथानाथासती तथा

tābhyām ubhābhyāṃ sambhūya pramadām adhikṛtya tām / imām avasthāṃ nītāhaṃ yathānāthāsatī tathā

Sanskrit only: no published translation is held for this verse.

तस्याश् चानृजुवृत्तायास् तयोश् च हतयोर् अहम् । सफेनं पातुम् इच्छामि रुधिरं रणमूर्धनि

tasyāś cānṛjuvṛttāyās tayoś ca hatayor aham / saphenaṃ pātum icchāmi rudhiraṃ raṇamūrdhani

Sanskrit only: no published translation is held for this verse.

एष मे प्रथमः कामः कृतस् तात त्वया भवेत् । तस्यास् तयोश् च रुधिरं पिबेयम् अहम् आहवे

eṣa me prathamaḥ kāmaḥ kṛtas tāta tvayā bhavet / tasyās tayoś ca rudhiraṃ pibeyam aham āhave

Sanskrit only: no published translation is held for this verse.

इति तस्यां ब्रुवाणायां चतुर्दश महाबलान् । व्यादिदेश खरः क्रुद्धो राक्षसान् अन्तकोपमान्

iti tasyāṃ bruvāṇāyāṃ caturdaśa mahābalān / vyādideśa kharaḥ kruddho rākṣasān antakopamān

Sanskrit only: no published translation is held for this verse.

मानुषौ शस्त्रसम्पन्नौ चीरकृष्णाजिनाम्बरौ । प्रविष्टौ दण्डकारण्यं घोरं प्रमदया सह

mānuṣau śastrasampannau cīrakṛṣṇājināmbarau / praviṣṭau daṇḍakāraṇyaṃ ghoraṃ pramadayā saha

Sanskrit only: no published translation is held for this verse.

तौ हत्वा तां च दुर्वृत्ताम् उपावर्तितुम् अर्हथ । इयं च रुधिरं तेषां भगिनी मम पास्यति

tau hatvā tāṃ ca durvṛttām upāvartitum arhatha / iyaṃ ca rudhiraṃ teṣāṃ bhaginī mama pāsyati

Sanskrit only: no published translation is held for this verse.

मनोरथो ऽयम् इष्टो ऽस्या भगिन्या मम राक्षसाः । शीघ्रं संपद्यतां गत्वा तौ प्रमथ्य स्वतेजसा

manoratho 'yam iṣṭo 'syā bhaginyā mama rākṣasāḥ / śīghraṃ saṃpadyatāṃ gatvā tau pramathya svatejasā

Sanskrit only: no published translation is held for this verse.

इति प्रतिसमादिष्टा राक्षसास् ते चतुर्दश । तत्र जग्मुस् तया सार्धं घना वातेरिता यथा

iti pratisamādiṣṭā rākṣasās te caturdaśa / tatra jagmus tayā sārdhaṃ ghanā vāteritā yathā

Sanskrit only: no published translation is held for this verse.